Ninge 78

A ninge ta Asap.

1 Ira nugu matanaiabar, i tahut bia muat na hadade ira nugu harausur.

Muat na taram ira nianga na hagu.

2 Iau ni papos no hagu ma ira nianga harharuat.

Ni hinawas ta ira linge menalua saakit ing dahat pai palai ine katin,

3 ira linge ing dahat gate hadade ma dahat gate nunure tar,

ing ira hintubu dahat diet gate hinawase tar dahat ine.

4 Dahat pa na suhe kaike ta ira udiet bulumur.

Dahat na hinawase diet ing diet na lon namur

ta ira pakpakilai tano Watong ing da pirlat ie urie,

iakano uno baso ma ira tamat na melmel na gingilaan na kinarup ing ga gil.

5 Ga hakisi ira harkurai utano huntunaan ta Iakop,

ma ga tar harausur ta Israel.

Ga tange hadadas ta ira hintubu dahat

bia diet na hausur ira nati diet uta kaiken ra linge,

6 waing diet ing diet na lon namur diet na nunure kaiken ra harkurai,

ma ira nat na bulu mah ing pa di kaha baak diet,

waing diet mah diet naga hapalaine ira nati diet.

7 Io kaik, diet naga so ira udiet nurnuruan ta God

ma diet pa naga luban ira uno gingilaan,

iesen diet na taram ira uno hartula.

8 Diet pa naga ngan ho ira hintubu diet,

a tabuna taram nianga ma ra tunotuno na patnau diet,

diet ing ira bala diet pa ga tutun uram ho God,

ma ira udiet nilon pa ga tur dikdikit taar tana.

9 Ira tunaan tano huntunaan ta Epraim, diet ga palim laplapot taar,

iesen diet ga tahurus tapukus tano bung na hinarubu.

10 Diet pa ga mur no kunubus ta God

ma diet ga malok bia diet na lon mur ira uno harkurai.

11 Diet ga luban ira linge ga gil,

ira tamat na melmel na gingilaan na kinarup ing ga haminas ta diet.

12 Ga gil ira dadas na gingilaan na kinarup ra matmataan ta ira hintubu dahat

kaia tano taman Zoan narako tano hanuo Isip.

13 Ga paleng no tes ma gaam lam habalosne diet.

Ga gil no taah, gaam tur kis hoing tiga balo.

14 Ga lamus diet ma no katona bahuto ra kasakes

ma no murarang tano iaah tano kudulena bung ra bung.

15 Ga parok ira haat ram narako tano hanuo bia,

ma ga tabar diet ma ra taah ing ga labon hono tes.

16 Ga tar no taah, gaam saal laah tano ula haat,

ma ga saal suur ho ira taah saal.

17 Iesen kana at diet git gilgil ira sakana magingin tupas ie,

ma ram narako ra hanuo bia, diet git patnau taar at ta Nong i Naliu Harsakit.

18 Diet ga sip at bia diet na walar God,

ing diet ga manga saring ie utano nian diet ga manga kalak.

19 Diet ga ngurungur taar ta God, diet gaam tange,

“I tale bia God na bul hawaat ta nian kai ra hanuo bia?

20 Ing ga lawat no haat, no taah ga raronga suur,

hoing ira laman taah di hasapang.

Iesen i tale bia na tabar mah dahat ma ra nian?

I tale bia na tar ginama mah ta ira uno matanaiabar?”

21 Ing no Watong ga hadade diet, ga manga ngalngaluan.

No uno iaah ga lulungo suur taar tano huntunaan ta Iakop,

ma no uno kamahar ga hanuat tamat taar ta Israel,

22 kanong diet pa ga nurnur ta God

ma diet pa ga so no udiet nurnuruan tana bia na halon diet.

23 Ma sen ga tar tiga hartula uram naliu ra hurmauhuo

ma ga papos ira matanakalangar tano mawe.

24 Ma ga hurange hasur ira mana ho ira bata taar ta ira matanaiabar wara ienien.

Ga tabar diet ma no pat na wit meram ra mawe.

25 A tunotuno diet ga ien no beret adiet ira angelo.

Ga tar se a haleng na nian haruat ma ira udiet sinisip.

26 Ga lapus ise no dadaip meram ra mawe makatiga ra kasakes i la tutut hut kaia,

ma ga lamus hawaat no taubar ma no uno baso.

27 Ga tule hasur ira ginama naliu ta diet ho ira kaabus,

kaike ra haleng na maan haruat ho ira wana tano wasasar.

28 Diet ga puko suur nalamin ta diet,

ma diet ga puko harbasia ta ira udiet palpalih.

29 Diet ga iaan tuk diet gaam hahos,

kanong gate tabar diet ma ira linge diet ga manga kalak.

30 Diet pa ga bing baak no udiet tamat na sinisip tano nian,

ma a nian baak kana ta ira ha diet,

31 ma no ngalngaluan ta God gaam hanuat taar ta diet.

Ga bing diet ira adiet tabi bolbol nalamin ta diet,

gaam kato hainoh ira subulo gar ta Israel.

32 Ga gil kaiken ra linge bakut, iesen kana at diet ga gilgil ira sakana magingin.

Kaiken ra dadas na gingilaan na kinarup ga hanuat, iesen diet pa gale nurnur tana.

33 Huo, diet ga hasurum bia ira udiet bung na nilon,

ma ira udiet tinahon ga pataam narako ra ramramin.

34 Ing bia God git bubu bing tari ta diet, diet git silsilihei.

Diet git lilik pukus, diet gaam git nanaas tana ma ra tutun.

35 Diet ga lik habaling leh bia God, aie no udiet Haatkis,

ma bia ne God Nong i Naliu Harsakit, aie Nong i Kul Halangalanga diet.

36 Ma sen bia diet ga harababo ma ira ha diet,

ma diet ga habatoi ma ira karame diet.

37 Ira udiet nilon pa ga tur dikdikit taar tana,

ma diet pa ga murmur timaan no uno kunubus.

38 Ma sen bia ga harmarsai,

ma ga lik luban se ira udiet magingin sakena,

ma pa ga haliare diet.

A haleng na pakaan ga palim kawase habaling no uno ngalngaluan,

ma pa ga hatatik no uno kudulena nginangar.

39 Ga lik leh bia a tunotuno mon diet,

hoing ra dipdip nong i pupuh saakit ma pa na tapukus baling.

40 Diet ga patnau hait taar tana aram narako tano hanuo bia,

ma diet ga gil hatapunuk ie kaia.

41 Hait diet git walwalar God.

Diet ga gil hangalngaluan no Halhaliana gar ta Israel.

42 Diet pa ga lik leh ira uno baso

tano bung ing ga kul halangalanga leh diet sukun ira adiet suk,

43 ing ga haminas ira hakilang ma ira dadas na gingilaan na kinarup

kenam narakoman tano hanuo Zoan, narakoman tano taman Isip.

44 Ga pukusane ira audiet taah gaam hanuat de,

ma pa ga tale bia diet na mom kaia ta ira adiet taah.

45 Ga tule ira haleng na langa, diet gaam hurut diet,

ma ra rokrok ing gaam haliare diet.

46 Ga tule tar ira ko ta ira audiet sinaso,

ma ira kubawa taar ta ira pakana ira udiet sinaso.

47 Ga tule a bata na ais, gaam haliare ira udiet ina wain,

ma ga haliare ira udiet ina papus ma ra tamat na madahon.

48 Ga tule tar mah a bata na ais taar ta ira udiet bulumakau,

ma a hile ga bing ira udiet sipsip ma ira me.

49 Ga tule no uno mamahien na ngalngaluan ma kamahar taar ta diet.

Ga malentakuane tunat diet, ma ga sip bia na hagahe diet.

Ga tule tiga matana ubane na angelo wara halhaliare diet.

50 Ga tagure tiga ngaas utano uno ngalngaluan,

ma pa ga hok tikai bia pa na maat.

Iesen ga tule tar no tamat na halhaliarai ta diet.

51 Ga bing ira matana bulu na tunaan ta ira Isip,

diet ira luena nati diet ira subulo mekaia narakoman ta ira udiet hala.

52 Iesen ga kap hasur ira uno matanaiabar hoing tiga huna sipsip,

ma ga lua ta diet nalamin tano hanuo bia.

53 Ga lue timaan diet waing diet pa na hiruo, ma diet pa ga burut,

iesen no tes ga takap bus ira udiet ebar.

54 Hokaiken kaik, ga kap hawaat tar diet tano gagena no uno halhaliana pise

uram ta ira uladih ing gate kap leh ma no kata na limana.

55 Ga pasak hasur se baak ira huntunaan mekaia

ma ga palau ira uno matanaiabar ma ira subaan na pise wara audiet tus.

Ga hakisi timaan tar ira huntunaan me Israel ta ira ngasia diet at.

56 Iesen diet ga walar God

ma diet ga patnau ta Nong i Naliu Harsakit,

ma diet pa ga mur ira uno harkurai.

57 Diet ga talingaan tapukus ma diet tur talur ie hoing at mon ira hintubu diet.

Diet ga haruat ma tiga laplapot di poroi tar mon mei.

58 Diet ga hangalngaluan ie ing diet ga lotu kaia ta ira uladih.

Ga likilik taar ta diet ma ira udiet kaba palimpuo.

59 Ing God ga hadade diet, ga manga ngalngaluan,

ma ga miliguruane tunat diet ira Israel.

60 Ga papook talur no hala na lotu kaia Sailoh,

iakano palpalih nong ga luk ie nalamin ta ira tunotuno.

61 Ga bale tar ira udahat ebar bia diet na palim kawase no bokis na kunubus

nong i hakilang no uno baso ma ira minarine.

62 Ga waak tar ira uno matanaiabar bia diet na hiruo ta ira wise na hinarubu.

Ga manga ngalngaluan taar ta ira uno tus.

63 A iaah ga tun bing ira audiet marawaan,

ma ira udiet bulahin pa ga inge ta ninge na tinolen.

64 A wise na hinarubu ga ien ira udiet ut na pakila lotu,

ma ira udiet makosa pa ga haruat bia diet na suah.

65 Kaik um, no Watong ga tangahun hoing tikai i kubaba taar,

hoing tiga dadas na tunotuno i mama wain taar ma i malurau baling um.

66 Ga pasak pukus ira uno ebar

ma ga hahirhir hatikane diet.

67 Io, ga was ise ira tunotuno ta Iosep,

ma pa ga gilamis no huntunaan ta Epraim wara uno.

68 Iesen ga gilamis leh no huntunaan ta Iuda

ma no uladih Saion, nong ga kalak ie.

69 Ga gil no halhaliana ngasiana bia na manga naliu,

haruat ma no ula hanuo nong ga hakisi tar ie ma pa na pataam.

70 I ga gilamis Devit no uno tultulai,

ma ga kap leh ie merau ra lip na sipsip.

71 Ga lamus leh ie mekaia hoing git balbalaure ira sipsip

waing na balaure ira uno matanaiabar, diet ira bulumur ta Iakop,

diet ira Israel, ira uno tus.

72 Ma Devit ga balaure diet ma ra takodasuana bala.

Ga lamus diet ma ira keskes na limana.

<- Ninge 77 Ninge 79 ->