5 ሄሳፌ ጉዬ “ኢዛስ ያዪዛ ኢዛ ኦሳንቻቲ ዉሪካ ጉꬃቲኔ ጊታቲ ኑ ጎዳ ጋላቲቴ” ጊዛ ቃላይ ኣልጋፌ ኬዚዴስ። [c] 6 ዳሮ ኣሳ ቃላ ጊሪስ ሚሳቲዛይ፥ ሻፋ ሃꬃ ጊሪስ ሚሳቲዛ ጊሪስ፥ ዎልቃማ ዳዳ ጊሪስ ሚሳቲዛ ጊሪስ “ሃሌ ሉያ! ዉርሲ ዳንዳዪዛ ጎዳይ ካዎቴስ! [d] 7 ዶርሳዛ ሳርጌ ጋላሲ ጋኪዳ ጊሺኔ ኢዛ ሚሺራያ ጊጌታ ኡቲዳ ጊሽ ሃ ዪቴ፤ ኣኔ ኡፋዬቶስ! ኣኔ ኡፋይሳን ኢዛ ቦንቾስ። 8 ኢዛ ፆልቄቲዛ ጌሻ ሎዖ ማይዖ ማይዓና ማላ ኢዚስ ኢሜቲዴስ” ጊሺን ሲያዲስ። ሄ ሌዔ ማይዖዚ ጌሻታ ፂሎቴꬃ ኦሶ።

9 ሄሳፌ ኪታንቻዚ ታና “ጌዴ ዶርሳዛ ሳርጌስ ፄይጌቲዳይቲ ኣንጄቲዳይታ ጋዳ ፃፋ” ጊዴስ። ካሌꬂዲካ “ሃይሲ ቱሙ ፆሳ ቃላ” ጊዴስ። [e]

10 ታካ ሄ ኪታንቻዛስ ጎይናናስ ኢዛ ቶሆ ቦላ ታ ሊጴን ጉፋናዲስ-ሺን ኢዚ ታና “ኣጋ! ሄሳꬆ ኦꬆፋ! ታካ ኔናራ ዬሱስ ኪርስቶሳ ማርካቴꬅ ኦይኪዳ ኢሻታራ ኢሲፌ ኦꬂዛዴ፤ ኔኒ ፆሳስ ጎይና! ዬሱሳ ማርካይ ቲንቢቴ ኣያና” ጊዴስ።

11 ሄሳፌ ጉዬ ሳሎይ ዶዬቲዳይሳ ታ ቤያዲስ። ቃሴካ ቦꬃ ፓራካ ቤያዲስ። ሄ ፓራዛ ቶጊዳይሲ ኣማኔቲዳዴኔ ቱማንቻ ጌቴቲዛዴ። ኢዚ ቃስ ቱማን ፒርዴሲኔ ኦሌቴስ። [f] 12 ኢዛ ኣይፌቲ ታማ ላጮ ሚሳቴቴስ። ኢዛ ሁዔ ቦላ ዳሮ ዛዉዴቲ ዴቴስ። ኢዛፔ ኣቲን ሃራ ኣሲ ኦኒካ ኤሮንታ ሱንꬂ ኢዛ ቦላ ፃፌቲ ኡቲዴስ። [g] 13 ኢዚ ቃስ ሱꬃን ማꬌቲዳ ማይዖ ማይዒዴስ። ኢዛ ሱንꬃይ ቃስ “ፆሳ ቃላ” ጌኣቴቴስ። 14 ቦꬃ ፓራታ ቶጊዲ ቦꬂኔ ጌሽ ጊዲዳ ሎዖ ማይዖ ማይዒዳ ሳሎ ኦላንቻቲ ኢዛ ካሊዳ። 15 ኣይዛቤታ ኢዛራ ቃንፂዛ ቃራ ማሻይ ኢዛ ዱናፔ ኬዜስ። ኢዚ ኢስታ ቢራታ ጉፌራ ሃራና። ኢዚ ዉርሲካ ዳንዳዪዛ ፆሳ ሚኖ ሃንቆ ቆንጪሲዛ ዎይኔ ጫጄ ዬꬊዛሶን ኢስታ ዬꬋና። [h] 16 ኢዛ ማይዖ ቦላኔ ኢዛ ዎዲራ ቦላ “ኢዚ ካዎታስ ካዎ፥ ጎዳታስ ጎዳ” ጊዛ ሱንꬂ ፃፌቲ ኡቲዴስ።

17 ሄሳፌ ጉዬ ቃስ ኣዋ ኣርሼ ቦላ ኤቂዳ ኢሲ ኪታንቻ ቤያዲስ። ኢዚ ቃስ ሳሎ ቦላ ፒራꬊዛ ካፎታስ “ዎጋ ፆሳ ዲጊሳ ማናስ ሃ ዪቴ! ሃ ሺቂቴ! 18 ካዎታ ኣሾ፥ ኦላንቻታ ኣዛዚዛይታ ኣሾ፥ ጎባ ኦላንቻታ ኣሾ፥ ፓራታ ኣሾኔ ፓራ ቶጊዛይታ ኣሾ፥ ጎዳታ ኣሾኔ ኢስታ ኣሽካራታ ኣሾ፥ ጉꬃ ናይታኔ ጪማ ኣሳታ ኣሾ ጊዲዳ ኣሳ ኡባ ኣሾ ሃ ዪዲ ሚቴ!” ጊሼ ጊታ ቃላን ዋሲዴስ

19 ሄሳꬆካ ዶዓዚኔ ቢታ ካዎቲ ኢስታ ኦላ ኣሲካ ቦꬃ ፓራ ቶጊዳይሳራኔ ኢዛ ኦላ ኣሳራ ኦሌታናስ ሺቂዳይታ ቤያዲስ። 20 ጊዶ ኣቲን ሄ ዶዓዚ ኦይኬቲዴስ። ካሴ ኢዛራ ዳሮ ማላታ ኦꬂዳ ዎርዶ ናቤዚካ ኢዛራ ኦይኬቲዴስ። ኢዚ ቃስ ሄ ዶዓዛ ማላታይ ኢስታ ቦላ ዲዛይታኔ ሄ ዶዓዛ ሚሲሌዛስ ጎይኒዳይታኔ ጊታ ማላታታ ኦꬂ ኦꬂዲ ኢስታ ባሌꬂሼ ጋምዒዴስ። ሄይቲ ናምዓቲ ዲኔ ጌቴቲዛ ታማን ኤፂዛ ታማ ኣባን ሃይቆንታ ፓፃ ዲሼ ዬጌቲዳ። [i] 21 ሃንኮ ኣቲዳይቲ ቃስ ቦꬃ ፓራ ቶጊዳይሳ ዱናፔ ኬዚዳ ማሻን ሃይቂዳ፤ ካፎቲካ ዉሪ ኢስታ ኣሾዛ ሚ ካሊዳ።

<- ዮሃኒሳ ኣጁታ 18ዮሃኒሳ ኣጁታ 20 ->