Ninge 139

139

A nianga tupas no tunotuno nong i kure ira ut na ninge: Devit ga pit iakan ra ninge na lotu.

1 Watong, u te nes salok iau

ma u nunure tar iau.

2 U nunure tar ing iau la kiskis napu ma ing iau la tutut naliu.

U palai ta ira nugu lilik meram tapaka.

3 U tikane timaan iau ing iau tur leh ira nugu hinahaan tuk taar iau kubaba baling,

ma u la manga madaraas taar ta ira nugu kaba tintalen.

4 Ing mah bia iau pai tange baak tiga nianga,

Watong, u te la nunure bakut tar bia asa ing iau ni tange.

5 U wis luhutane iau menamur ma menalua mah.

U te palim bus iau ma no limaam.

6 Kaike ra minminonas i manga sakit asa ing iau nunure.

I manga kalkalala tagu.

7 Uhe kaik i tale bia ni haan talur no Tanuaam?

Ahe kaik i tale bia ni hilau pas ugu?

8 Ing bia iau gor hanhut uram ra mawe, augu kaike.

Ing bia iau gor palase no kubegu kaia tano subaan na minaat, augu kaike.

9 Ing bia iau gor pupungo hut tika ma no madaraas na laar,

ma ing bia iau gor kis ares tapaka saakit tano tes ing no kasakes i la sungsuguh kaia,

10 kaia mah no limaam na lue iau,

ma no dadas na kata na limaam na palim hadikdikit tar iau.

11 Ing bia iau tange, “Tutun saakit, no kankado na suhe iau

ma no madaraas na hanuat kankado tano bung ma na luhutane iau,”

12 io, no kankado mah pa na hanuat rawarawa taam,

ma no kankado ra bung na rarang hoing ra kasakes,

kanong no kankado i ngan hoing ra palai taam.

13 Kanong warah, u ga gil hawaat ira sumsubaan narakoman tagu.

U ga hii iau narako tano balana no pawasigu.

14 Iau pirlat ugu, kanong warah u gate gil iau ma ra gingilaan nong a mangaan at ie ma nong i tale bia da urur tana.

I manga bilai saakit ira num pinapalim,

ma iau nunure timaan at huo.

15 Ira surugu pai ga susuhai taam

ing u ga gil kuman iau.

Ing u ga hii iau aram narakoman tano balana no pawasigu,

16 ira iruo mataam ga nes no palatamaigu ing pa di ga kaha baak iau.

Ira bung bakut u ga puo tar wara utagu,

u ga pakat kawase tar narakoman ta ira num pakpakat,

mekarawa bia tikai ta kaike ra bung pa ga hanuat baak.

17 God, tano nugu ninanaas, ira num lilik i melmel ma a tabi matana!

Bia da bul tikane i manga haleng saakit.

18 Bia iau nigi was diet, ira udiet winawas gor sakit ira pat na wana.

Ing iau tangahun, iau kis tika taar at ma ugu.

19 Maris, God, bia nugu bu bing se um ira ut na sakena!

Muat haan talur iau, muat ira ut na hinarubu bingibing.

20 Diet la tangtange ira sakana linge utaam.

Ira num ebar diet kilam bia mon no hinsaam ma taie ta urur tana.

21 Watong, hohe, iau pai malok ta diet ing diet malok taam?

Ma iau pai malentakuane sige ing diet tur huat wara bulbul hasur ugu?

22 Iau manga malentakuane tunat diet, ma iau pai sip diet ta dahin.

Diet te hanuat bia a nugu ebar diet.

23 God, nas salok iau. Nunure no balagu bakut.

Iau kalar dahin baak, iesen walar iau waing nugu palai ta ira nugu lilik.

24 Nas ing bia ta mon magingin narako tagu i hatahuat ngunngutaan,

ma lue iau ta ira tintalen ing na kis hathatikai.

<- Ninge 138 Ninge 140 ->