A bar hanawaan baak ma Israel diet nurnur kanong God i te gilamis diet tano uno harmarsai.
1 Io kaik um, iau tiri bia, hohe, i nanaas bia God ga malok ise ira uno matanaiabar? Taie tun at! Iau at, iau tiga Israel. Iau tiga bulumur ta Abraham ma iau tano huntunaan ta Beniamin. 2-3 God pa ga malok ise ira uno matanaiabar ing gate huna bul no uno lilik uta diet wara nunure um diet. Hohe, muat pai nunure iakano subaan utane Elaija narako ta ira Halhaliana Pakpakat? Ga bala ngungut taar ta ira Israel, kaik gaam tange ta God bia, “Nora Watong, diet te bu bing ira num tangesot ma diet te dure hasur mah ira num suuh na hartabar. Iau sen um tikai ken ma diet sisilih tagu kaiken bia diet na bu bing iau mah.”4 Io, ma no Watong ga balui hohe? Ga tange bia, “Iau te bul se tar wara nugu a liman ma iruo na arip na tunotuno ing diet pai le singa bukunkek taar tane Baal no sakana tanuo.”5 I huo mah katin. A bar hanawaan i kis sen mon baak haruat ma ing God i te gilamis diet ma no uno harmarsai. 6 Ma bia i te gilamis diet huo tano uno harmarsai nong i te tabar bia diet mei, io, i palai bia no uno gilgilamis pai tahuat laah ta ira udiet gingilaan. Ma sen ing bia gor te gilamis diet ta ira udiet gingilaan, io, no uno harmarsai pa gor ngan bia a hartabar bia ie.
7 Io kaik, i palai bia iakano mangana kinkinis ing Israel ga manga sisilih panei, diet pa ga hatur kawasei. Iesen diet ing God ga gilamis diet, diet ga kap leh ie. Ma diet ira mes na Israel, God ga hadadas ira bala diet kaik pa gom tale bia diet na kap leh ie. 8 I hoing bia no nianga ta God di ga pakat ie i tange bia,
“God ga hababa ira udiet lilik.
Ga harawarawa ira mata diet bia diet pa na nesnes kilam.
Ma huo mah ta ira talinga diet bia pa na hanhadade kilam.
Ma i te gil huo ta diet tuk taar ta iakan at ra bung.”
9 Ma Dawit i tange bia,
“Ira linge gor haguama diet hoing ira nian tano ula suuh i haguama tikai, io, iau sasaring bia nu papalim ma kaike ra linge wara hakhakuni balik diet ma wara lulut leh diet.
Iau sasaring bia kaike ra linge na gungunuama na hapuko diet ma bia nu papalim ma kaike ra linge wara balbalu pukus diet.
10 Iau sasaring bia ira mata diet na kankado waing diet pa naga nanaas palai.
Ma iau sasaring mah bia diet na rurungo hathatikai.”
Diet ing diet pai Israel diet te kap no mauho ta ira Israel tano harhalon ta God.
11 Io kaik um, iau tiri bia, hohe, ira Israel diet ga manga puko sakasaka? Taie tun at! Diet ga gil ronga, ma iakano no burena bia no harhalon balik gom haan taar ta diet ing diet pai Israel. Ma i te haan taar huo waing ira Israel diet naga nes kalak no kinkinis ta diet ira mes. 12 Iesen bia no udiet nironga i hatahuat ra tamat na haridaan taar tano ula hanuo ma bia no udiet punuko i hatahuat ra tamat na haridaan taar ta diet ing diet pai Israel, io, a tamat na haridaan sakit bilang na hanuat ing diet ira Israel diet na laka bakut taar tano udiet bilai na kinkinis tus.
13-14 Ing iau iangianga mah huo iau iangianga ta muat at, muat ing muat pai Israel. I palai bia iau tiga apostolo ta muat ing muat pai Israel. Ma iakano no burena bia iau hatamat no nugu pinapalim kanong iau sip bia nigi silhe tiga mangana ngaas bia nigi hamangaah diet wara nesnes kalak no numuat mangana kinkinis huo, kaik nigi halon tari ta diet. 15 Ma ing God ga malok ise diet, iakan i hatahuat no haramaraam ma God tika ma ra halengin ta diet tano ula hanuo. Bia iakan i tutun huo, io, a mangana linge sa na hanuat ing God na bale leh diet? Na ngan hoing bia ira minaat diet na kap no nilon!
16 Io, ma bia ing nu tar no luena subana beret ta God, io, auno mah no kidilona hunghungaan bakut. Huo mah, bia ing nu tar no boline tiga daha ta God, auno mah ira katena bakut. 17 Ma i te ngan ta muat hoing di la gilgil ira ina olip. Di te warat ise ari a katena ma di te hapatup muat tar balik tano ina olip tun tika ma diet ira mes na katena ing diet tur baak tana. A tutun bia muat tano mangana ina olip pa di ga soi, iesen di te hapatup tar at muat huo. Ma kaiken um muat lon taar tano tirine no ina daha ing i hanuat mekaia tano bilai na boline. 18 Io kaik, waak u nes hanapu diet ira katena ing di te warat ise. Bia u lilik huo, nu lilik timaan kaiken, bia pai augu u hakasong no boline, iesen no boline i hakasong ugu. 19 Ing bia i te ngan huo ta muat, tikai ta muat na tange bia, “Di te warat ise kaike ra katena waing daga hapatup leh iau.” 20 Iakano i tutun. Iesen di te warat ise diet kanong diet pa ga nurnur. Huo mah, no numuat nurnuruan aie nong i hatur muat. Io kaik, waak muat hatamat habaling muat, iesen muat na burburut. 21 Kanong warah, ing bia God pa ga hok ira katena no olip tun, pa na hok mah muat ira mes.
22 Io kaik um, muat na lilik timaan bia God i gil ra but na tahtahut ma i tar ra dadas na harpidanau mah. Ga manga hapidanau diet ing diet ga puko iesen i te gil ra but na tahtahut taar ta muat. Iesen na ngan sen mon huo ta muat ing bia muat la kiskis taar narako ta iakano uno harmarsai. Ma ing bia muat pa na gilgil huo, muat mah, kabi di warat ise muat. 23 Ma diet mah, ing bia diet pai la murmur no magingin na tabuna nurnur, io, God na hapatup habaling diet kanong i tale at bia na hapatup habaling leh diet. 24 Ma i palai bia iakano i tutun kanong di te warat ise ugu tano num ina olip tus nong pa di ga soi. Ma di ga hapatup ugu ukaia taar tano ina olip ing di ga soi nong pai num tus ie. Ma i dadas bia tikai na gil huo. Io kaik, na manga malus bia da hapatup habaling leh ira katena tutun ukaia tano udiet ina daha tus!
God na halon no huntunaan ta Israel.
25 Bar hinsakagu ta Krais, iau malok bia muat na lik hatamat muat, kaik iau sip bia ni hapalaine muat uta iakan ra linge nong ga susuhai taar nalua ma God i te hapuasne um, ma i hoken, bia ta ira haleng sakit ta ira Israel, God i te hadadas ira bala diet kaik diet pa gom nurnur, ma sen pai diet bakut. Ma na ngan huo taar ta diet tuk taar bia no kidilona winawas bakut ta diet ing diet pai Israel na laka um. 26 Io kaik, hokaiken God na halon no huntunaan ta Israel. I hoing bia no nianga ta God di ga pakat ie i tange bia,
“No Ut na Harhalon na hanuat meram Saion,
ma na kap se no magingin na turtur talur God sukun no huntunaan ta Iakop.
27 Ma no nugu kunubus tika ma diet i hoken:
ta iakano pakana bung iau ni kap se ira udiet magingin sakena.”
28 Ing bia da nes no hinahaan tano tahut na hinhinawas, da nes kilam bia diet ira Israel diet te kap no kinkinis na malentak talur God wara hatahutne muat. Iesen bia da nes no gilgilamis ta God, da nes kilam bia God i manga sip diet kanong diet te tahuat laah ta kaike ra tamat na hintubu diet. 29 Ma iakan i palai kanong God pa na kap pukus ira uno hartabar, ma diet ing i tatau leh diet, pa na harus ise habaling diet. 30 Hokaiken, muat mah, tiga pakana bung, muat ga tabuna taram nianga ta God. Iesen kaiken um muat te hatur kawase nora harmarsai kanong diet ga tabuna taram nianga. 31 Huo mah ta diet, kaiken diet te hanuat tabuna taram nianga waing diet mah diet naga hatur kawase nora harmarsai, iakano ra harmarsai ing na haan taar ta diet kaiken kanong God i te marse muat. 32 Hokaiken, God i te wis tar ira tunotuno bakut uta ira udiet magingin na tabuna taram nianga, waing naga marse um diet bakut.
No lilik ma no tintalen ta God i manga tamat sakit.
33 Ai! I tamat sakit ira bilai na linge ta God!
I manga kikil no uno mintot ma i manga keskes sakit wara gilgil no uno pinapalim!
Taie tikai i tale bia na palai bia God i bul no uno lilik huo warah!
Pai tale bia tiga nong na silhe ira uno ngaas!
34 Sige um tikai i te nunure tar no lilik gar tano Watong?
Ma i tale bia tikai na tar ra nianga na harharahut tana? Taie.
35 Sige um i te bul tar ra tinakum ta God bia God naga balu pukus ie?
36 Taie tikai pai gil huo tana kanong ira linge bakut ga tahuat laah tana ma aie nong i hatur hadadas ira linge bakut ma aie no hauhawatine ta ira linge bakut.
