1 ቄሴታ ሃላቃ ጊዲ ሹሜቲዛዴይ ዳሮ ኣሳ ጊዶፌ ዶሬቴሲኔ ኣሳ ጊሽ ጊዲዲ ኢሞታኔ ናጋራ ጊሽ ያርሾ ሺሻናስ ዶሬቴስ። 2 ኢዚካ ባ ባጋራ ዳቡራንቻ ጊዲዳ ጊሽ ኤሮንታ ኣሳታሲኔ ኦጌ ባሊዳይታስ ቃꬌታና ዳንዳዬስ። 3 ኢዚ ባ ናጋራ ጊሺኔ ሃራ ኣሳታ ናጋራ ጊሽ ያርሾ ሺሻናስ ኢዛስ ቤሲዛይ ሄሳ ጊሻሳ። [a] 4 ኣሮኔይ ፄይጌቲዳይሳꬆ ኢዚ ፆሲ ፄይጊዳዴ ጊዳናስ ቤሴስ ኣቲን ሄሳ ሄ ቦንቾዛ ባርካ ባስ ኤኪዛዴይ ዴና። [b]
5 ሄሳꬆካ ኪርስቶሲ ቄሴታ ሃላቃ ጊዳና ቦንቾ ባርካ ባስ ኤኪቤና። ጊዶ ኣቲን
“ኔ ታ ናኮ፤
ታ ኔስ ሃች ኣዋ ጊዳዲስ”
ጊዳ ፆሳፌ ኤኪዴስ። [c] 6 ሄሳꬆካ ሃራሶን
“ማልኬፄዴቄ ሹሜታ ማላ
ኔኒ ሜርናስ ቄሴታ ሃላቃ” ጌስ። [d]
7 ዬሱሲ ሃይሳ ቢታ ቦላ ዲዛ ዎዴ ኢዛ ሃይቆፔ ኣሻና ዳንዳዪዛይሳኮ ኣፉንፂሼ ጊታ ቃላራ ዎሳ ዎሲዴስ። ኣዳፌ ኣሽኬቴꬃራ ኢዚ ኣዛዜቲዳ ጊሽ ኢዛ ዎሳ ፆሲ ሲዪዴስ። [e] 8 ኢዚ ፆሳ ና ጊዲኮካ ባ ኤኪዳ ዋዬዛፔ ኣዛዜቴꬅ ታማሪዴስ። 9 ሄሳ ባጋራ ፓጬይ ባይንዳዴ ጊዲ ቤቲዳይሳፌ ጉዬ ባና ኣዛዜቲዛይታስ ኡባስ ሜርና ኣቶቴꬃስ ጋሶ ጊዲዴስ። 10 ማልኬፄዴቄ ሹሜቴꬃ ማላ ቄሴታ ሃላቃ ጌቴቲ ፆሳን ሹሜቲዴስ።
ኣማኖን ሚናና ማላ ኢሜቲዳ ቆፍሶ