1 ታ ኢሻቶ! ታኒ ዎጋ ኤሪዛ ኣሳታስ ዮታይስ። ዎጋይ ሼምፖራ ፓፃ ዲዛ ኣሳ ፃላላ ሃሪዛይሳ ኢንቴ ኤሬኬቲ? 2 ኢሲ ማጫሲ ኣዚና ጌሊኮ ባ ኣዚናራ ኢዛ ዎጋን ቃሼቲዛይ ኣዚናይ ፓፃ ዲዛ ዎዴ ጋካናሳ። ኣዚናይ ሃይቂኮ ኢዛ ማቾ ጊዲዛ ዎጋፔ ኣንጄታዉስ። 3 ጊዶ ኣቲን ኣዚናይ ፓፃ ዲሺን ኢዛ ሃራ ኣዚና ጌሊኮ ላይማ ጌቴታዉስ። ኣዚናይ ሃይቂኮ ቃሴ ሃራ ኣሲ ጌሊኮ ካሴ ኣዚና ዎጋፔ ኣንጄታዱስ ኣቲን “ላይማ” ጌቴቱኩ።

4 ሄሳ ጊሽ ታ ኢሻቶ! ኢንቴካ ዬሱስ ኪርስቶሳ ኣሳቴꬃ ባጋራ ዎጋስ ሃይቂዴታ። ኢንቴ ሃይቆፔ ዴንዲዳ ኪርስቶሳ ባጋ ጊዲን ኑኒ ፆሳስ ኣይፌ ኣይፋናሳ። 5 ናጋራንቻ ሜꬌቴꬃ ሼኔን ኑ ዲዛ ዎዴ ሃይቆስ ጋꬂዛ ኣይፌ ኑ ኣይፋና ማላ ዎጋይ ዴንꬄꬂዳ ናጋራ ኣሞይ ኑ ቦላ ኦꬂዴስ። 6 ሃዒ ጊዲኮ ካሴ ኑና ዋፂ ቃቺዳ ዎጋስ ሃይቂዳ ጊሽ ሄ ዎጋፔ ዎዜቲዶስ። ሄሲካ ካሴ ጬጋ ዎጋን ፃፌቲዳይሳን ጊዶንታ ዲሼ ኦራꬃ ኣያና ኦጌን ኑኒ ኦꬃናሳ።

7 ሂስቲን ኑ ኣይ ጊኖ? ባ ሁዔስ ዎጋይ ናጋራ? ሙሌካ ጊዴና። ዎጋ ባጋራ ጊዶንታኮ ናጋራይ ኣዛኮኔ ኑ ኤሮኮኮ ሺን፤ ዎጋይ “ኣሞቶፋ!” ጎንታኮ ኣሞይ ኣዛኮኔ ቱማፔ ታ ኤሪኬ። [a] 8 ናጋራይ ቃሴ ዎጋፔ ኬዚዳ ኣዛዞይ ቤሲዳ ኦጌን ጎዔቲዲ ታ ጊዶን ዱማ ዱማ ኢታ ኣሞ ዴንꬄꬂዴስ። ዎጋይ ያናፔ ካሴ ናጋራይ ሃይቂዳዛ።

9 ዎጋይ ባይንዳ ካሴ ታኒ ፓፃ ዳይሲሺን ዎጋይ ዪን ቃሴ ናጋራይ ፓፃ ጊዲዴስ። ታ ጊዲኮ ሃይቃዲስ። 10 ኣስ ኣሻና ቆፌቲዳ ኣዛዞይካ ሃይቆ ኤኪ ዪዳይሳ ኤራዲስ። 11 ናጋራይ ዎጋ ባጋራ ቤቲዳ ጋሶን ጎዔቲዲ ታና ባሌꬂዴሲኔ ኣዛዞን ዎꬊዴስ። [b]

12 ሄሳ ጊሽ ዎጋይ ባ ባጋራ ጌሻ። ኣዛዞይካ ጌሻ፤ ፂሎኔ ሎዖ። 13 ጊዶ ኣቲን ሎዖስ ሃኒዳይሲ ታስ ሃይቆስ ጊዲዴ? ሙሌካ ጊዴና። ጊዶ ኣቲን ናጋራይ ባ ናጋራቴꬃን ኤሬታና ማላ ሎዖ ጊዲዳ ሃኖ ባጋራ ታ ቦላ ሃይቆ ኤሂዴስ። ሄሲካ ናጋራይ ኣዛዞ ባጋራ ካሴፔ ኣꬂ ናጋራ ዳርሲዴስ።

14 ዎጋይ ኣያና ዮዖ ጊዲዳይሳ ኑ ኤሮስ። ታ ቃሴ ናጋራስ ኣይሌ ማላ ባይዜቲዳ ኣሳ። 15 ታኒ ታ ኦꬂዛይሳ ኤሪኬ። ታ ኦꬃና ኮዪዛይሳ ኦꬃ ኤሪኬ ሺን ታ ኢፂዛ ሚሽ ኦꬃይስ። [c] 16 ታ ኦꬃና ኮዮንታ ሚሽ ኦꬂዛ ጊዲኮ ዎጋይ ሎዖ ጊዲዳይሳ ታ ማርካታይስ። 17 ሄሳ ኦꬂዛይ ታና ጊዶንታ ታ ጋꬃን ዲዛ ናጋራይ ኦꬄስ።

18 ታናን ሄሲካ ናጋራንቻ ጊዲዳ ታ ሜꬌቴꬃ ጊዶን ኣይኮ ሎዖ ሚሽ ባይንዳይሳ ታ ኤራይስ። ሎዖ ኦꬃናስ ታስ ኣሞቴꬅ ዴስ ሺን ፖላ ኦꬃ ኤሪኬ። 19 ታ ኦꬂዛይ ኦꬃና ጋዳ ኮዪዛ ሎዖ ኦሶ ጊዴና። ጊዶ ኣቲን ታ ኦꬃና ኮዮንታ ኢታ ኦሶ ኦꬃይስ። 20 ታኒ ኦꬃናስ ኮዮንታይሳ ኦꬂዛ ጊዲኮ ሄሳ ኦꬂዛይ ታና ጊዶንታ ታ ጊዶን ዲዛ ናጋራ።

21 ሄሳ ጊሽ ሃይሲ ዎጋይ ኦሶን ዲዛይሲ ታስ ጌሊዴስ። ሄሲካ ታኒ ሎዖ ኦꬃና ኮያይሲሺን ኢታ ኦꬃይስ። 22 ታኒ ታ ጋꬃራ ፆሳ ዎጋን ኡፋዬታይስ። 23 ጊዶ ኣቲን ታ ኣሳቴꬃ ጊዶን ኦꬂዛ ናጋራ ዎጋይ ታና ቃቺ ኦይኪዲ ታ ቆፋ ዎጋራ ኦሌቲዛ ሃራ ዎጋይ ታ ኣሳቴꬃ ጊዶን ኦꬂሺን ቤያይስ። 24 ታ ኣይ ማላ ላፋ ኣሴ! ሃይሳ ሃይቆስ ኢሜቲዳ ኣሳቴꬃፌ ታና ኣሻናይ ኦኔ? 25 ኑ ጎዳ ዬሱስ ኪርስቶሳ ባጋራ ጋላታይ ፆሳስ ጊዶ።

ሂስቲኮ ታኒ ታ ባጋራ ታ ቆፋን ፆሳ ዎጋስ ኣይሌ ጊዳሼ ታኒ ታ ሜꬌቴꬃ ዎጋን ናጋራ ዎጋስ ኣይሌ።

<- ኦሮሜ 6ኦሮሜ 8 ->