Ninge 74

A ninge ta Asap.

1 God, wara bih u te malok se hatikane tar um het?

Wara bih no balaam i mis taar ta ira num sipsip narako tano num longlong?

2 Lik tar ira matanaiabar u ga kul pukus diet nalua saakit,

no huntunaan u tinane tar ie,

nong u ga halon leh ie sukun ira tinirih.

Lik tar no uladih Saion, no taman u la kis taar tana.

3 Ira ebar diet gate hagahe bakut ira linge kai tano hala na lotu.

Halilie pukus no num hinahaan ukai ta kaiken ra halhaliarai gabe kis um.

4 Ira am suk diet barangang tano katon u git haarso ma het kaia.

Diet hatur ira udiet hakilang kaia wara haminas bia diet te bul hasur het.

5 Diet tatalen hoing ira tunotuno diet baan taar ma ra matau

wara burburuh tiga matana daha.

6 Ma ra matau ma ra haasok

diet ga lau warat hasiksik ira bilai na daha di ga kasar ira balo me.

7 Diet ga hakarat no num hala na lotu ma i iaan bakut.

Diet ga hamamagune no katon nong het git lalotu tupas ugu kaia.

8 Narako ta ira bala diet, diet ga tange bia,

“Mehet na bu hasur hatikane diet.”

Diet ga tun bakut ira katon tano numehet hanuo ing het git haarso ma God kaia.

9 Pau hamines ta dadas na hakilang ta mehet,

taie mah um ta tangesoot,

ma taie tikai ta het i nunure tar bia iakan ra tinirih na haruat hunanges.

10 God, na haruat hunanges bia ira ebar diet na kukutur taam?

Ma ira am suk diet na tange haliare hatikane um no hinsaam?

11 Wara biha gu ras pukus leh no kata na limaam?

Palas leh ie mekaia ta ira kiniasim ma haliare diet.

12 Iesen, augu God, no nugu King menalua at.

U kap hawaat ra harhalon tano ula hanuo.

13 Augu kaik, u ga paleng harbasiane no tes ma no num dadas,

ma u ga parok mah ira uluno no tadaar kaia narako tano tes.

14 U ga pas parok no uluno no tamat na tadaar,

ma u ga tar no pala tamaine ho ira nian adiet ira wawaguai tano mamasina hanuo.

15 U ga papos ira puat ma ira katen taah,

ma u ga hamamasa ira taah tamat.

16 U la kurkure no kankado ma no madaraas mah.

U ga hakisi no kasakes ma no teka.

17 U ga igah ira linge bakut tano ula hanuo.

U gil no pakana bung na kasakes ma no pakana bung na labur mah.

18 Watong, lik leh ing ira num ebar diet ga kukutur taam,

ma ira ulba na tunotuno diet ga tange haliare no hinsaam huo.

19 Ira num matanaiabar, het haruat ma ira bun. Taie um numehet ta dadas. Huo, waak u tar se ira numehet nilon taar ta ira rakaia na wawaguai.

Waak bia nu luban hatikane se ira nilon audiet ira num matanaiabar narako ta ira nudiet ngunngutaan ing di pakile ta diet.

20 Lik kawase no num kunubus,

kanong ira kankado na katon tano numehet hanuo i hung ma ra haragawai.

21 Waak u bale leh ira tunotuno ing di ubal diet, bia diet na tahurus tapukus ma ra hirhir.

Io, na tahut bia ira maris ma ira malahahin, bia diet na pirlat ugu.

22 God, taman tut ma nu tur bat diet ing diet wara hagahe ira linge u sip bia nu gil.

Lik leh ing ira ulba diet kukutur taam huo tano kudulena bung.

23 Waak bia u lilik tatohun tano kunup na harangat ta ira am suk,

ma ta ira harat ta ira num ebar ing i kis hatika taar.

<- Ninge 73 Ninge 75 ->