1 ሄሳፌ ጉዬ ጪማ ኦላዛ ዶዪዛ ቁልፔኔ ጊታ ሳንሳላታ ባ ኩሼን ኦይኪዳ ኪታንቻይ ሳሎፔ ዱጌ ዎꬊሺን ታ ቤያዲስ። 2 ሄ ዳዌዛ ኦይኪዲ ሺ ላይꬅ ቃቺዴስ። ሄሲ ዳዌዚ ዳቡሎሳ ዎይኮ ፃላዔ ጌቴቲዛ ካሴ ቤኒ ሾሻዛ። [a] 3 ሺ ላይꬅ ጋካናስ ኢዚ ዴሬ ኣሳ ባሌꬆንታ ማላ ሄ ኪታንቻዚ ዳዌዛ ዱጌ ጪማ ኦላን ዬጊዴስ፤ ኢዛ ቦላ ጎርዲዲ ማታማ ዎꬂዴስ። ኢዚ ሄሳፌ ጉꬃ ዎዴስ ቢርሼታናስ ቤሴስ።

4 ሄሳፌ ጉዬ ታኒ ኣልጋታ ቤያዲስ። ሄ ኣልጋታ ቦላ ፒርዳ ፒርዳናስ ጎዳቴꬂ ኢስታስ ኢሜቲዳይቲ ኡቲዳይታ ቤያዲስ። ቃሴካ ዬሱሳ ጊሽ ኢስቲ ማርካቲዳ ጊሺኔ ፆሳ ቃላ ጊሽ ኢስታ ቆꬌይ ቃንፄቲዳ ኣሳታ ሼምፖካ ቤያዲስ። ሄይታንቲ ዶዓዛሲኔ ኢዛ ሚሲሌዛስ ጎይኒቤቴና። ኢዛ ማላታካ ባ ሊጴ ቦላ ጊዲን ባ ኩሼ ቦላ ዎꬆንታይታ። ኢስቲ ሃይቆፔ ዴንዲዳ ኪርስቶሳራ ኢሲፌ ሺ ላይꬅ ካዎቲዳ። [b] 5 ሃንኮ ኣቲዳ ሃይቄꬃቲ ቃስ ሄ ሺ ላይꬃይ ፖሌታና ጋካናስ ሃይቆፔ ዴንዲቤቴና። ሄሲካ ሃይቆፔ ኮይሮ ዴንꬃ። 6 ኮይሮ ዴንꬃን ዲዛይቲ ሄይቲ ኣንጄቲዳይታኔ ጌሻታ። ናምዓንꬆ ሃይቆይ ኢስታ ቦላ ዎልቃይ ዴና። ኢስቲ ፆሳ ቄሴታኔ ኪርስቶሳ ቄሴታ ጊዳና። ኢስቲ ኪርስቶሳራ ሺ ላይꬅ ካዎታና።

7 ሄ ሺ ላይꬃይ ፖሌቲዳ ማላ ፃላዔይ ባ ቃሼቲዳሶፔ ቢርሼታና። 8 ኣላሜ ቦላ ዲዛይቲ ሄይቲካ ጎጌኔ ማጎጌ ጌቴቲዛይታ ባሌꬃናሲኔ ኢስታ ኦላስ ኤኪ ባናስ ኬዛና፤ ሄይታንታ ቆዳይ ኣባ ኣቻን ዲዛ ኣጬ ማላ። [c] 9 ኢስቲ ኩሜꬃ ቢታ ቦላ ላሌቲዲ ጌሻቲ ዲዛሶዮ ዶሴቲዳ ካታማዮ ጊዶꬂዳ ሺን ሳሎፔ ዎꬊዳ ታማይ ኢስታ ዲፒ ሂስቲ ፁጊዴስ። 10 ካሴ ኢስታ ባሌꬂዳ ዳቡሎሲ ሄ ዶዓዚኔ ዎርዶ ናቤዚ ዲዛሶይ ዲኔን ኤፂዛ ታማ ኣባ ጊዶን ዬጌቲዳ። ኢስቲ ሄን ቃማኔ ጋላስ ሜርናፔ ሜርና ጋካናስ ፁጌታና።

11 ሄሳፌ ጉዬ ኢሲ ጊታ ቦꬃ ኣልጋኔ ሄ ኣልጋ ቦላ ኡቲዳይሳ ቤያዲስ፤ ቢታይኔ ሳሎይ ኢዛ ሲንꬃፌ ባቃቲዳ ሺን ኢስቲ ቢዲ ጌላናሶይ ቤቲቤና። [d] 12 ሄ ኣልጋዛ ሲንꬃን ሃይቂዳ ጪማታኔ ናቴꬃታ ቤያዲስ። ማፃፋቲካ ዶዬቲዳ ሃራ ዴዖ ማፃፋይካ ዶዬቲዴስ፤ ሃይቂዳይቲካ ማፃፋታን ካሴ ፃፌቲ ዲዛ ባ ኦሶ ኦሶ ማላ ፒርዳ ኤኪዳ። 13 ኣባይካ ባ ጋርሳን ዲዛ ሃይቄꬃታ ኢሚዴስ። ሃይቆይኔ ዱፎይ ቃስ ባ ጊዶን ዲዛይቲ ካሴ ሃይቂዳይታ ኢሚዳ። ኢሲ ኢሲ ኣሲ ባ ኦሶ ኦሶ ማላ ፒርዳ ኤኪዴስ። 14 ሃይቆይኔ ዱፎይ ታማ ኣባ ጊዶ ዬጌቲዳ። ሄ ታማ ኣባዚ ናምዓንꬆ ሃይቆ። 15 ኢዛ ሱንꬂ ዴዖ ማፃፋን ፃፌቶንታዴይ ዉሪካ ታማ ኣባን ዬጌቲዴስ።

<- ዮሃኒሳ ኣጁታ 19ዮሃኒሳ ኣጁታ 21 ->