36
A nianga tupas no tunotuno nong i kure ira ut na ninge: Devit no tultulai tano Watong ga pit iakan ra ninge.
1 [a]Tiga nianga na hakilang ie ken narako tagu
uta ira saksakena tano sakana tunotuno ma i tange hoken:
Taie ta bunurut tane God
i kis tana.
2 [b]Kanong warah, i nes hatamat ie ma ira iruo matana tus,
kaik, pa na nes kilam ma pa na malentakuane ira uno sakana magingin.
3 Ira inga na hana a sakena ma i hung ma ra harabota.
Pai mintot baling um wara gilgil ira bilbilai.
4 [c]Kaia mah tano suhuno i la pingpingit sakena.
I la tartar habaling tar ie ra sakana ngaas,
ma pai la malmalok se asa ing pai takodas.
5 No num harmarsai, Watong, i hanut muk uram ra mawe,
ma no num tutun na magingin i hanut uram ra mauho.
6 [d]No num taktakodas i haruat ho ira tamat na uladih saakit,
ma no num takodasiana harkurai i haruat ma ra tingena lamlamana.
Watong, u la balbalaure kahe ira tunotuno ma ira wawaguai.
7 [e]No num tutun na harmarsai ing pa na pataam i manga tamat ma pai tale be da hapupuo!
Ira tunotuno bakut diet barahit napu ra ududuh ta ira babaam.
8 [f]U tabar diet ma ra nian ing kana i hung taar tano num hala,
ma u hamamo diet ma ra taah tano num taah na gungunuama.
9 [g]Kanong warah, ie ke ho ugu no puat na nilon.
Tano num lulungo het nes ra madaraas.
10 Waak u hatakumutne no num harmarsai ta diet ing diet nunure tar ugu.
Waak u sangeh wara gilgil ira magingin i takodas taar ta diet ing ira kaati diet i gamgamatien.
11 Waak u bale no kakine no ut na latlaat bia na papasuane iau,
ma waak mah be no limana no ut na sakena na kap se iau.
12 [h]Nes ira ut na gil nironga ing diet te puko taar huo.