Ninge 35

Devit ga pit iakan ra ninge.

1 Watong, nu harngangaar ma sige diet ing diet harngangaar ma iau.

Harubu ma sige diet ing diet harubu ma iau.

2 Kap leh no bahbahit ma ira linge na hinarubu.

Taman tut ma nu hanuat wara harharahut iau.

3 Tatik no kusur ma no haasok

wara harsomane diet ing diet paspasak hani iau.

Tange tagu,

“Iau no num harhalon.”

4 Hamalahuan ma nu hahirhir diet

ing diet wara bubu bing iau.

Tule pukus diet ma nu hamarisne diet

ing diet pingpingit sakena utagu.

5 Puh se diet haruat ma ra pala wit tano dadaip,

ma no angelo tano Watong na batbat se diet.

6 Iau sip bia ira nudiet ngaas na kankado ma na malmalagir,

ma no angelo tano Watong na paspasak mur hani diet.

7 Diet te se bat iau ma ira nudiet uben, ma taie ta burena.

Ma taie ta burena, iesen diet ga kil tar tiga naan wara utagu.

8 Io kaik, bale leh no saksakena na hanuat hakarup diet,

ma no uben nong diet se tar ie na wiwisane habaling diet,

ma diet na puko laka tano naan ma diet na hiruo.

9 Kaik um, no tanuagu na guama tano Watong,

ma iau ni kanakana tano uno harhalon.

10 No nugu kidilona nilon na tange,

“Watong, sige i haruat ma ugu?

U la harharahut leh ira maris sukun diet ing diet manga dadas.

U la kapkap pukus ira maris ma ira malahahin sukun diet ira ut na kikinau.”

11 Ira ut na hinhinawas ing diet tange mon bia diet nunure no tutun, diet tur harapuasa wara nianga, iesen diet wara hagahe bia iau.

Diet tung iau ta ira linge a kapatona iau ine.

12 Diet balu ira nugu bilbilai ma ra sakena,

ma iau gom manga marmaris.

13 Ma sen ing diet ga maset, iau ga sigam tamadiris na sigasigam wara hamines no nugu marmaris,

ma iau ga bul hasur no nugu nilon ma ra minilo!

Ing ira nugu sinasaring no Watong pa ga taram, ga tapukus baal taar tagu,

14 iau ga tur na sunuah

hoing bia utano nugu harwis be no tasigu.

Iau ga kis tudu ma ra tapunuk,

hoing bia iau susuah no pawasigu.

15 Ma sen ing iau ga laleka, diet ga hanuat hurlungen ma ra gungunuama.

Iau ga kis kabong taar ma diet gaam hung luhutane iau wara hinarubu ma iau.

Diet pai la sasangeh wara timtibe hapenpen iau.

16 Hoing ira tunotuno diet tur talur God, diet hasakit sakasaka taar tagu.

Diet hatagiris na ngise taar tagu.

17 Watong, na haruat hunanges ing nu ngok taar?

Halangalanga iau sukun ira udiet halhaliarai.

Harahut no nugu nilon sukun at kaiken ra laion.

18 Iau ni tar pirhakasing taam kai tano tamat na kis hulungai.

Nalamin ta ira haleng matanaiabar iau ni pirlat ugu.

19 Diet ing diet sukuane iau ma taie ta burena,

waak u bale diet bia diet na guama ta ira nugu tinirih.

Huo mah, diet ing diet malentakuane iau ma taie ta burena,

waak u bale diet bia diet na pit mata wara hakilang no pakana bung wara hanghagahe iau.

20 Diet pai la iangianga ma ra bala malum,

iesen diet pingit nianga na harabota taar ta diet ing diet lon matien narako tano taman.

21 Diet kukutur tagu ma diet tange,

“Het te nes tupas um ing u gilgil ma ira mata het.”

22 Watong, u te nes kaiken. Waak u kis kunkun.

Waak u kis tapaka tagu, Watong.

23 Tangahun, ma taman tut ukai wara gaiegu!

Hargor wara gaiegu, augu no nugu God ma no nugu Watong.

24 Haruat ma no num taktakodas, hamines bia iau pai gil ta nironga, Watong, nugu God.

Waak u bale bia diet na hasakit sakasaka tagu.

25 Waak u bale bia diet na lik, “Bilai! Ing at mon dahat sipsip!”

Waak u bale bia diet na tange, “Dahat te kanam bakut leh ie!”

26 Sige diet ing diet guama tano nugu tinirih,

nu hahirhir diet ma nu hangunguo diet.

Sige diet ing diet hatamat diet tagu,

hasigam diet ma ra hirhir ma ra malmalahuan.

27 Sige diet kanakana ing i hanuat puasa bia iau pai gil ta nironga,

bale diet bia diet na kup ma ra gungunuama ma ra larlaro.

I tahut bia diet na tange hatikane bia, “Da hatamat no Watong,

nong i la kankanakana tano bilai na kinkinis tano uno tultulai.”

28 No hagu na hinawas tano num taktakodas

ma ta ira num pirhakasing tano kidilona bung.

<- Ninge 34 Ninge 36 ->