Hawaareta Ooso 2

Xillo Ayanay ammaniza asa bolla wodhdhides

1 Phenxaqoste geetettiza ba7aale gallassi gakkida wode asay wurikka issi soon shiiqi dishin; 2 qofay baynda daro mino gote carko mala giirissi yides; asay diza keeththakka kumides. 3 Tama laco inxarsa malay asas beettidi shaaketi shaaketi issi issi asa bolla uttides. 4 Ammanizayti wuri Xillo Ayanan kumidi Ayanay istas haasayanas immidayssa keena hara qaalara haasaya oykkida.

5 He wode salo gufanthon diza dereppe yida Xoossas babbiza Ayhudati Yerusalamen deettes. 6 He giirissa siydi derey shiiqides. Issi issi asay ba qaalara haasayizayssa siydi malalettida. 7 Malaletidinne gaanazi dhayin “Hayti haasayizayti wurikka Galila as deettenee? 8 Histin nuni nu yeletida nu dere qaalara isti haasayishin wosti siyizonii? 9 Nuni Pharteena asay, Meede asay, Eelaame asay, Mesopotoomiyan, Yuhudan, Qophodooqiyan, Phanxoosan, Iisiyan, 10 Firgiyan, Phinfiliyan, Gibxen, Qareena achchan diza Liibiyappenne Oroomeppe yidayti 11 Ayhudatinne gede Ayhudatethan gelida Qarxeese asanne Araabe asata gidishin Xoossa wolqama oosoza hayti nu qaalara haasayishin nu siyoos” gida.

12 Wurikka keehi malalettidinne gaanazi dhayin ba giddon “Hayssi aazeshaa?” geetettida. 13 Bagga asay “Hayti daro woyne cajje uyida” giidi ista qidhida.

14 He wode Phexroosi tammanne issinetara eqqidinne ba qaala dhoqu histidi deraas hizgides “Inteno Yuhuda asato! Yerusalamen dizayto! Inte wurikka hayssa issi miish eritenne ta gizayssa siyite. 15 Ha7i gadey wontin buro heedzdzu saate gidida gish inte qoppiza mala hayti asati mathotibeetenna. 16 Gido attin hayssi kase nabe Iyu7eelen hizgi yootetida qaalay poletanassa,

17 ‘Xoossi Wursetha gallas

ta Ayana asho may7ida ubba bolla ta gussana;

inte maca naytinne inte attuma nayti tinbite haasayana;

yelaga nayti ajjuta beyana;

Cimati agumo agumettana. [a]

18 He wode ta maca ashkarata bollanne ta attuma ashkarata bolla

ta Ayanappe ta gussana.

Istika tinbite haasayana.

19 Bolla Salon malalisiza hanota ta bessana,

garsa sa7an malatata ta bessana;

suuthi, tamaynne tulalay hanana.

20 Gitanne boncho gidida

Goda gallassi yaanappe kasetidi

awa arshey dhumana;

Aginaykka suuth misatana.

21 Goda sunth xeygizay wuri attana’ gides.

22 “Isra7eele nayto! Hayssa qaala siyite; inte inte baggara erizayssa mala inte giddon malatanne asi siyi eronta miishata iza kushen ooththidi Xoossi Naazirete Yesusas markatides. 23 Xoossi kase ba qachidayssa izas beni eratetha mala hayssade inte kushen aaththi immides. Inteka iita asata kushen kaqeti hayqqana mala ooththideta. [b] 24 Gido attin Xoossi iza bollafe hayqo wolqa diggidi hayqoppe denthides. Hayqoyka iza oykki ashshanas dandaybenna. [c] 25 Dawuteykka iza gish

‘Tani Goda ubba wode ta sinthan beyays;

izi ta ushachan dees; mulekka hirgike.

26 Hessa gish ta woznay ufayetees;

ta duunaykka galatees;

ta ashoy ufayssan daana.

27 Ne ta shempoyo Duufon aggaka;

ne naa geeshshaza wooqana mala aggaggakka.

28 Ne de7o oge ta erana mala ooththadasa.

Ne tanara diza gish ta ufayssay kumeththa’

29 “Ta ishato! Beni aawatappe Dawutey hayqqi moogetiddayssanne iza duufoy hach gakkanaas nu achchan dizayssa babbonta ta intes yootana danda7ays. 30 Izi nabe gidida gish Xoossi iza zerethafe issade iza kawoteththa alga bolla wothanayssa kase caaqo qaalan yootidayssa erides. [d] 31 Hessa kasetidi erida gishshinne iza ashoy wooqi Duufon attonta doorettida Kirstoosa dentha gish haasayides. 32 He Yesusa Xoossi hayqoppe denthides. Nukka wuri hayssas markata. 33 Hessa gish izi Xoossa ushachchan dhoqu dhoqu gidappe guye Xillo Ayana ufaysa ba aawappe ekkidi ha7i inte beyizayssanne siyizayssa duge gussides. 34-35 Dawutey pude salo kezibenna; izi ba duunan

‘Goday ta Godas “Ta ne morketa

ne toho garsan yedhissana gakkanaas

ta ushachchan utta” gides.’ [e]

36 “Hessa gish Xoossi inte kaqqida Yesusa Godanne Kirstoosa histidayssa Isra7eele asay wuri lo7ethi ero” gides.

37 Derey hessa siyida mala woznay boshettides. Phexroosanne hanko Yesusi kiittidayta “Nu ishato! Histin nu ay ooththinoo?” gida.

38 Phexroosikka “Maarotethan gelite; inte nagaray maarettana mala intefe issi issi asi Yesus Kirstoosa sunthan xammaqettite; izi immiza Xillo Ayana inte ekkana. 39 Ufayssa qaalay intessinne inte naytassa; qasseka Goda Xoossi baako xeygiza haahon dizaytassara ubbassa” gides.

40 Hara daro qaalara istas markatishe “Hayssa geella yeletethafe intena ashshite” giidi ista qofisides. 41 He gallas qaala ekkidaytinne xammaqetidayti heedzdzu shi mala asay kaseyta bolla gujettides. 42 Istika Hawaareta timirten, issife quma muussaninne woossan minnida.

43 Hawaareta kushen daro malatati oosettida gish asi ubbay istas babbides. 44 Ammanidayti wurikka issife de7ida; baas dizazikka ubba issi bolla go7ettida. [f] 45 Baas diza miishenne mehe bayzi bayzi ba giddon koshshida mala gishechchida. 46 Gallas gallas Xoossa Keeththan issife shiiqetes. Ba keeththanka quma issife ufayssaninne suure woznara meetes. 47 Isti Xoossa galatishe dere sinthan bonchettida. Godayka ista bolla gallas gallas oorath ammanizayta gujjides.

<- Hawaareta Ooso 1 Hawaareta Ooso 3 ->