1 Io hua, i tahut bia ira kati muat na mur ira linga maram naliu kaia tane Karisito ing i kis taar kaia tano tamat na kinkinis tano sot na lima Kalou, kanong Kalou i ta hatut pakur muat ma Karisito. 2 Muat na hatur ira numuat lilik ta ira linga maram naliu, ma pataia bia ta ira linga makai tano ula hanua. 3 Kanong warah, muat gata maat, ma ira numuat mangana nilon kaiken i kis susuhai tikai ma ne Karisito ra matmataan ta Kalou. 4 Ma bia Karisito nong no burena tano numuat nilon na hanuat puasa, io, ta iakano pakana bung muat mah, muat na hanuat puasa tikai ma ia ma ra tamat na minamar.

5 Io hua, i tahut bia muat na bing sasei ira numuat mangana tintalen gar ta iakan ra ula hanua. Muat na bing sei ira magingin na hilawai ma ira bilingana magingin ma kaikek ra mangana masmasingan, ira sakana nemnem ma no magingin na mangaha ta ira linga gar na mesa. Ma iakano magingin na mangaha i haruat ma no magingin na lotu tupas ira palimpua. 6 Kaiken ra mangana magingin no burena bia no ngalngaluan ta Kalou na puka burung diet ira mangana tunatuna hua.*Ari tuarena pakpakat diet tangai balik hoken: Kaiken ra mangana magingin no burena bia no ngalngaluan ta Kalou na puka burung ira tabuna taram nianga. 7 Muat mah, muat git tatalen hua ta ira numuat ngaas na nilon ing muat ga lon hua naluai. 8 Senbia kaiken i tahut bia muat na kap sei kaiken ra tintalen bakut talur muat. Muat na kap sei ira mangana ngalngaluan ma no sinisip wara hangungut ira mesa, no magingin na tangtangai hagawai tikai, ma muat na bul sei ira nianga na harhuli talur ira ha muat. 9 Waak muat bisbis harbasianei muat kanong muat ta kap sei ira numuat tuarena nilon tikai ma ira nuna tintalen, 10 ma muat ta sigam no sigara nilon nong Kalou i sala hashasigarina ia hoing tiga malalari ne Kalou at nong ga hakisi iakano nilon. Ma i sala hashasigarina ia hua waing muat naga nunurei timaan ia. 11 Ma ta iakan ra sigara nilon, ira Iudeia ma diet ing pai Iudeia diet, diet haruat mon. Diet ing di ga kut sei ira palatamai diet, ma diet ing pa di ga kut sei, diet haruat mah. Ma i ngan hua mah ta ira tultulai ma diet ing pai tultulai diet. Ma bia da nas hanapu uga kanong uga ma tapaka ma a mesa uga, taia ta linga. No tamat na linga, Karisito sena mon, ma bia i kis ta dahat bakut.

12 Muat ira tunatuna ing Kalou gata pilak muat, ma muat ira halhaliana tunatuna ing Kalou i sip muat. Io hua, i tahut bia muat na sigam no magingin na bala marmaris uta ira tinirih i ubal ira mesa, ma no magingin na gilgil ra tahut ta ira mesa mah. Muat na bul hanapu habalin muat, ma muat na lon hoing ira matien na tunatuna, ma pa muat na ngalngaluan gasien. 13 Muat na balak ira mesa ing diet gil harango muat ma muat na lik luban sei harbasianei ta muat ira linga muat kilinganei bia di hagawai muat manei. Hoing no Watong ga lik luban sei ira numuat sakena, muat mah muat na gil hua. 14 Ma no magingin na harmarsai, muat na sigam ia naliu ta kaiken ra tintalen bakut. No magingin na harmarsai, ia nong i his tikanei diet bakut bia diet na kapawena tutun at tano nudiet tuntunur tikai.

15 I tahut bia no malum ta Karisito na kurei ira numuat nilon. Hokaiken, Kalou ga tatau muat tano numuat kinkinis na tuntunur tikai bia muat na kis ma ra malum harbasiai ta muat. Ma muat na tangtanga tahut tupas ia. 16 I tahut bia no nianga ta Karisito na manga kis dadas ta ira bala muat. Hua, muat naga hausur ma muat na pir hargilasanei muat ma ira mintota bakut ma ira mangana halhaliana nirudu mah. Ma ing bia muat na rudu hua, muat na tanga tahut uram ta Kalou maram narako ta ira bala muat. 17 Ma asa ing muat tangai ma asa ing muat gil, muat na gil hoing i takodas bia nong i mur no Watong Iesu na tatalen hua. Ma ing muat lonlon hua, i tahut bia tano numuat kinkinis ta Karisito, muat na tanga tahut ta Kalou no adahat Sus.

18 Muat ira hahina, muat na hanapu habalin muat manapu ta ira numuat tunaan kanong iakan tiga takodasiana magingin haruat ma no numuat kinkinis narako tano Watong.

19 Muat ira tunaan, muat na manga marsei ira numuat hahina ma waak muat bala ngungut taar ta diet.

20 Muat ira bulu ma ira hinasik, muat na taram ta ira amuat sus ma ira puasi muat ta ira mangana linga bakut kanong iakan ra magingin i haguama no Watong.

21 Muat ira tata, waak muat hamalmalaas ira nati muat, kaba diet gi kalalai ira numuat hartulai.

22 Muat ira maris na tultulai, muat na taram ta ira numuat tamat makai napu ta ira linga bakut. Waak muat taram ta diet tano pakana bung sena mon ing diet ngok taar ta muat bia diet naga guama. Taia. Muat na taram ta diet ma ra tutun na bala muat tano numuat tamat na urur tupas no Watong. 23 Ma asa ing muat gil, muat na gil ia ma no numuat dadas bakut hoing bia muat gilgil ia tupas no Watong, ma pataia bia tupas ira tunatuna mon. 24 Ma i tahut bia muat na gil hua kanong muat nunurei bia muat na hatur kahai iakano pinlawe muat maram tano Watong hoing ra hunuena no numuat mangason. Io, Karisito no Watong nong muat papalim utana. 25 Siga tikai nong i gil sakena na kap ra harkul haruat ma no nuna sakena. Kalou na tar ra takodasiana harkul. Pa na habilainei tikai ma na hagawai bia tiga mesa.

<- KOLOSE 2KOLOSE 4 ->