1 ታ ኢሻቶ! ካሴ ኑ ኣዋቲ ሻራይ ኢስታፌ ቦላራ ጊዲዲ ካሌꬂዳይሳ ማላኔ ኢስቲ ዉሪካ ዞዖ ኣባ ፒኒዳይሳ ታ ኢንቴና ቆፒሳናስ ኮያይስ። [a] 2 ኢስቲ ሙሴራ ጊዳናስ ጊዲ ሻራኒኔ ኣባን ፃማቄቲዳ። 3 ዉሪካ ኢሲ ኣያና ቁማ ሚዳ። [b] 4 ዉሪካ ኢሲ ኣያና ኡሺ ኡዪዳ። ኢስቲ ኡዪዳይካ ባና ካሊዛ ኣያና ዛላፌ ፑልቲዳይሳፌ። ሄ ዛላይካ ኪርስቶሳ። [c] 5 ጊዶ ኣቲን ፆሲ ዳሮታን ኡፋዬቲቤና። ሄሳ ጊሽ ኢስታ ኣሃይ ባዞን ኩንዲ ኣቲዴስ። [d]

6 ኢስቲ ኢታ ሚሽ ኣሞቲዳይሳꬆ ኑካ ኣሞቶንታ ማላ ሄ ኢስታ ሃኖይ ኑ ናጌታና ማላ ኑስ ሌሚሶ ጊዲዴስ። [e] 7 “ዴሬይ ማናሲኔ ኡያናስ ኡቲዴስ፤ ዬፃናስካ ዴንዲዴስ” ጌቴቲ ካሴ ጌሻ ማፃፋን ፃፌቲዳ ማላ ኢስታ ጋርሳፌ ኢሲ ኢሲ ኣሳቲ ኦꬆይሳꬆ ኢንቴካ ኤቃ ጎይኒዛያታ ጊዶፒቴ። [f] 8 ኢስታ ጋርሳፌ ኢሲ ኢሲ ኣሳቲ ላይማቲዲ ኢሲ ጋላስ ናምዑ ታማኔ ሄꬑ ሺ ኣሳይ ዲፒ ጊ ዉሮይሳꬆ ዉሮንታ ማላ ኑካ ኣኔ ላይማቶኮ። [g] 9 ኢስታ ጋርሳፌ ኢሲ ኢሲ ኣሳቲ ጎዳ ፓጪዲ ሾሻን ዱኬቲ ሃይቂ ꬋዪዳይሳ ማላ ኑካ ኣኔ ጎዳ ፓጮኮ። [h] 10 ኢስታ ጋርሳፌ ኢሲ ኢሲ ኣሳቲ ዙዙሜቲዲ ꬋይሲዛ ቦሻ ኪታንቻን ꬋዪዳይሳꬆ ኢንቴካ ꬋዮንታ ማላ ዙዙሞፒቴ። [i]

11 ሄሲ ዉሪ ኑስ ሌሚሶ ጊዳና ማላ ኢስታ ቦላ ጋኪዴስ። ዎዴ ዉርሴꬃን ዲዛ ኑስ ቲሚርቴ ጊዳና ማላ ኑስ ፃፌቲዴስ። 12 ሄሳ ጊሽ ታ ሚና ኤቃ ዳይስ ጊዛዴይ ዲኮ ኩንዶንታ ማላ ባሲ ናጌቶ። 13 ኣሳ ቦላ ጋኪዳ ፓጬፔ ሃራ ኣꬊዛ ፓጬይ ኢንቴ ቦላ ጋኪቤና። ፆሲ ኣማኔቲዛ ፆሴ ጊዲዳ ጊሽ ኢንቴ ዳንዳዮንታ ኢንቴ ዎልቃፌ ቦላራ ኢንቴ ፓጬቴና ማላ ኢዚ ኢንቴና ኣጋጌና። ጊዶ ኣቲን ኢንቴ ፓጬቲዛ ዎዴ ሄ ፓጬዛ ኢንቴ ዳንዳያና ማላ ዎልቃ ኢሚዲ ፓጬፔ ኢንቴ ኬሲ ኤካና ኦጌ ኢዚ ኢንቴስ ጊጊሳና።

14 ሄሳ ጊሽ ታ ሲቆቶ! ኤቃስ ጎይኖፒቴ፤ ኢዛፔ ሃኪቴ። 15 ታ ኢንቴስ ሃይሳ ጊዛይ ዎዝናማ ጊዲዳ ጊሻሳ። ሄሳ ጊሽ ታ ዮቲዛይሳ ኣኔ ኢንቴ ኢንቴርካ ፒርዲቴ። 16 ኑኒ ፆሳ ጋላቲዲ ኤኪዛ ኡሻይ ኪርስቶሳ ሱꬃራ ጋጎቴꬂ ዲዛይሳ ጊዴኔ? ሄሳꬆካ ኑ ባꬂ ባꬂ ጊሼቲ ሚዛ ኡኬꬃይ ኪርስቶሳ ኣሾራ ጋጎቴꬂ ዲዛይሳ ጊዴኔ? [j] 17 ኡኬꬃይ ኢሲኖ ጊዲዳ ማላ ኑኒካ ዳሮ ጊዲ ኡቲዲካ ዉሪካ ኢሲ ኣሾ። ኑ ዉሪካ ኢሲ ኡኬꬃዛ ጊሼቲ ሞስ።

18 ኣኔ ኢንቴ ኢስራዔሌ ናይቲ ኦꬂዳይሳ ቆፒቴ። ሺቅዛ ያርሾዛፔ ሚዛይታስ ያርሾይ ሺቅዛሶራ ጋጎቴꬂ ዴኔ? [k] 19 ሂስቲን ኤቃስ ያርሼቲዳ ያርሾ ጊዲን ዎይኮ ኤቃይ ባ ባጋራ ጎዓራ ዴስ ጋዚና? 20 ጊዴና! ኣማኖንታ ኣሳይ ሺሺዛ ያርሾይ ፆሳስ ጊዶንታ ፃላዔሳ። ኢንቴስ ፃላዔራ ኢሲፌቴꬂ ዳና ማላ ታ ኮዪኬ። [l] 21 ፃላዔ ኡሺኔ ጎዳ ኡሺ ኢንቴ ኢሲፌ ጋꬂ ኡያና ዳንዳዬኬታ። ጎዳ ማዳፌኔ ፃላዔ ማዳፌ ጋꬂ ማና ዳንዳዬኬታ። 22 ኑኒ ጎዳ ሃንቄꬂኖ? ኑ ኢዛፔ ሚኒዞኒ? [m]

23 ዉሪካ ታስ ኢሜቲዴስ ሺን ዉሪካ ታና ጎዒዛዝ ጊዴና። ዉሪካ ታሳ ሺን ዉሪካ ታና ማዴና። [n] 24 ኣሲ ዉሪካ ባ ላጌ ጎዓናዝ ጋꬂ ፄሎ ኣቲን ባና ጎዓናዝ ፃላላ ኮዮፖ።

25 ጊያን ባይዜቲዛ ኣሾ ዉርሲ ሲꬌይ ባይንዳ ሚቴ። 26 ቢታይኔ ቢታ ቦላ ዲዛይ ዉሪካ ጎዳይሳ።

27 ኣማኖንታ ኣሲ ኢንቴና ባሶ ፄይጊዲ ሺሺዳ ካꬅ ዉርሲ ኣይኮካ ሲꬎንታ ሚቴ። 28 ጊዶ ኣቲን ኢሳዴይ “ሃይሲ ኤቃስ ያርሼቲዳ ካꬃ” ጊኮ ሄ ካꬃ ሄ ኣዴዛ ቆፋ ጊሺኔ ኢንቴና ሲꬊሲኮ ሞፒቴ። 29 ታ ኢንቴስ ሄሳ ጊዛይ ሄ ዮቲዳዴ ቆፋ ጊሽ ጋዲስ ኣቲን ኢንቴ ቆፋ ጊሽ ጋቤይኬ። ታ ፂሎ ጊዳ ዲሺን ኣዛስ ሃራ ኣሳ ቆፋ ጌዶን ታ ቦላ ፒርዴቲዜ? 30 ታ ፆሴ ጋላታዳ ሚዛዴ ጊዳ ኡታዳ ኣዛስ ሃራ ኣሳን ፒርዴቶ?

31 ሂስቲኮ ኢንቴ ኣይ ሚኮካ፥ ኣይ ኡዪኮካ ዎይኮ ኣይኮ ኦꬂኮ ዉርሲካ ፆሳ ቦንቾስ ኦꬂቴ። 32 ኣይሁዳ ኣሳስ ጊዲን ኣይዛቤታስ ጊዲን ዎይኮ ፆሳ ዎሳ ኬꬃስ ኦናስካ ꬉጴ ጊዶፒቴ። 33 ታ ኣስ ዉርሳካ ኣይ ኦጌራካ ኡፋይሳና ኮዪዛ ማላ ኢንቴካ ሄሳꬆ ኦꬂቴ። ዳሮቲ ኣታና ማላ ታ ታና ጎዒዛዝ ጊዶንታ ኢስታ ጎዒዛዝ ኮያይስ።

<- 1 ቆሮንቶሴ 91 ቆሮንቶሴ 11 ->