103
Devit ga pit iakan ra ninge.
1 I tahut bia iau ni pirlat no Watong ma no nugu kidilona nilon.
Ma i bilai bia iau ni pirlat no halhaliana hinsana ma no balagu bakut mah.
2 [a]I tahut bia iau ni pirlat no Watong ma no nugu kidilona nilon,
ma iau ni lik kawase ira uno haraidaan bakut.
3 [b]Aie nong i la liklik luban se ira num magingin sakena bakut
ma i la halangalanga ugu ta ira num minaset bakut.
4 Aie nong i kul pukus leh no num lon bia kabu haan taar tano minaat
ma i haidane ugu ma no uno harmarsai ma i manga kalak ugu.
5 [c]Aie nong i banot ira num masmasingan ma ira bilai na linge,
kaik nugu hanuat baling hoing tiga marawaan ma nugu dadas hoing tiga malaba.
6 No Watong auno no dadas wara bul ira takodasiana harkurai
wara harharahut ira tunotuno ing di ubal diet.
7 [d]Ga hapuasne tar ira uno tintalen taar ta Moses,
ma ira uno gingilaan taar ta ira matanaiabar me Israel.
8 [e]No Watong i tar bia mon no uno harmarsai,
i matien wara ngalngaluan, ma i hung ma tiga mangana harmarsai nong pana le pataam.
9 [f]Pai tale bia na hartutung hait,
ma pai tale bia na lik hatikane tar no uno ngalngaluan.
10 [g]Pai la hapidanau het haruat ma ira nuhet magingin sakena
ma pai balu pukus het haruat ma ira numehet sakana tintalen.
11 Kanong warah, hoing no mawe i naliu saakit tano pise,
no uno harmarsai i manga tamat mah taar ta diet ing diet ru ie.
12 [h]Hoing i tapaka merau hono kasakes i la tutut hut mekaia ukai hono kasakes i la sungsuguh kaia,
io huo, i kap ise ira nudahat magingin sakena tapaka saakit talur dahat.
13 Hoing tiga tata i la marmarse ira natine,
huo mah no Watong i la marmarse diet ing diet ru ie,
14 [i]kanong i nunure tar ing dahat ga tahuat huo,
ma i lik leh bia a kaabus mon dahat.
15 [j]Ma dahat ira tunotuno, ira udahat bung na nilon i haruat ma ra huro.
Dahat kubur nunuhuan hoing tiga purpur.
16 Iesen no dadaip i puuh isei,
ma no katon nong ga kubur kaia pai nes habalin um ie.
17 [k]Iesen no harmarsai tano Watong tupas diet ing diet ru ie i kis hathatikai,
ma ira uno takodasiana magingin i kis hatika taar ta ira udiet bulumur.
18 [l]I kis hatika taar ta diet ing diet mur no uno kunubus,
diet at ing diet lik kawase tar ira uno hartula ma diet gil haruatne.
19 [m]No Watong i te hakisi no uno kinkinis na king aram ra mawe,
ma no ula hanuo bakut i kis menapu tano uno harkurai.
20 [n]Muat ira uno angelo, i tahut bia muat na pirlat no Watong,
muat at ira ut na baso ing muat gil haruatne ira uno nianga
ma muat la murmur asa ing i tange.
21 [o]Muat bakut ira uno umri kenam ra mawe, muat na pirlat no Watong,
muat at ira uno tultulai ing muat la gilgil haruatne ira uno sinisip.
22 I bilai bia ira uno pakpakilai bakut
ta ira kaba katon bakut tano uno harbalaurai, diet na pirlat no Watong.
I tahut bia iau ni pirlat no Watong ma no nugu kidilona nilon.
<- Ninge 102Ninge 104 ->