Ninge 105

105

1 I tahut bia muat na tanga tahut tano Watong. Tataau no hinsana.

Hapalaine ta ira kaba kantri ira uno pinapalim.

2 Inge uram ho ie, inge na pirharlat uram ho ie.

Hinawas palai ta ira uno tamat na melmel na gingilaan na kinarup.

3 Lat no halhaliana hinsana.

I bilai bia ira bala diet ing diet silsilihe no Watong na guama.

4 Nanaas tano Watong ma no uno dadas.

Sisilih tano Watong ta ira pakana bung bakut.

5-6 Muat ira hintubune Abaram, no uno tultulai,

muat ira bulumur tane Iakop ing no Watong gate gilamis,

i tahut bia muat na lik leh ira uno tamat na melmel na gingilaan na kinarup

ma ira dadas na pinapalim na kinarup ing ga gil,

ma ira harkurai mah ing ga bul tar.

7 Aie no Watong, no nudahat God.

Ira uno harkurai a kanik tano ula hanuo bakut.

8 I lik kawase tar no uno kunubus hathatika.

Iakano nianga nong ga tar ie na kis wara gaie diet ira bulumur ing diet na lon baak ta haleng na arip na tinahon namur.

9 I lik tar iakano kunubus nong ga gil ie ma Abaram,

iakano nianga nong ga gil mah ie ta Aisak tika ma no uno sinsalim.

10 Ga hadadas ie ukatiga hone Iakop hoing tiga harkurai.

Ga gil ie tika ma Israel hoing tiga kunubus nong pa na pataam,

11 gaam tange bia, “Iau ni tar no pise Kenan taam,

ma ira num bulumur diet na tinanei.”

12 Ing diet pa ga haleng,

ma a bar nong mon diet ma ra wasire diet narakoman tano taman Kenan,

13 diet ga haan hurbit nalamin ta ira mes na hunhuntunaan,

ma diet ga haan mekaia tiga kingdom ukatiga tiga mes.

14 No Watong pa ga bale leh tiga huntunaan bia na paas hasur diet,

ma ga boor ira king wara gaie diet, gaam tange bia,

15 “Waak muat ra singsigire ira nugu matanaiabar ing iau ga pilak diet,

ma waak muat hagahe ira nugu tangesoot.”

16 No Watong ga tar ra tamat na taburungan tano pise,

ma ira adiet nian bakut ga pataam.

17 Iesen ga tule hanalue tiga tunotuno urau Isip,

ne Iosep, nong di ga suhurane hoing tiga tultulai.

18 Ga ngungut ira kakine ing di ga kubus kawase,

ma diet ga kuta sen tano kadonana,

19 tuk taar bia ira linge ing ga hinawas nalua urie ga hanuat tutun.

Ing no nianga tano Watong ga hanuat tutun, ga hamines bia Iosep pai la harabota.

20 No king me Isip ga hartula ma di ga palas isei.

Aie nong i kure bakut ira matanaiabar kaia ga halangalanga sei.

21 No king ga bul ie bia na balaure no ngasiana,

ma ga kure bakut no hanuo tano king.

22 Ga tar mah no dadas tana bia na pir ira uno ut na harkurai haruat ma no uno sinisip

ma bia na hausur ira uno tamat na tultulai ma ra mintota.

23 Namur ne Israel ga haan laka Isip.

Iakop ga lon hoing tiga wasire kaia ra taman ta Haam.

24 No Watong ga manga hapuar ira uno matanaiabar.

Ga gil diet bia diet ga haleng saakit, kaik ira udiet ebar diet pa ga tale wara papaas hasur diet.

25 Ga hurusane ira bala diet ira Isip wara malentakuane se ira uno matanaiabar,

ma wara harpingit kumaan pane ira uno tultulai.

26 Ga tule Moses, no uno tultulai,

ma ne Aaron mah nong gate gilamis ie.

27 Dir ga gil ra dadas na hakilang nalamin ta ira Isip.

Dir ga pakile ira tamat na gingilaan na kinarup kaia ra taman ta Haam.

28 Ga tule no kankado, gaam kasar bakut no taman,

kanong diet pa ga taram ira uno nianga.

29 Ga pukusane ira udiet taah gaam hanuat hoing ra de,

ma ga huni bing ira udiet kirip.

30 No udiet taman ga hung ma ra rokrok,

ma diet ga karuas hut uram ta ira suuh na ninahon ta ira udiet ut na gil harkurai.

31 Ga ianga ma haleng na langa saakit ga hanuat,

ma ra nolnol mah ga hung tano hanuo bakut.

32 Ga pukusane no bata, gom hanuat hoing ra haat na ais,

gaam puko tano hanuo bakut tika ma ra hile.

33 Ga haliare ira hinau na wain ma ira ina papus,

ma ga lagas ira daha tano udiet hanuo.

34 Ga ianga, ma ra kubawa ma ra ko diet ga hanuat,

ma pai ga tale bia da was diet.

35 Diet ga ien ira linge ing ga nunuhuan taar ta ira udiet lalong,

ma diet ga ien bakut ira udiet sinaso tano pise.

36 Namur ga bu bing bakut ira matana bulu na tunaan tano udiet taman,

kaike ra luena bulu ing ira adiet sus ga manga kalak diet.

37 Ga lamus hasur ira Israel merau Isip, ma diet ga kap haleng siliwa ma ra gol,

ma ta ira udiet hunhuntunaan bakut taie ta tiga huntunaan ga puko laah.

38 Ira Isip diet ga manga guama ing diet ga haan laah,

kanong warah no tamat na bunurut uta ira Israel gate sigam diet.

39 God ga palase tiga bahuto wara kaskasar ira uno matanaiabar

ma tiga iaah wara bulbulo sare diet ra bung.

40 Diet ga sasaring, ma ga tule hawaat ira namnamien na maan wara adiet,

ma ga tabar hahos diet ma ra beret maram ra mawe.

41 Ga papos no haat ma ra taah ga bureng suur.

Ga saal hoing tiga taah tano mamasina hanuo.

42 Kanong warah, God ga lik tar no uno halhaliana kunubus

nong ga tar ie ta Abaram, no uno tultulai.

43 Ga lamus hasur ira uno matanaiabar ma ra gungunuama.

Diet ing gate gilamis diet, ma diet ga hansur ma ra kunup na kanakana.

44 Ga tabar diet ma ira pise audiet ira mes na huntunaan,

waing diet na rumahaal ta ira linge ing ira mes diet gate mangason pane,

45 waing diet naga taram ira uno hartula

ma diet naga mur ira uno harkurai.

Pirlat no Watong.

<- Ninge 104 Ninge 106 ->