1 Io, no luena linga tano nugu nianga i hoken. Iau haragat dahat bia dahat na sasaring uram ta Kalou uta ira tunatuna bakut, ma dahat na tanga tahut tana uta diet. 2 I tahut bia dahat na sasaring uta ira tamat na lualua sakit, ma diet ira mesa ing diet kap ra kinkinis na warkurai. Dahat na sasaring hoken waing dahat naga kap ra kinkinis na malum ma pada hagawai dahat, ing dahat lon mur Kalou ta ira magingin i takodas. 3-4 Io, ing bia dahat na sasaring hua, na tahut ma na haguama Kalou no nudahat Tena Harhalon, nong i nem bia na halon ira tunatuna bakut, ma bia diet bakut diet na nunurei ira tutuna i ta hapuasnei. 5-6 Ma i tale bia ena tangai hua kanong tiga kapawena God mon, ma tikai sena mon nong i lam ira tunatuna ukaia ta Kalou. Ma ia Iesu Karisito, a tunatuna ia, nong ga tar habal ia wara kulkul halangalanga ira tunatuna bakut. Ma tano pakana bung haruat tano nemnem ta Kalou, Karisito ga gil hua, ma ga sura haut bia Kalou i nem bia na halon ira tunatuna bakut. 7 Iakan no burena bia Kalou ga pilak iau bia ni apostolo ma ni tena warawai ta diet ing pai Iudeia diet. Ma iau ga haan bia ni hausur diet bia diet na nurnur ta ira tutuna Kalou i ta hapuasnei. Iau tangai ra tutun! Pa iau bisbis!

8 Io, uta ira sinsaring um, iau nem bia ira tunana ta ira sibaan bakut diet na sasaring. Ma bia diet na tatik ira gamgamatien na lima diet, na tahut bia diet na gil ma pataia ta ngalngaluan bia ta hargau.

9 Ma hua mah ira hahina. Iau nem bia ira hahina diet na sigasigam hoing ira mes na tunatuna bia. Waak diet manga hamar ira hi diet. Ma waak diet hamar habal diet ma ra gol bia ra tulur a kalagi, bia ra sigasigam ing a tabi matana. 10 Senbia iau nem bia diet na hamar habal diet ma ira bilai na tintalen haruat ma ira mangana hahina ing diet tangai bia diet lotu tupas Kalou. 11 Ma bia ira hahina diet na kap ra hausur, io, i tahut bia diet na kis matien ma diet na hanapu habal diet. 12 Pa iau haut bia tiga hahina na hausur bia na kurei tiga tunaan. Na kis matien mon. 13 Warah, kanong Kalou ga luena hakisi Adam, ma namur, ne Iwa. 14 Ma pai Adam nong Satan ga lam habisbis lah ia. Taia. Satan ga lam habisbis lah no hahina, hua no hahina gaam lakai no warkurai ta Kalou. 15 Ma senbia Kalou na halon ira hahina ing bia diet gil hoken: diet na kakaha, ma diet na nurnur hatikai tikai ma ra harmarsai hargilaas, ma diet na mur ira magingin ing i bilai ma i takodas.

<- 1 TIMOTI 11 TIMOTI 3 ->