22
A nianga tupas no tunotuno nong i kure ira ut na ninge: ing da inge iakan ra ninge, da mur no kaungana no ninge “No Dia tano Malaan.” Devit ga pit ie.
1 Mt 27:46; Mk 15:34Nugu God, nugu God, wara biha u te malok se iau?
Wara biha u manga tapaka wara halhalon iau?
U manga tapaka mah wara tartaram ira nugu sunuah na ngunngutaan?
2 Nugu God, iau tataau ra malaan tuk ra matarahien, iesen pau babalu.
No bung i hanuat ma iau pai kis kunkun.
3 Iesen di nes kilam ugu bia no udiet King, kanong augu at u halhaal
nong ira Israel diet pirpirlat ugu.
4 Ira hintubu mehet diet ga so nurnuruan taam.
Diet ga nurnur ma u ga halangalanga ise diet.
5 Ais 49:23Diet ga suah tupas ugu ma diet ga kap harhalon.
Narako taam diet ga so nurnur ma diet pa ga tapunuk, kanong u ga harahut.
6 Jop 25:6; Ais 41:14; 49:7; 53:3Iesen iau tiga kalola ma pai a tunotuno iau.
Ira tunotuno diet malentakuane iau ma ira matanaiabar diet mikiane iau.
7 Ais 53:3; Lk 23:35; Mt 27:39; Mk 15:29Diet ing diet nesnes iau diet kukutur tagu.
Ing diet hamalahuan iau, diet lawa ul ma diet tange,
8 Mt 27:43“I te so nurnur tano Watong.
Waak tar at no Watong na harahut ie.
Waak tar at no Watong na halon ie,
tako no Watong i kanakana at tana.”
9 Iesen u ga kap hasur iau mekatiga tano lienat.
U ga pakile bia iau ni so nurnur taam,
ing mah iau ga susus baak tano pawasigu.
10 Ais 49:1Ing di ga kaha iau di ga suro tar iau taam.
Ing iau hanuat tano lienat tano makai, u gabe hanuat no nugu God.
11 Waak bia u tapaka tagu,
kanong warah ira tinirih mon ken hutet
ma taie tikai bia na harahut.
12 Amo 4:1Haleng tumatena bulumakau diet tur bat iau.
Ira dadasina tumatena bulumakau me Basaan diet tur luhutane iau.
13 Kra 2:16Hoing ira ngangarina laion diet sapsapak ira adiet hiruo,
diet papos hatamat ira ha diet wara ienien iau.
14 Jos 7:5; Nah 2:10No nugu nilon i hureng hoing ra taah di hurange se,
ma ira surugu pai harpasum baal um.
No nugu lon i te maalum
hoing ira wax i pola.
15 Ira nugu dadas i te mamasa hoing ra pikaia no kasakes i te rang ma i daakes,
ma no karamegu i te patep naliu narako tano hagu.
U te waak tar iau bia ni maat kai ra kaabus.
16 Mt 27:35; Jn 20:25Ira paap diet tur bat iau.
Tiga kaba sakana tunotuno dal te tur luhutane iau,
dal te gaso ira limagu ma ira kakigu.
17 Lk 23:27,35Iau tale bia ni was bakut ira surugu.
Ira matanaiabar diet ngokngok ma diet minminok.
18 Mt 27:35; Mk 15:24; Lk 23:34; Jn 19:24Diet harpalau ma ira nugu sigasigam
ma diet mamagu ma ra satu utano nugu maal.
19 Iesen augu, Watong, waak bia u tapaka tagu.
Nugu Ut na Harhalon, hanuat gasien wara harharahut iau.
20 Halon iau sukun no wise na hinarubu bingibing,
ma no nugu melmel na nilon mekaia ta ira paap.
21 Halon iau mekaia ra ha diet ira laion.
Harahut iau mekaia ra lako diet ira rakaia na bulumakau.
22 Hb 2:12Iau ni hinawas palai tano hinsaam ta ira tasigu.
Tano kinkinis hurlungai iau ni pirlat ugu.
23 Pirlat ie, muat ing muat burte no Watong.
Muat bakut ira bulumur ta Iakop muat na urur tana.
Muat na nes hatamat ie, muat bakut ira bulumur ta Israel!
24 Hb 5:7Kanong warah, pai malentak ma pai tar tihine
ta ira ngunngutaan ta diet ing diet kaha tinirih.
Pai suhe no matmataan tana ta diet
iesen i taram diet ing diet tataau wara harharahut.
25 Sav 5:4Tano tamat na kinkinis hurlungai iau ni pirlat ugu uta ira linge u gate gil.
Iau ni pakile haruatne no nugu kunubus ra matmataan ta diet ing diet urur taam.
26 Ira maris diet iaan ma diet na hahos.
Diet ing diet silsilihe no Watong diet na pirlat ie.
I tahut bia muat na lon hathatika!
27 Nng 2:8; 86:9Ira hauhawatine no ula hanuo bakut diet na lik leh ma diet na tapukus taar tano Watong.
Ira hatatamaan tano ula hanuo bakut diet na lotu tupas ie,
28 Sek 14:9kanong no Watong, aie no King,
ma i kure bakut tar ira kantri.
29 Ais 26:19Ira watong bakut tano ula hanuo diet na iaan ma diet na lotu tupas God.
Ira minaat diet na singa bukunkek tana,
diet ing pai tale bia diet na balaure habaling at diet bia diet pa naga maat.
30 Ira nati diet ing diet na lon namur, diet na taram ie.
Diet na hinawase ira udiet bulumur tano Watong.
31 Diet na hinawas palai ta ira matanaiabar ing baak pa di kaha diet
ta ira uno taktakodasiana magingin,
kanong warah, God i la harharahut ira uno matanaiabar.
<- Ninge 21Ninge 23 ->
22:1: Mt 27:46; Mk 15:34
22:5: Ais 49:23
22:6: Jop 25:6; Ais 41:14; 49:7; 53:3
22:7: Ais 53:3; Lk 23:35; Mt 27:39; Mk 15:29
22:8: Mt 27:43
22:10: Ais 49:1
22:12: Amo 4:1
22:13: Kra 2:16
22:14: Jos 7:5; Nah 2:10
22:16: Mt 27:35; Jn 20:25
22:17: Lk 23:27,35
22:18: Mt 27:35; Mk 15:24; Lk 23:34; Jn 19:24
22:22: Hb 2:12
22:24: Hb 5:7
22:25: Sav 5:4
22:27: Nng 2:8; 86:9
22:28: Sek 14:9
22:29: Ais 26:19