Dahat na matien na tunotuno nalamin ta ira haraubaal.
1-2 Muat ira kabinsit na lotu, iau mah tiga kabinsit hoing muat. Iau ga nes ira harangungut ta Krais ma iau nong iau hinhinawas ine. Iau nong ni hatur kawase mah no minamar ing na harapuasa. Io kaik, iau saring muat bia muat na balaure ira matanaiabar gar ta God nalamin ta muat hoing ira ut na balaura sipsip diet la balbalaure ira udiet sipsip. I tahut bia muat na kanan wara balbalaure diet hoing God i sip bia muat na gil huo. Waak muat balaure diet hoing bia tikai mon i hagut muat. Waak muat gil iakan ra pinapalim wara gaiena kinewa mon. Iesen muat na gil ie kanong muat manga sip bia muat na papalim huo. 3 Waak muat lik hatamat muat wara kurkure hadadas ira matanaiabar ing God i te tar ta muat bia muat na balaure diet. Iesen bia ira numuat tintalen na haruat ma ra tahut na malalar bia diet na mur, hoing ira sipsip diet la gilgil huo. 4 Ma bia no Tamat na Ut na Balaura Sipsip i harapuasa, muat na hatur kawase nora minamar, hoing ra bilai na balaparik ing pa na panim laah ira minarine.
5 Ma huo mah ta muat ira marawaan. Muat na hansiksik tar muat ta ira numuat kabinsit na lotu. Ma muat bakut, muat na matien na tunotuno harbasia ta muat kanong no nianga ta God di ga pakat ie i tange bia,
“God i malok se diet ira ut na latlaat,
ma i tar no uno harmarsai ta ira matien na tunotuno.”
6 Io, muat na hansiksik tar um muat ra hena no dadas na limane God waing naga hatamat muat tano pakana bung haruat ma no uno sinisip. 7 Muat na tar se ira numuat nginarau na bunurut tana kanong i manga lilik uta muat ma i balaure muat.
8 Na palai ira numuat lilik ma muat na balaure timaan muat! No amuat suk Sataan i wawawar haan hoing tiga laion i sisilih ta tikai bia na kanam kudule. 9 Iesen muat na tur dadas ta ira numuat nurnuruan ma muat na tur bat ie kanong muat nunure bia ira hinsaka muat tano hinsa Krais kai ra ula hanuo diet puspusak kaiken ra mangana harangungut mah. 10 Iesen no harangungut pa na ubal halawaas baak muat, ma namur God no burena ta ira harmarsai bakut nong ga tatau muat bia muat na laka tano uno minamar hathatika narako ta Krais, io, na hanunuhuan muat ma na hadadas muat bia muat na manga dikdikit. 11 Aie nong i hatur kawase ira dadas hathatika. A tutun.
Pita ga haragat diet ma ga haatne diet.
12 Iau pakat iakan ra da pakpakat ma no harharahut ta Sailas no tasi dahat. A tutun na tunotunoi. Iau wara haragat muat ma iau wara hinhinawas palai bia iakan no tutun na harmarsai ta God. Muat na tur dadas tana.
13 Ira matanaiabar na lotu kai Babilon ing God i te gilamis diet tika ma muat, diet haatne muat. Huo mah no nugu bulu Mak. 14 Muat na haatne hargilasane muat ma ra tamat na harmarsai.
A malum ta muat bakut ing muat kis taar ta Krais.
<- 1 PITA 4
