72
A ninge ta Solomon.
1 1Kng 3:9God, hausur no king, waing naga bul harkurai haruat ma no num lilik,
ma bia na harkurai haruat ma no num takodasiana magingin.
2 Ais 9:5-7; 11:2-5Na kure ira num matanaiabar ma ra magingin takodas.
Ma na mur ira tutun na magingin ing na gil harkurai uta ira num matanaiabar ing ira mes di te helar ta diet.
3 Mai 4:3,4Ira uladih diet na huai timaan bia ira num matanaiabar diet naga kap ra bilai na lon,
ma ira nat na uladih diet na tar ira hunena no takodasiana magingin.
4 Ma nalamin ta ira matanaiabar, no king na tur harahut diet ing di hangungutaan diet,
ma na harahut ira nati diet ing diet mon sunupi,
ma na paas hasur ira ut na hinelar.
5 Nng 72:17; 89:36,37Na tahut bia diet na ru ugu haruat ma ing no kasakes ma no teka dir murarang baak
ta ira pakana bung hathatikai.
6 2Sml 23:4No king na haruat hoing no bata i pukpuko taar tano katon na pise di te kato sare tar ie,
ma hoing ra mimis na bata i kapal no pise.
7 Ais 2:4Ta ira uno pakana bung ira ut na takodas diet na hatur kawase ra bilai na kinkinis saakit.
Ma ra bilai na nilon na kis hatika taar tuk bia no teka na panim laah.
8 KBk 23:31; Sek 9:10No king na harkurai ta ira kaba katon na pise bakut nalamin ta ira tes,
ma mekaia ra Taah Iuperetis tuk taar tano hauhawatine no ula hanuo.
9 Ira kaba hunhuntunaan mekaia ra hanuo bia, diet na singa bukunkek menalua tana,
ma ira uno ebar diet na noh pampoba ma ra tamat na urur.
10 1Kng 10:1; Ais 60:6Ira king me Tasis ma mekaia ta ira mugurlamin,
diet na tar hartabar tana.
Ira king me Arebia ma Seba,
diet na tabar ie ma ra hartabar mah.
11 Ais 49:23Ira king bakut diet na singa bukunkek menalua tana,
ma ira kantri bakut diet na taram ie.
12 Nng 72:4Aie na halon ira maris ing diet na tataau tupas ie,
diet at ing diet kilingana ngunngutaan ma taie tikai wara harharahut diet.
13 Na marse ira maris ma diet ing taie udiet ta dadas,
ma na halon ira maris bia diet kabi maat.
14 Na halon diet sukun ra hinelar ma ra halhaliarai,
kanong ira udiet nilon a tabi matana ra matmataan tana.
15 Na tahut bia no king na lon lawas!
Na bilai bia ira gol me Arebia da tar tana.
Iau sip bia ira matanaiabar diet na sasaring hait utana
ma tano kidilona bung bakut bia diet na saring God bia na haidane ie.
16 Na tahut bia na mon halengin nian tano pise bakut,
ma bia ira nat na uladih na hung me.
Na bilai bia ira hunena ira daha na halengin hoing ira ina daha me Lebanon,
ma bia ira matanaiabar ta ira pise na hala diet na haratamat hoing ra huro i kubur timaan ta ira katon na pise.
17 KBk 3:15; Nng 89:36; 135:13; Stt 12:3; 22:18Na tahut bia da lik kawase hatikane tar no hinsana no king,
ma bia da ru no hinsana haruat ma ing no kasakes i murarang baak.
I tahut bia ira matanaiabar ta ira kantri diet na saring God bia na haidane diet ma no haraidaan tano king.
Diet na nes kilam no king bia i te kap ra bilai na kinkinis.
18 A pirharlat tupas God no Watong, no God ta Israel,
nong aie sen mon i la gilgil ira tamat na gingilaan na kinarup ing i melmel saakit.
19 A pirharlat tupas no melmel na hinsana hathatikai.
Na tahut bia no ula hanuo bakut na hung ma no minarine.
Amen. Amen.