40
A nianga tupas no tunotuno nong i kure ira ut na ninge: Devit ga pit iakan ra ninge na lotu.
1 Iau ga nanaho matien tano Watong.
I ga tahurus taar tagu ma ga taram no nugu tintaau.
2 Nng 27:5; 69:2,14; Jer 38:6I ga rakun leh iau sukun no malmalagir na lulur,
ma sukun mah no pikaia ma ra pesa.
I ga hatur ira kakigu naliu tiga haatkis.
Ma ga balaure timaan no nugu tuntunur.
3 I ga bul tiga sigar ninge narako tano hagu,
a ninge na pirharlat ie tupas no udahat God.
Haleng diet na nes ma diet na burut,
ma diet na so ira udiet nurnuruan tano Watong.
4 A haraidaan na kis tano tunotuno
nong no Watong i burena tano uno nurnuruan,
ma pai haan tupas ira ut na latlaat,
ma pai harwis tika mah ma diet ing diet tahurus taar ta ira inabis na god.
5 Watong, nugu God, haleng
ira tamat na melmel na gingilaan na kinarup u gate gil.
Ira linge u ga pingit wara numehet,
taie tikai bia na was mur habal taar taam.
Ing bia iau gor ianga ma iau gor hinawas ta kaike ra linge,
diet manga haleng saakit ta ing i tale bia ni hinawas urie.
6 1Sml 15:22; Nng 51:16-17; Ais 1:11; Jer 6:20; 7:22,23; Amo 5:22; Mai 6:6-8; Hb 10:5-7Pau le sip bia da tun ira mangana hartabar tupas ugu.
Iesen u te papos ira talingagu.
Ira hartabar ing di tun no kidilona wawaguai bakut, ma ira hartabar wara kapkap se ira magingin sakena,
pau le supi.
7 Io, ma iau ga tange bia, “Iau um ken. Iau te hanuat.
Di ga pakat hokaiken utagu narako tano num pakpakat.
8 Jn 4:34; Jer 31:33; 2Ko 3:3Iau kanan taar bia ni gil haruatne no num sinisip, nugu God.
Ira num harkurai ken narako tano kaatigu.”
9 Iau hinhinawas palai tano takodasiana magingin narako tano tamat na kis hulungai.
Iau pai pagum bat ira palabulugu,
hoing u nunure tar, Watong.
10 Ap 20:20,27Iau pai suhe no num taktakodas narako tano kaatigu.
Iau iangianga tano num harhalon ma bia pai haruat bia da nurnur songa taam.
Iau pai suhe no num harmarsai ma no num tutun na magingin
ta ira matmataan ta ira matanaiabar tano tamat na kis hulungai.
11 Waak bia nu palim dit leh no num harmarsai sukun iau, Watong.
Na tahut bia no num sinisip ma ira num tutun na magingin na balbalaure haitne iau.
12 Kanong warah, a saksakena ing i kalkalala bia da was, i luhutane iau.
Ira nugu magingin sakena i te burung iau ma pai tale iau bia ni nanaas.
Diet manga haleng saakit ta ira higu tano ulugu.
Ma no kaatigu i te rurungo aram narako tagu.
13 Nng 70:2-5Watong, na tahut bia nu guama wara halhalon iau.
Watong, hanuat habir wara harharahut iau.
14 Iau sip bia diet ing diet wara bubu bing iau,
da gil hahirhir diet ma diet na nguanguo.
Iau sasaring bia diet bakut ing diet masmasingan no nugu sakena,
diet na tahurus tapukus ma ra malahuan.
15 Nng 35:21I tahut bia diet ing diet kukutur tagu,
diet na malentakuane ira udiet malahuana tintalen.
16 Iesen diet bakut ing diet silsilihe ugu,
i tahut bia diet na guama ma diet na laro taam.
Diet ing diet kalak no num harhalon,
i tahut bia diet na tangtange hatikane bia,
“Da bul haut no Watong.”
17 Nng 86:1; 109:22; 40:5; 1Pt 5:7Iesen kana iat iau tiga maris ma ra nugu mon sunupi.
Io kaik, na bilai bia no Watong na lik leh iau.
Augu no nugu harharahut ma no nugu Ut na Harhalon.