KOLOSE

I nanaas bia Pol ga kis ra hala na harpidanau kenas Rom ing ga pakat iakan ra pakpakat tupas diet ira Kolose tano hanuo Esia (nes Apostolo 28.16-21). Ga pakat ira iruo pakpakat tupas Pilemon ma ira Epesas ta iakano pakana bung mah. Pol pa ga so no lotu aras Kolose. I nanaas bia Epaparas ga hadade no tahut na hinhinawas ta Pol kenas Epesas, gaam haan uras Kolose ma ga harpir kaia (Kolose 1.7-8 ma Apostolo 19.10). Pol ga pakat kan ra pakpakat wara hakhakatom diet ira Kolose ta ira tena harausur bisbis. Diet ga harabota uta ari a haleng na mangana linge. Diet ga bul hatamat ari a mangana bung (Kolose 2.16) ma ira angelo (2.18). Diet ga sip bia ira tunotuno na kis ra hena ira harkurai (2.21) ma no magingin na kut palatamaina tunotuno (2.11). Diet ga hatamat ira udiet mangana lilik bia aie no mangana mintot i lamus dahat tano nilon (2.4; 2.8; 2.18). Iesen Pol ga manga bul hatamat Krais bia aie sen mon i haruat bia na halon ira tunotuno. Krais no malalarine God (1.15). Krais ga hakisi ira linge bakut (1.16). Krais i balaure ira linge bakut (1.17). Krais no luena wara tuntunut hut sukun ra minaat (1.18). Krais i haruat harsakit ma God (1.19; 2.9). Krais na kap pakus ira linge bakut ukaia ho God (1.20-22). Io kaik, Krais i tamat ta ira linge bakut ma i manga haruat wara halhalon dahat, ma iakano no suruno ta iakan ra pakpakat.

1-2 Iau Pol tiga apostolo ta Krais Jisas haruat tano sinisip ta God, ma Timoti no tasi dahat narako ta Krais, mir tule ken ra nianga tupas muat ira matanaiabar tus ta God kaia Kolose, muat ira ut na nurnuruan tano numuat kinkinis ta Krais.

A harmarsai ma ra malum tupas muat meram ho God no adahat Sus.

3 Mir la tangtanga tahut ta God no Sus ana no udahat Watong Jisas Krais ing mir la saasaring uta muat. 4-6 Mir tanga tahut huo tana kanong mir te hadade uta ira numuat nurnuruan ta Krais Jisas ma uta ira numuat harmarsai tupas diet bakut ira matanaiabar gar ta God. Ma muat la harmarsai ma nurnur huo kanong muat kis na nanaho ta ira haridaan i kis taguro taar uta muat aram ra mawe. Ma muat gate hadade tar uta kaike ra haridaan ing no nianga tutun ga haan tupas muat, aie no tahut na hinhinawas. Iakan ra tahut na hinhinawas i la huhuai ma i la hanahaan hakakari tano ula hanuo bakut, hoing gate tatalen huo kaia nalamin ta muat tur leh tano luena bung muat ga hadadei ma muat ga palai ta ira tutun tano harmarsai ta God. 7 Ma no numehet bilai na harwis Epaparas nong i tur tika ma mehet tano pinapalim ma a bilai na ut na pinapalim ie tane Krais wara gaie muat, aie nong ga hausur muat uta iakan. 8 Aie nong ga hinawase mir utano numuat magingin na harmarsai nong no Halhaliana Tanuo i te tabar muat mei.

9 Kaiken ra linge no burena bia mir pai sangeh ma ra sinasaring wara gaie muat tur leh tano bung mir ga ser leh no hinhinawas uta muat. Mir la sarsaring God bia na tabar muat ma ra tamat na minminonas ta ira linge i haruat ma ira numuat nilon na tanuo bia muat naga hung ma ra mintota utano uno sinisip. 10-12 Ma mir sasaring mah huo bia muat naga lon hoing i sip bia muat na lon huo ma bia ta ira linge bakut ing muat la gilgil muat naga hakanakana ie hoken: na mon hunena ta ira numuat bilai na gingilaan bakut, muat na tahtahuat hanahaan ta ira numuat mintota utana, muat na kap ira dadas bakut haruat ma no uno tamat na baso sakit bia muat naga tur dadas ma muat na bala maat ta ira tirtirih, ma bia muat na tanga tahut tano adahat Sus ma ra gungunuama nong i te harahut muat bia muat naga petlaar bia muat na kap no pinlawe muat tika ma ira matanaiabar tus ta God ing diet kis taar tano madaraas. 13 Ma aie nong ga halon dahat sukun no udahat kinkinis ra hena no harkurai tano kankado ma ga hamaren dahat taar ra hena no bilai na harkurai tano Natine nong i manga sip ie. 14 Ma no Natine at nong ga kul halangalanga dahat ing ga lik luban se ira udahat magingin sakena.

15 Ma aie no malalarine God nong pa di la nesnes ie. Aie hoing no luena bulu kanong no uno kinkinis i tamat sakit ta ira linge bakut ing God ga hakisi. 16 Ma no uno kinkinis i manga tamat huo kanong God ga hakisi ira linge bakut ma no lima Krais, ira linge aram ra mawe ma kai tano pise, ira linge da nes ma ing pa di la nesnes, ma ira mangana tanuo hokaiken: ira lualua ma diet ing diet manga dadas ma diet ing diet la harkurai. Diet bakut kaiken, God ga hakisi diet ma no lima Krais ma wara hatamat Krais. 17 Krais at ga kis menalua ta ira linge bakut ma diet bakut diet kis timaan taar ra hena no uno harbalaurai. 18 Aie no tamat na lualua ta ira matanaiabar na lotu, diet no palatamaine. Aie no burena ta ira udiet nilon kanong aie no luena wara tuntunut hut sukun ra minaat, ma ga lua na tut hut huo waing naga tamat sakit ta ira linge bakut. 19 Krais i ngan huo kanong God ga kanakana bia Krais na hung ma ira bilai na linge bakut ing God i la hung taar me. 20 Ma tano pinapalim tano Natine, God ga sip bia na kap pukus ira linge bakut baling ukaia ho ie. Ga bul ra malum ma no dene Krais aram ra ula kabai, kaik gaam kap pukus habaling ira linge bakut, ira linge kai tano pise ma aram mah ra mawe.

21 Nalua muat ga kis sisingen talur God. Muat ga malentakuanei ma muat git gilgil ira magingin sakena. 22 Iesen kaiken God i te hamaraam leh muat ukaia ho ie ma no minaat tano palatamaine Krais waing naga hatur muat ra matmataan tana ma muat na gamgamatien ma pataie um ta bilinge bia ta sakena ta muat. 23 Ma i tale bia muat na tur taar huo ing bia muat na manga tur dikdikit taar tano numuat nurnuruan tano tahut na hinhinawas ma ing bia muat pa na kakari talur no numuat nanahai ma ra nurnuruan uta ira linge muat ga hadade tano tahut na hinhinawas. Ma iakan ra tahut na hinhinawas at nong di ga harpir mei tupas ira matanaiabar kai ra ula hanuo. Ma iau Pol, iau tiga tultulai ta iakano tahut na hinhinawas.

24 Ma iau guama kaiken uta ira ngunngutaan i ubal iau wara gaie muat. Ma iau puspusak kaiken ra ngunngutaan tano palatamaigu wara haphapataam ira ngunngutaan ta Krais ing i kis taar baak. Ma iau la puspusak huo wara gaiena no palatamaine, muat ira matanaiabar na lotu. 25 Iau te kap no pinapalim na harharahut uta muat ira matanaiabar na lotu kanong God ga tar no uno pinapalim tagu bia ni pakilei haruat ma no uno lilik ma bia ni gil huo wara hatahutne muat. Ga tar ie tagu bia ni hadukduk timaan no nugu pinapalim na harpir ma no uno nianga. 26 Ma iakan ra nianga nong ga susuhai ta ira tunotuno ta ira tintinahon menalua ma sen i te hapuasne um ta ira uno matanaiabar tus kaiken. 27 God ga sip bia na hapalaine diet bia iakano linge nong ga susuhai na manga haidane timaan diet ing diet pai Iudeia. Ma no suruno ta iakano linge nong ga susuhai, aie hoken, bia Krais i kis taar ta muat, kaik muat naga nanaho ma ra nurnuruan bia muat na laka tano tamat na minarine. 28 Ma mehet la harharpir uta Krais ta ira mangana tunotuno bakut. Mehet hausur diet ma mehet hakhakatom diet ma ra tamat na minminonas sakit waing diet bakut diet naga bilai harsakit tano udiet kinkinis narako ta Krais ing mehet lamus tar diet ra matmataan ta God. 29 Ma iakanong no burena bia iau papalim dadas. Iau manga baso haruat ma no uno tamat na dadas ing i la manga harharahut iau mei bia ni gil huo.

KOLOSE 2 ->