Ninge 82

A ninge na lotu ta Asap.

1 [a]God i lualua taar tano tamat na kinkinis hurlungai.

I tar no harkurai nalamin ta ira kaba god.[b]

2 [c]Ma i tange, “Na haruat hunanges ing muat na hok diet ing diet pai gil ira takodasuana magingin,

ma haruat um hunanges bia muat na tur taar tano palpal ta ira ut na sakena?

3 [d]Muat na tur harahut ira maris ma ira tintana.

Muat na gil no magingin takodas ta ira maris ma ira malahahin.

4 Muat na harahut ira mahiuhiu na tunotuno ma diet ing diet mon sunupi.

Muat na halon diet sukun ira lima diet ira ut na sakena.

5 [e]Diet pai nunure ta linge,

diet pai palai ta tiga linge.

Diet goota bia tano kankado.

Ira burena bakut no ula hanuo i gunagune.

6 [f]Iau ga tange, ‘A god muat.’

Muat ira natine Nong i Naliu Harsakit.

7 Iesen muat na maat hoing ira tunotuno mon.

Muat na puko suur hoing ira kaba lualua bakut.”

8 God, tur hut, ma nu kure no ula hanuo,

kanong a num tus ira kantri bakut.