KOLOSE

I nanaas bia Pol ga kis ra hala na harpidinau kinas Rom ing ga pakat iakan ra pakpakat tupas diet ira Kolose tano hanua Esia (nas Apostolo 28.16-21). Ga pakat ira airua pakpakat tupas Pilimon ma ira Epesas ta iakano pakana bung mah. Pol pa ga so no lotu aras Kolose. I nanaas bia Epaparas ga hadadei no tahut na hinhinawas ta Pol kinas Epesas, gaam haan uras Kolose ma ga warawai kaia (Kolose 1.7-8 ma Apostolo 19.10). Pol ga pakat iakan ra pakpakat wara hatumarang diet ira Kolose ta ira tena hausur bisbis. Diet ga bisbis uta aring haleng na mangana linga. Diet ga bul hatamat aring mangana bung (Kolose 2.16) ma ira angelo (2.18). Diet ga nem bia ira tunatuna na kis manapu ta ira warkurai (2.21) ma no magingin na kut palatamaina tunatuna (2.11). Diet ga hatamat ira nudiet mangana lilik bia ia no mangana mintota i lam dahat tano nilon (2.4; 2.8; 2.18). Senbia Pol ga manga bul hatamat Karisito bia ia sena mon i haruat bia na halon ira tunatuna. Karisito no malalari ne Kalou (1.15). Karisito ga hakisi ira linga bakut (1.16). Karisito i balaurei ira linga bakut (1.17). Karisito no luena wara tuntunut hut talur ra minaat (1.18). Karisito i haruat ma Kalou (1.19; 2.9). Karisito na kap pukus ira linga bakut ukatika ta Kalou (1.20-22). Io hua, Karisito i tamat ta ira linga bakut ma i manga haruat wara halhalon dahat, ma iakan no suruna ta iakan ra pakpakat.

1-2 Iau Pol tiga apostolo ta Iesu Karisito haruat tano sinisip ta Kalou, ma Timoti no tasi dahat narako ta Karisito, mamir tulei ken ra nianga tupas muat ira mataniabar tus ta Kalou kaia Kolose, muat ira tena nurnur tano numuat kinkinis ta Karisito.

A harmarsai ma ra malum tupas muat maram ta Kalou no adahat Sus.

3 Mamir la tangtanga tahut ta Kalou no Sus ana no nudahat Watong Iesu Karisito ing mamir la saasaring uta muat. 4-6 Mamir tanga tahut hua tana kanong mamir ta hadadei uta ira numuat nurnur ta Iesu Karisito ma uta ira numuat harmarsai tupas diet bakut ira mataniabar gar ta Kalou. Ma muat la harmarsai ma nurnur hua kanong muat kis kahai ira haridaan i kis tagura taar uta muat aram ra mawai. Ma muat gata hadadei tar uta kaikek ra haridaan ing no nianga tutun ga haan tupas muat, ia no tahut na hinhinawas. Iakan ra tahut na hinhinawas i la huhuai ma i la hanahaan kakari tano ula hanua bakut, hoing gata gil hua kaia nalamin ta muat tur lah tano luena bung muat ga hadadei ia ma muat ga palai ta ira tutun tano harmarsai ta Kalou. 7 Ma no numehet bilai na harhis Epaparas nong i tur tikai ma mehet tano pinapalim ma a bilai na tena pinapalim ia ta Karisito wara gaia muat, ia nong ga hausur muat uta iakan. 8 Ia nong ga hasasei mamir utano numuat magingin na harmarsai nong no Halhaliana Tanua i ta tabar muat ma ia.

9 Kaiken ra linga, no burena bia pa mamir sangeh ma ra sinsaring wara uta muat tur lah tano bung mamir ga ser lah no hasahesa uta muat. Mamir la sarsaring Kalou bia na tabar muat ma ra tamat na mintota ta ira linga i haruat ma ira numuat nilon na tanua bia muat naga hung ma ra mintota utano nuna sinisip. 10-12 Ma mamir sasaring mah hua bia muat naga lon hoing i sip bia muat na lon hua ma bia ta ira linga bakut ing muat la gilgil muat naga haguama ia hoken: na mon hunuena ta ira numuat bilai na gingilaan bakut, muat na tahtahuat hanahaan ta ira numuat mintota utana, muat na kap ira dadas bakut haruat ma no nuna tamat na dadas sakit bia muat naga tur dadas ma pa muat na ngarau ta ira tirtirih, ma bia muat na tanga tahut tano adahat Sus ma ra gungunuama nong i ta harahut muat bia muat naga tale bia muat na kap no pinlawe muat tikai ma ira mataniabar tus ta Kalou ing diet kis taar tano madaraas. 13 Ma ia nong ga halon dahat talur no nudahat kinkinis manapu tano warkurai tano kankado ma ga hamaren dahat taar manapu tano bilai na warkurai tano Natina nong i manga sip ia. 14 Ma no Natina at nong ga kul halangalanga dahat ing ga lik luban sei ira nudahat magingin sakena.

15 Ma ia no malalari ne Kalou nong pa di la nasnas ia. Ia hoing no luena bulu kanong no nuna kinkinis i tamat sakit ta ira linga bakut ing Kalou ga hakisi. 16 Ma no nuna kinkinis i manga tamat hua kanong Kalou ga hakisi ira linga bakut ma no lima Karisito, ira linga aram ra mawai ma kai tano pisa, ira linga di nas ma ing pa di la nasnas, ma ira mangana tanua hokaiken: ira lualua ma diet ing diet manga dadas ma diet ing diet la warkurai. Diet bakut kaiken, Kalou ga hakisi diet ma no lima Karisito ma wara hatamat ia. 17 Karisito at ga kis manaluai ta ira linga bakut ma diet bakut diet kis timaan taar manapu tano nuna harbalaurai. 18 Ia no tamat na lualua ta ira mataniabar na lotu, ma diet no palatamaina. Ia no burena ta ira nudiet nilon kanong ia no luena wara tuntunut hut talur ra minaat, ma ga luena tut hut hua waing naga tamat sakit ta ira linga bakut. 19 Karisito i ngan hua kanong Kalou ga guama bia Karisito na hung ma ira bilai na linga bakut ing Kalou i la hung taar manei. 20 Ma tano pinapalim tano Natina, Kalou ga sip bia na kap pukus ira linga bakut balin ukaia hoing ia. Ga bul ra malum ma no gapi ne Karisito aram ra ula kabai, hua gaam kap pukus habal ira linga bakut, ira linga kai tano pisa ma aram mah ra mawai.

21 Naluai muat ga kis sisingen talur Kalou. Muat ga malentakuanei ia ma muat git gilgil ira magingin sakena. 22 Senbia kaiken Kalou i ta hamaraam lah muat ukaia hoing ia ma no minaat tano palatamai Karisito waing naga hatur muat ra matmataan tana ma muat na gamgamatien ma na taia um ta bilinga bia ta sakena ta muat. 23 Ma i tale bia muat na tur taar hua ing bia muat na manga tur dadas taar tano numuat nurnur tano tahut na hinhinawas ma ing bia pa muat na kakari talur no numuat nanaho ma ra nurnur uta ira linga muat ga hadadei tano tahut na hinhinawas. Ma iakan ra tahut na hinhinawas at nong di ga warawai ma ia tupas ira mataniabar kai ra ula hanua. Ma iau Pol, iau tiga tultulai ta iakano tahut na hinhinawas.

24 Ma iau guama kaiken uta ira ngunngutaan i ubal iau wara gaia muat. Ma iau puspusak kaiken ra ngunungut tano palatamaigu wara haphapataam ira ngunngutaan ta Karisito ing i kis taar baa. Ma iau la puspusak hua wara utano palatamaina, muat ira mataniabar na lotu. 25 Iau ta kap no pinapalim na harharahut uta muat ira mataniabar na lotu kanong Kalou ga tar no nuna pinapalim tagu bia ena gil ia haruat ma no nuna lilik wara hatahutnei muat ing iau ga hasasei muat ta ira nuna nianga bakut. 26 Ma iakan ra nianga nong ga susuhai ta ira tunatuna ta ira tintinahon manaluai ma senbia i ta hapuasnei um ta ira nuna mataniabar tus kaiken. 27 Kalou ga sip bia na hapalainei diet bia iakano linga nong ga susuhai na manga haidanei timaan diet ing pai Iudeia diet. Ma no suruna ta iakano linga nong ga susuhai, ia hoken, bia Karisito i kis taar ta muat, hua muat naga nanaho ma ra nurnur bia muat na laka tano tamat na minarina. 28 Ma mehet la warawai uta Karisito ta ira mangana tunatuna bakut. Mehet hausur diet ma mehet hatumarang diet ma ra tamat na mintota sakit waing diet bakut diet naga bilai sakit tano nudiet kinkinis narako ta Karisito ing mehet lam tar diet ra matmataan ta Kalou. 29 Ma iakanong no burena bia iau papalim dadas. Iau manga dadas haruat ma no nuna tamat na dadas ing i la manga harharahut iau ma ia bia ena gil hua.

KOLOSE 2 ->