148
1 Da pirlat no Watong.
I tahut bia muat na pirlat no Watong meram ra mawe.
Muat na pirlat ie kenam naliu saakit.
2 Nng 103:20,21Muat ira uno angelo bakut, muat na pirlat ie.
Muat bakut ira uno umri kenam ra mawe, muat na pirlat ie.
3 Kasakes ma teka, mur na pirlat ie.
Muat bakut ira tiding ing muat lulungo, muat na pirlat ie.
4 Lo 10:14No mawe aram naliu saakit, i tahut bia nu pirlat ie.
Muat ira taah kenam naliu tano mawe, muat na pirlat ie.
5 Stt 1:1I tahut bia kaiken ra linge diet na pirlat no hinsana no Watong,
kanong ga tula nianga ma diet ga tahuat.
6 Jop 38:33Gate hakisi hatikane tar diet ta ira udiet sumsubaan.
Ga tar tiga harkurai huo nong pai tale bia na panim laah.
7 Stt 1:21I tahut bia a pirhakasing mekai ra ula hanuo na haan tupas no Watong.
Ira tamat na kirip tano tes diet na pirlat ie, ma no lamlamana tes bakut mah huo.
8 Jop 37:11,12Huo mah no hile ma ra bata na ais, sinow ma ra bahuto,
ira tamat na dadaip ing diet mur ira uno nianga,
9 Ais 44:23; 55:12ira tamat na uladih ma ira nat na uladih bakut,
ira daha ing i la huhuai wara ienien ma ira tamat na ina daha saakit mah,
10 Ais 43:20ira rakaia na wawaguai ma ira lasana wawaguai bakut,
ira wawaguai ing diet kaikaiau ma ira maan ing diet la pupungo,
11 ira king tano ula hanuo ma ira kantri bakut,
ira tamat na lualua ma ira mes na ut na gil harkurai bakut tano ula hanuo,
12 ira marawaan ma ira bulahin,
ira takana ma ira nat na bulu.
13 I tahut bia diet na pirlat no hinsana no Watong,
kanong no hinsana sen mon nong di raun ie.
No tamat na minamarine i manga lua tano ula hanuo ma no mawe.
14 Lo 10:21; Ep 2:17I te tar dadas ta ira uno matanaiabar,
kaik diet ing diet te tar tutun ira udiet nilon tana diet na pirlat ie,
diet at ira Israel, no huntunaan nong i manga hutet tana.