7
A ninge tane Devit nong i ga inge tupas no Watong utane Kus tano huntunaan tane Beniamin.
1 Nng 31:1,15Watong, nugu God, iau barahit taam.
Harahut iau ma nu lamus iau sukun diet ing diet hagahe iau.
2 Nng 57:4Diet kabi diris iau hoing tiga laion i la hardiris huo,
ma diet na sapak hasiksik iau, ma taie tikai bia na harahut iau.
3 Watong, nugu God, bia ing iau gate gil ira sakena,
bia a mon nironga ta ira limagu,
4 ma bia ing iau gate gil hagahe tiga nong i ga mon malum utagu,
ma bia taie ta burena kaik iau gi kinau no sukagu,
5 io, waak tar no nugu ebar na pasak mur iau ma na papasa tagu.
Waak sei na paas hasur no nugu lon taar tano pise,
ma na hainoh no palatamaigu tano kaabus.
6 Nng 3:7; 44:23Watong, taman tut ma no num ngalngaluan.
Tut hut wara hinarubu ma no nginangar ta ira agu suk.
Nugu God, tangahun, ma nu bul harkurai wara harharahut iau.
7 Waak no kis hurlungai na matanaiabar diet na haan luhutane ugu.
Hasur no num harkurai meram naliu taar ta diet.
8 Waak tar no Watong na kure ira matanaiabar.
Watong, kure iau haruat ma ira nugu taktakodas.
Augu Nong u Naliu Harsakit, kure iau haruat ma ira bilbilai ken i kis taar tano balagu.
9 Jer 11:20; Ni 2:23No takodasiana God,
nong i la nesnes salok ira liklik ma ira kaati nari,
hapataam ira magingin na haragahai ta ira ut na sakena,
ma nu balaure bat timaan ira ut na takodas.
10 Nng 18:2,30No nugu bahbahit, ne God Nong i Naliu Harsakit,
nong i la halhalon diet ing ira kaati diet i gamgamatien.
11 God aie tiga takodasiana ut na gil harkurai.
Aie tiga God nong i la hapuasne no uno ngalngaluan ta ira kaba bungbung.
12 Lo 32:41Bia ing tiga nong pa na lilik pukus,
God na tes no uno wise na hinarubu,
ma na sarat no hinau tano uno laplapot ma na lukun ie.
13 Nng 18:14I te tagure ira uno rumus wara hinarubu.
I te tagure ira uno lulungo na rumus.
14 Ais 59:4; Jm 1:15Nes baak! Tiga nong i tianane ra saksakena.
I balaan ma ra purpuruan ma i kaha hapuasne ra bisbis.
15 Jop 4:8Tiga nong i bulbul kuun wara hakuni ira mes,
na puko laka baling taar tano tungtung i kilkil ie.
16 Est 9:25No purpuruan i haburen tar ie, na wis habaling ie.
Ira uno nginangar na soot habaling no uluno at.
17 Iau ni tanga tahut tano Watong uta ira uno taktakodas.