1 ኢንቴ ጊሺኔ ሎዶቂያን ዲዛይታኔ ሄሳꬆካ ታና ባ ኣይፌራ ቤዪ ኤሮንታ ኣሳ ኡባስ ታ ኣይ ማላ ባፄቲኮኔ ኢንቴ ኤራና ማላ ታ ኮያይስ። 2 ቃሴካ ኢስታ ዎዝናይ ሚናና ማላኔ ኢስቲ ሲቆቴꬃን ኢሶይ ኢሳራ ኦይኬታና ማላ ኩሜꬅ ጊዲዳይሳ ዩሺ ቆፒ ኤሮ ዱሬቴꬅ ዴሚዲ ፆሳ ፁራ ጊዲዳ ኪርስቶሳ ኢስቲ ኤራና ማላ ታ ዳፌታይስ። 3 ቆታን ዲዛ ጪንጫቴꬂኔ ኤራቴꬃ ሃሮይ ዉሪካ ቤቲዛይ ኪርስቶሳ ኣቻና። 4 ኦኒካ ኢንቴና ዱና ማልዔꬆን ባሌꬆንታ ማላ ታ ኢንቴስ ዮታይስ። 5 ታ ኢንቴፌ ኣሾ ኣይፌን ሃካ ዲኮካ ኣያናን ኢንቴናራ ኢሲፌ ዳይስ። ኢንቴ ዎጋራ ዲዛይሳኔ ኢንቴ ኪርስቶሳ ሎዔꬅ ኣማኒዛይሳ ቤያዳ ታ ዳሮ ኡፋዬታይስ።
8 ኪርስቶሳን ፃጲዳዝ ጊዶንታ ኣሳ ዎጋኒኔ ጎዓይ ባይንዳ ሃ ኣላሜዛ ላፋ ዎጋን ኤቂዳ ኣሳ ኤራቴꬃኒኔ ጮ ሜላ ባሌꬆ ሃሳያን ኢንቴና ኦኒካ ዲዖንታ ማላ ናጌቲቴ። 9 ጋሶይካ ኩሜꬃ ፆሳቴꬅ ኢዛ ኣሳቴꬃን ዴስ። 10 ኢንቴካ ሃሪዛይታሲኔ ጎዳታ ኡባስ ሁዔ ጊዲዳ ኪርስቶሳን ኩሜꬅ ጊዲቴ።
11 ኢንቴ ኢዛን ቃፃሬቲዴታ። ሄሲ ሄ ቃፃራዚካ ናጋራ ጊዲዳ ኣሾ ቆፋ ዲጋናስ ኪርስቶሳን ሃኒዳይሳ ኣቲን ኣሳ ኩሼን ሃኒቤና። 12 ፂንቃታን ኢዛራ ኢሲፌ ሞጌቲዴታ። ኢዛ ሃይቆፔ ዴንꬂዳ ፆሳ ዎልቃን ኣማኒዲ ቃሴካ ኢዛራ ኢሲፌ ዴንዲዴታ። [a] 13 ኢንቴ ካሴ ኢንቴ ሞሮኒኔ ኢንቴ ኣሾ ናጋራ ሃኖቴꬃ ኢንቴፌ ዲጎንታ ኣጊዳ ጊሽ ሃይቂዳይታኮ ሺን ፆሲ ኢንቴና ኪርስቶሳ ባጋራ ፓꬂዴስ፤ ኢንቴ ናጋራካ ኡባ ኣቶ ጊዴስ። [b] 14 ካሴ ኑና ሞቲሼኔ ኑናራ ኤቄቲሼ ዲዛ ሙሴ ዎጋን ኣጮ ሞቶስ ፃፌቲዳይሳ ቁጪ ዲጊዴስ። ማስቃሌ ቦላ ቶርጊዲ ኑ ቦላፌ ዲጊዴስ። 15 ሃላቃታኔ ጎዳቲዛይታ ጎዳቴꬅ ኢስታፌ ዎꬂ ኤኪዲኔ ማስቃሌ ቦላ ሃይቂዲ ፆኒ ዴንዲዲ ዲዔቲዳይታ ቆንጬን ዩሺ ቤሲዴስ።
16 ሄሳ ጊሽ ሙሳን ዎይኮ ኡሻን፥ ኢሲፌ ቦንቾን ዎይኮ ኣጊና ፄሮኒኔ ሳምባታ ጋላስ ቦንቾ ጊሽ ኢንቴ ቦላ ኦኒካ ፒርዶፎ። [c] 17 ሄይቲ ዉሪካ ቡሮ ያና ሃኖታስ ኤሾታ ጊዲሺን ዋና ኣሳቴꬃይ ጊዲኮ ኪርስቶሳ። 18 ቤሶንታ ኣሽኬቴꬂኔ ኪታንቻታስ ጎይኖ ዶሲዛ ኣሲ ኦኒካ ኢንቴና ꬉጲዲ ሜላ ኣሾንታ ማላ ናጌቲቴ። ሄሳ ማላ ኣሲ ባ ቤዪዳ ኣጉሞስ ዎጋይ ባይንዳ ባና ናሺሼ ሃዳ ኣሾ ቆፋን ኩሚዲ ኦቶሬቴስ። 19 ሄሳ ማላ ኣሳስ ሁዔ ጊዲዳ ኪርስቶሳራ ኣይኮ ጋይቶቴꬂካ ዴና። ኩሜꬃ ኣሳቴꬅ ሻያኒኔ ኮልꬔ ጋꬂ ኦይꬄꬂ ዲቺዛ ሁዔይ ኪርስቶሳ። ፆሲ ኪርስቶሳ ኣሳቴꬅ ኩሜꬅ ዲቺዛይ ሄሳ ማላና። [d]