1 Ing Jisas ga tange se tar kaiken ga nanaas uram ra mawe gaam sasaring hoken: “Mama, no pakana bung i te hanuat. Hapuasne no minarine no Natim waing no Natim naga hapuasne no minamarim. 2 Nu gil at mon hoing u ga tar ra dadas tana bia na harkurai menaliu ta ira tunotuno bakut waing na tar no nilon hathatika ta diet bakut ing u te tar diet tana. 3 Ma iakan no nilon hathatika, bia diet na nunure ugu, augu no kapawena God tutun, ma bia diet na nunure mah Jisas Krais nong u te tulei ukai. 4 Iau te hapuasne no minamarim kai tano ula hanuo ing iau hapataam ira pinapalim u ga tar bia ni me pakile. 5 Io, Mama, kaiken augu at nu hapuasne no minamarigu, iakano minamar iau ga hatur kawase tar ie tika ma augu nalua ing ga taie baak ta ula hanuo.

6 “Iau te hapuasne tar ugu ta diet ing u ga tar se diet tagu kaik diet pai gar tano ula hanuo. Anum diet ma u ga tar diet tagu ma diet te taram ira num nianga. 7 Kaiken diet te nunure um bia ira linge bakut u te tar tagu i hanuat meram ho ugu. 8 Diet te nunure um kanong ira nianga u ga tar tagu iau ga tar ta diet ma diet ga kap usurane leh. Diet gabe nunure tun tar at bia iau ga hansur meram ho ugu ma diet gaam nurnur bia u ga tule iau. 9 Ma iau, iau sasaring uta diet. Iau pai sasaring utano ula hanuo. Iesen iau sasaring uta diet ing u te tar tagu kanong anum diet. 10 Ira mes na linge bakut tika ma diet anum, ma ira num, anugu. Ma diet te hapuasne ira minamarigu. 11 Iau te wara hinahaan sukun um iakan ra ula hanuo uram ho ugu. Iesen diet at baak ken ra ula hanuo. Halhaliana Mama, wis bat diet ma no dadas tano hinsaam, no hinsaam nong u ga tar ie tagu, waing diet naga tikai mon hoing dar mon tikai. 12 Ing iau ga kis tika taar ma diet iau ga wis bat diet ma no dadas ta iakano hinsang u ga tar ie tagu. Iau ga balaure tar diet ma taie tikai ta diet i te panim laah, iesen nong sen at mon nong ga murmur hani no ngaas na hiniruo, iakaik i te panim laah waing ira num nianga di ga pakat na hanuat tutun.

13 “Dahin um ma ni hanut ukaia ho ugu, iesen iau tange ken ra linge ing iau baak kanik tano ula hanuo. Ma iau tangtange kaiken waing diet na hung ma no nugu gungunuama ta ira udiet nilon hoing i hung taar tagu. 14 Iau te tar ira num nianga ta diet ma no ula hanuo i te malentakuane diet kanong diet pai mekai tano ula hanuo, hoing at mon mah iau pai mekai tano ula hanuo. 15 Iau pai saring ugu bia nu kap leh diet sukun no ula hanuo. Taie. Iau saring ugu bia nu wis bat leh diet sukun no Ut na Sakena. 16 Diet pai mekai tano ula hanuo hoing at mon iau pai mekai tana. 17 Bul hasisingen diet bia diet naga halhaal. Hapalaine ira num tutun ta diet. Ira num nianga i tutun. 18 Iau te tule tar diet tano ula hanuo hoing u ga tule tar iau tano ula hanuo. 19 Iau bul hasisingen habaling iau bia nigi halhaal wara gaie diet waing diet na halhaal ing diet na nunure ira num tutun.

20-21 “Iesen iau pai sasaring uta diet sen mon. Taie. Iau sasaring mah uta diet kaike ing diet na ra hadade no hinhinawas ta kan ra kabaan ma diet na nurnur tagu, waing diet bakut diet na tikai mon. Mama, iau sasaring bia diet na kis ta dar ma diet na tikai mon, hoing augu, u kis tagu, ma iau, iau kis taam, waing no ula hanuo na nurnur bia u ga tule iau. 22 No minamar nong u ga tar ie tagu iau te tar mah ie ta diet bia diet na tikai mon hoing dar tikai mon. 23 Diet na tikai mon huo kanong u kis tagu ma iau ni kis ta diet. Io kaik, iau sasaring bia na ngan huo waing diet na tiga kapawena tun waing no ula hanuo na nunure bia u ga tule iau ma bia u te sip diet hoing u te sip iau huo.

24 “Mama, iau sip diet ing u te tar diet tagu bia diet na kis tika ma iau tano subaan iau ni kis kaia. Iau sip huo waing diet na nes no minamarigu, no minamarigu nong u te tar ie tagu kanong u ga sip iau menalua tano hakhakisi tano ula hanuo.

25 “Takodasiana Mama, no ula hanuo pai nunure ugu iesen iau nunure ugu ma diet ira num diet nunure bia u ga tule iau. 26 Iau te hapalaine tar ugu ta diet. Ma iau ni harsasokane wara hapalaine diet taam waing no num sinisip utagu na kis ta diet ma bia iau mah, iau ni kis ta diet.”

<- JON 16JON 18 ->