Ninge 106

106

1 Pirlat no Watong

Tanga tahut tano Watong, kanong a bilai ie.

No uno harmarsai i kis hathatika.

2 Sige i tale bia na hinawas ta ira dadas na pinapalim tano Watong,

bia i tale bia na tar ira pirharlat bakut ing i takodas bia da pirlat ie me?

3 A haraidaan na kis ta diet ing diet mur ira takodasiana harkurai,

diet ing diet la gilgil haitne ira takodasiana magingin.

4 Watong, lik leh iau ing nu harahut ira num matanaiabar.

Mai, nu taho mah iau ing u halon diet huo,

5 waing iau nigi nes ira bilai na kinkinis audiet ing u gate gilamis diet,

ma waing iau nigi guama mah tika ma no num huntunaan

ma nigi kis tika ma ira num tus wara pirpirlat ugu.

6 Mehet gate gil magingin sakena hoing ira hintubu mehet diet ga gil.

Mehet gate gil nironga ma mehet ga tatalen sakasaka.

7 Ing ira hintubu mehet diet ga kis taar Isip,

diet pa ga lik mur ira num dadas na pinapalim na kinarup.

Diet pa ga lik kawase ira num tamat na harmarsai ing u ga hamhamines ta diet,

ma diet ga patnau taam kaia tano Dardarana Tes.

8 Iesen no Watong ga halon diet wara gaiena no hinsana,

waing naga hamines hapalaine no uno tamat na dadas.

9 Ga boor no Dardarana Tes ma ga mamasa.

Ga lue diet nalamin ta ira iruo palpal na tes hoing bia tiga mamasina hanuo ie.

10 Ga halon leh diet sukun ira lima diet ing diet ga malentakuane diet.

Ga halangalanga pukus leh diet sukun ira lima diet ira nudiet ebar.

11 No tes ga kasar ira nudiet ebar

ma pa ga waak tar tikai ta diet bia na lon.

12 Io, diet ga nurnur um ta ira uno kunubus

ma diet ga inge ira ninge na pirharlat tupas ie.

13 Iesen diet ga luban hagasiaan ira linge ing gate pakile

ma diet pa ga nanaho wara utano uno bilai na lilik na harharahut.

14 Aram ra hanuo bia diet ga ngurungur wara adiet ta nian

ma diet ga walar God kaia.

15 Kaik, ga tabar diet ma ira linge ing diet ga saring,

iesen ga tule tiga sakana minaset ukaia ho diet.

16 Tano subaan diet ga sangeh taar tana, diet ga bala ngungut taar ta Moses

ma Aaron mah, no halhaliana tultulai tano Watong.

17 No pise ga tamapapos ma ga kanam ne Datan

ma ga bus no kabaan tane Abiram.

18 Tiga iaah ga lulungo nalamin ta diet ing diet ga murmur dir.

No karamena iaah ga ien ira ut na gil sakena.

19 Kaia hono uladih Sinai diet ga gil puan tiga palimpuo hoing tiga sigar bulumakau,

ma diet ga lotu tupas no palimpuo di ga pakilei ma ra gol.

20 No udiet God nong a tamat na minamarine, diet ga kios ie

ma tiga palimpuo tiga tumatena bulumakau nong i la ienien huro.

21 Diet ga lik luban no God nong ga halon diet,

aie nong gate gil ira tamat na linge saakit arau Isip.

22 Diet ga lik luban ira uno dadas na pinapalim na kinarup kaia tano pise ta Haam

ma ira gingilaan ing pai a malmaliana kaia tano Dardarana Tes.

23 Io, God ga tange bia na haliare diet.

Iesen Moses, nong God gate gilamis leh ie,

ga tur nalamin ta ira matanaiabar ma God

wara turtur bat no uno tamat na ngalngaluan bia pa naga haliare diet.

24 Io, diet ga miliguruane no bilai na pise.

Diet pa ga nurnur tano uno kunubus.

25 Diet ga ngurungur narako ta ira nudiet palpalih

ma diet pa ga mur ira nianga tano Watong.

26 Kaik, gaam hasasalim taar ta diet

bia na bu bing diet kaia tano hanuo bia,

27 ma na bu bing ira udiet bulumur kaia ta ira taman ta ira mes na kantri

ma na tule harbasiane diet nalamin ta ira hanuo tapaka.

28 Diet ga mur ira mes wara lalotu tupas Baal nong me Peor

ma diet ga ien ira hartabar di ga tus tar ta ira minaat na god.

29 Diet ga hangalngaluan God ma kaike ra udiet sakana magingin,

ma tiga hinangul ga hanuat nalamin ta diet.

30 Iesen Pinias ga tur naliu ma ga tur bat no udiet sakana magingin,

ma no hinangul ga marur.

31 Ma God ga was leh iakano linge nong Pinias ga gil ie hoing i haruat bia Pinias i takodas ra matmataan tana,

gaam tange bia iakan ra nesnes kilam na kis hathatika taar wara gaiena ira uno bulumur namur.

32 Diet ga gil hangalngaluan God aram ra taah Meriba,

kaik a tinirih ga haan tupas Moses.

33 Diet ga patnau tano Tanuo tane God,

ma a nianga na singsingit ga hansur tano hane Moses.

34 Diet pa ga haliare ira mes na hunhuntunaan

hoing God ga tule diet bia diet na gil,

35 iesen diet ga goota tika ma kaike ra hunhuntunaan ta ira mes na hanuo,

ma diet ga kap leh ira udiet tintalen.

36 Diet ga lotu tupas ira udiet palimpuo,

ma kaike ra palimpuo ga hakuni diet.

37 Diet ga hartabar ma ira nati diet tunaan

ma ira nat na hi diet taar ta ira sakana tanuo.

38 Ira nati diet pa ga gil ta sakena,

iesen diet ga kut bing diet ma ira de diet ga saal.

Ma diet ga tabar se ira palimpuo me Kenan ma diet,

ma ira de diet ga habilinge no pise ra matmataan ta God.

39 Diet ga habilinge habalin at diet ma ira linge diet ga pakile.

Ira udiet tintalen ga haruat ma ira hilawa ing diet ga lotu tupas ira palimpuo huo.

40 Io kaik, God ga ngalngaluan taar ta ira uno matanaiabar

ma ga malentakuane ira uno tus.

41 Ga tar se diet taar ta ira lima diet ira hunhuntunaan ta ira mes na hanuo

ma ira adiet suk ga kure diet.

42 Ira udiet ebar ga helar ta diet

ma diet ga paas hasur mah diet.

43 Haleng pakaan no Watong ga halon diet sukun ira udiet ebar,

iesen diet ga patnau taar at

ma diet ga hiruaan pane ira udiet magingin sakena.

44 Iesen ga nas tar ira udiet tinirih

ma ga hadade ira udiet sunuah.

45 Ga lik leh no uno kunubus wara gaie diet,

ma ga mahu no balana murmur no uno tamat na harmarsai.

46 Ga gil ira tunotuno ing diet ga palim kawase tar diet

bia diet na marse diet.

47 Watong, no numehet God, halon pukus mehet,

ma nu lam hulhulungan habalin mehet sukun ira mes na kantri,

waing het naga tanga tahut uram hono halhaliana hinsaam

ma het naga lat ugu ma ira numehet pirharlat tupas ugu.

48 A pirhakasing tupas no Watong, no God ta Israel,

mekatiga laah menalua tano hamhaburen tano ula hanuo tuk taar tano hauhawatine ma pana le pataam.

I bilai bia ira matanaiabar bakut diet na tange, “Amen!”

Pirlat no Watong.

<- Ninge 105 Ninge 107 ->