Ninge 69

A nianga tupas no tunotuno nong i kure ira ut na ninge: Devit ga pit iakan ra ninge ma ga murmur no kaungana no ninge “Purpur.”

1 God, halon iau,

kanong no taahit i te hanut haruat ma no kadonagu.

2 Iau ruh narako tano pesa

ing taie a nugu ta tiga linge bia ni tur kora ine.

Iau te hanuat taar narako ta ra lamlamana taah,

ma no taahit i te buluhane iau.

3 I te maalum ira tamaigu wara tintaau wara gaiena harharahut,

ma no hasakit nagu i te mamasa.

I te tirih ira iruo matagu

ma kana iau nanaho tano nugu God.

4 Diet ing diet malentakuane iau, ma taie ta burena,

diet manga haleng ta ira higu tano ulugu.

Haleng diet miliguruane bia mon iau,

diet ing diet sisilih wara hagahe iau.

Diet sunang iau bia iau ni balu pukus ira linge iau pai ga kinau.

5 God, u nunure tar ira nugu tintalen na ngulo.

Ira nugu nironga pai mun taar taam.

6 Watong, augu Nong u Dadas Harsakit,

i tahut bia diet ing diet nanaho utaam,

diet pa na hirhir wara gaiegu.

God ta ira Israel,

i tahut bia diet ing diet silsilihe ugu,

pa da hamalahuan diet wara utagu.

7 Kanong warah, iau kahe ira sakana kukutur wara gaiem,

ma ra hirhir i te pulus no nugu matmataan.

8 Ira tasigu diet harus ise iau,

ma iau hoing tiga wasire nalamin ta diet,

9 kanong i gaas no balagu pane no num hala,

ma ira sakana nianga ing diet tange haliare ugu me, i soot iau.

10 Ing iau kis taar ma ra sunuah ma ra minilo,

di kukutur sakasaka tagu.

11 Ing iau sigam leh no sigasigam na tapunuk,

ira tunotuno diet hasakit tagu.

12 Diet ing diet la kis taar tano matanangaas huat tano pise na hala, diet kukutur tagu,

ma ira ut na minom diet inge garen iau.

13 Iesen iau sasaring uram ho ugu, Watong,

tano pakana bung nu bale leh no nugu sinasaring.

God, tano num tamat na harmarsai,

balu iau ma no num harhalon nong pana le hasango iau.

14 Kap pukus iau ta ira pesa,

ma waak u bale tar iau bia ni ruh suur.

Halangalanga iau sukun diet ing diet malentakuane iau,

hoing u gor soh leh iau mekaia ra lamlamana taah.

15 Waak u bale no taahit bia na buluhane iau,

bia ni konga kaia ra lamlamana,

ma bia no lulur na minaat na kanam iau.

16 Watong, taram pase iau meram narako ta ira bilbilai tano num harkalak,

ma tano num tamat na harmarsai, talingane iau.

17 Waak u suhe no num matmataan tano num tultulai.

Nu taram habir iau, kanong iau kis taar ra tinirih.

18 Hanuat hutet ma nu halon iau.

Kap pukus iau sukun ira nugu ebar.

19 U nunure tar ing di kukutur sakasaka tagu huo, ma bia di hamalahuan iau ma di hahirhir iau mah.

Diet bakut ira nugu ebar diet tur taar ra matmataan taam.

20 Ira sakana kukutur i te haliare no nugu lon,

kaik i maalum ira tamaigu.

Iau nanaas bia tikai na marse iau, iesen taie ta tiga nong,

ma bia tikai ing na hamaram iau, iesen iau pai nas leh tikai.

21 Diet bul ra malmalena linge ta ira agu nian,

ma diet tabar iau ma ra manmanil na wain ing iau maruk.

22 Iau sip bia no suuh na nian nong i kis menalua ta diet na hanuat hoing tiga matana hinau.

Iau sip bia iakano suuh na hanuat tiga dadas na binabalu wara hakuni balik diet.

23 Iau sasaring bia ira mata diet na kankado waing diet pa naga nanaas palai,

ma bia ira tihi diet na pusuko hathatika.

24 Burange bus diet ma no num ngalngaluan.

Bale no num nginangar bia na kabit diet.

25 I tahut bia ira udiet taman na mau,

ma bia pataie tikai na kis ta ira ngasia diet.

26 Kanong warah, diet la helar ta diet ing u hangungutaan diet,

ma diet la iangianga ta ira ngunngutaan audiet ing u hagahe diet.

27 Tung diet ta ira udiet haleng na magingin sakena.

Waak u bale diet bia diet na kap ta dahin tano num harhalon.

28 Da suge se ira hinsa diet tano pakpakat na nilon,

ma pa da pakat tikane ira hinsa diet ma ira ut na takodas.

29 Iau kilingane ra ngunngutaan ma ra tinirih.

God, iau sasaring bia no num harhalon na balaure bat iau.

30 Iau ni pirlat no hinsa God ra ninge,

ma ing ni tanga tahut tana, ira nugu nianga na raun haut no hinsana.

31 Iakan na manga haguama no Watong, ma pataie bia tiga hartabar na bulumakau,

ma pataie bia tiga tumatena bulumakau tika ma ira lakona ma ira kaskas na kakine.

32 Ira maris diet na nas ma diet na laro.

Muat ing muat sisilih ta God, ira numuat lon na nunuhuan baling.

33 Kanong warah, no Watong i la tartaram ira sinasaring ta ira malahahin,

ma pai la malmalentakuane ira uno matanaiabar di ga kubus tar diet ma ra winiwis.

34 I tahut bia no mawe ma no ula hanuo na pirlat ie,

ma huo mah no tes ma ira linge bakut ing i lon narako tana.

35 Kanong warah, God na halon Ierusalem ma na hatur habaling ira pise na hala gar na Iudeia.

Io, ira tunotuno diet na kis kaia ma diet na tinane leh ie.

36 Ira bulumur ta ira uno tultulai diet na rumahaal leh ie,

ma diet ing diet sip no hinsana diet na kis kaia.

<- Ninge 68 Ninge 70 ->