1 Wagan u̱ te̱k-u̱ a-to̱m u-Ru̱ ne̱ ta'er i o̱tte̱ u̱t-kwano u̱t-ta'er wa haan tu̱msu̱ wa zu̱ me̱, <<Do̱rnu̱ me̱, tu̱msu̱ u̱m do̱'e̱ ko̱su̱ bo̱ swadu̱ u̱r-ko̱b du̱ do̱'e̱ he̱e̱n u̱du̱ napi napi yu̱ u-kaar wu̱ o̱ shu̱'u̱t u̱ u̱-do̱m m-bu̱ u-tát. 2 Faru̱k-tu̱ u-dak no̱ng m-o̱ u̱ wu̱n ne̱. Tu̱msu̱ ne̱t-tu̱ u-dak u̱t-be̱e̱t ke̱ i m-o̱ wu̱n ho̱o̱g u̱n.>>

3 Se̱ wa-to̱m u-Ru̱ haan tu̱msu̱ wa ku̱b me̱ u̱-me̱ se̱ge̱-du̱ Yar-u̱ u-Ru̱ m-cwa u̱-me̱ u̱r-do̱g. Ku̱na u̱m bitte̱ u-ne̱ta u̱ shu̱'u̱t u̱-do̱mu̱ bisa-u yo̱-ya yu̱ jaz-ya tu̱msu̱ bisa-u yo̱-ya na taku̱ste̱ ya u̱ u̱t-gom tu̱ pyap-su̱ u-Ru̱ ne̱. Wa o̱tte̱ u̱t-hi u̱t-ta'er tu̱msu̱ u̱s-kar ne̱ u̱s-o̱p. 4 Ne̱ta-u ya o̱ m-wa kus-tu̱ bu̱-mu̱ u̱r-ge̱ ne̱ tu̱msu̱ tu̱ jas-to̱ ne̱, tu̱msu̱ wa no̱ng u̱t-u̱k u̱ ta'ar-tu̱ kwam-tu̱ bu̱-mu̱ u̱t-ró tu̱ shik, u̱ ta'ar-tu̱ shik ne̱ tu̱msu̱ uz-ne̱ i shik sok. Tu̱msu̱ wa o̱ m-shu̱p u̱ ko̱k-u̱ m-bu̱ ne̱ u̱ kwam-tu̱ bu̱-mu̱ u̱t-ró du̱ shik, de̱ shu̱u̱g u̱ bu̱-mu̱ ke̱ ne̱ mu̱ o̱ ees-mu̱ no̱m-tu̱ u̱s-gu̱r u̱t-go̱ u̱t-go̱ u̱ tu̱ o̱o̱-m wu̱n ne̱. 5 U̱ po̱ng-u̱r wa dim-du̱ o̱ró m-pan:

Da-u̱ u̱m hyane̱ wu̱n u̱m hog mu̱rimmo̱. 7 Se̱ wa-to̱m u-Ru̱ zu̱ me̱, <<Rem-u yan-o̱ bo̱ o̱tte̱ u̱ mu̱rimmo̱? U̱m do̱'e̱ waru̱ bo̱ no̱m-tu̱ m-yasa tu̱ ne̱ta-u ya u̱ bisa-u yo̱-ya ya ne̱ yu̱ wa o̱tte̱ m-sak, yu̱ o̱tte̱ u̱t-hi u̱t-ta'er u̱ u̱s-kar ne̱ u̱s-o̱p. 8 Bisa-u yo̱-o̱ ya yu̱ bo̱ hyane̱, ya o̱o̱g u̱r-fat se̱di ya zaar u̱r-fat u̱ da-o̱ da. Tu̱msu̱ m-ha iyane̱ wa do̱'e̱ rwu̱u̱n du̱gu̱ me̱ kub-u̱ za u̱r-ma tu̱msu̱ ya do̱'e̱ u̱ be-du̱ m-mar. Tu̱msu̱ ne̱t-tu̱ dak-u̱ u-be̱e̱t ne̱ i dim-u̱t e̱ zaare̱ m-pan u̱-me̱ ran-u̱ u̱r-fat du̱gu̱ na no̱m u-dak u-be̱e̱t, u̱n do̱'e̱ no̱m-du̱ mu̱rimmo̱ u̱ remu̱ bisa-u yo̱-ya ya o̱o̱g u̱r-fat se̱di ya zaar u̱r-fat u̱ da-o̱ da tu̱msu̱ wa do̱'e̱ u̱t-swu̱r m-rwu̱u̱n u̱r-fat.

9 <<Rem-u̱s sin-se̱ u̱t-sa wu̱ o̱tte̱ jab-u̱ m-nap: Hi-u̱t to̱ u̱t-ta'er to̱ ees-mu̱ u̱t-ro̱r u̱t-ta'er tu̱ ne̱ta-u ya o̱tte̱ shu̱'u̱t. To̱ o̱ tu̱msu̱ shu̱'u̱t mu̱ u̱t-faru̱k u̱t-ta'er. 10 U̱t-faru̱k u̱t-tan to̱ aru̱kte̱, wu̱ shi-shin wa o̱ u̱r-faru̱k u̱ da-o̱, tu̱msu̱ wu̱ u-ta'er haagu̱n u-ro da, se̱di faru̱k-u̱r wa do̱'e̱ u̱t-shu̱'u̱t u-da cashi. 11 Bisa-u yo̱-ya ya o̱o̱g u̱r-fat se̱di da-o̱ ya zaar u̱r-fat da, ya o̱o̱ge̱ faru̱k-du̱ u-eer. Wa o̱ te̱k-u̱ u̱t-faru̱k u̱t-ta'er, tu̱msu̱ wa do̱'e̱ ha-mu̱ du̱ mar-m wa.

12 <<Kar-su̱ bo̱ hyane̱ u̱s-o̱p faru̱k to̱ u̱t-o̱p tu̱ o̱nke̱ u̱r-faru̱k da u-rò. Na do̱'e̱ ya-du̱ u̱n u̱r-be̱b du̱ no̱m-du̱ u̱r-faru̱k u-kwam u-gan u̱r-kot u̱ bisa-u yo̱-ya ya ne̱. 13 Faru̱k-u̱t tun-to̱ dorog-u̱s u̱n o̱ u̱s-gan, tu̱msu̱ u̱n do̱'e̱ yasu̱ be̱b-u̱r u̱n u̱ faru̱k-u̱r u̱n ne̱ u̱du̱ bisa-u yo̱-ya ya. 14 U̱r-koto de̱ u̱n do̱'e m-ha tu̱msu̱ u̱n no̱m m-dum u̱ Kag-u̱r U̱r-ca ya ne̱, se̱di Kag-u̱r U̱r-ca do̱'e u̱ re̱-du̱ u̱n m-gag remu̱ u̱zu̱ wa o̱o̱ge̱ Wa-ko-uyan yu̱ a-ko-uyan ne̱ tu̱msu̱ Faru̱k-du̱ u̱t-faru̱k u̱t-be̱e̱t. Tu̱msu̱ i wa fage̱ u̱ i wa dage̱ ne̱ tu̱msu̱ a jab-u̱ so̱-o̱ wa ne̱ e̱ do̱'e̱ u̱t-shu̱'u̱t u̱r-kot u̱ wa ne̱.>>

15 Se̱ wa-to̱m u-Ru̱ zu̱ me̱, <<Bu̱-mu̱ bo̱ hyane̱, be-du̱ kaar-u ya o̱tte̱ shu̱'u̱t, de̱ o̱ ees-mu̱ u̱t-ne̱t, u̱ ban-tu̱ u̱t-ne̱t ne̱, u̱t-dak ne̱ tu̱msu̱ u̱t-rem ne̱. 16 Bisa-u yo̱-ya ya yu̱ bo̱ hyane̱ tu̱msu̱ u̱s-kar ne̱ u̱s-o̱p e̱ do̱'e̱ gu̱g-mu̱ kaar-u ya. E̱ do̱'e̱ o̱nk-du̱ kwu̱m-u̱t wa u̱t-be̱e̱t u̱n yage̱ wa u̱r-so. U̱n do̱'e̱ tu̱'u̱su̱ war-u wa tu̱msu̱ u̱n tokos wa u-ra. 17 Remu̱ u̱zu̱ Ru̱-o̱ wa'e̱ go̱-du̱ dorog-u̱s se̱ u̱-me̱ jab-u̱s u̱n, no̱m-u̱ do̱'e̱ u̱t-wa u̱n no̱m no̱m-u̱ wa u̱t-sa u̱n no̱m. U̱n do̱'e̱ u̱t-ees u̱n yase̱ faru̱k-u̱r u̱n u̱du̱ bisa-u yo̱-ya ya, m-te da-u̱ na do̱'e̱ shu̱u̱s-du̱ rem-su̱ u-Ru̱. 18 Tu̱msu̱ ne̱ta-u inya yu̱ bo̱ hyane̱ u̱-me̱ hyan-u ró wa o̱ shu̱'u̱t-mu̱ bo̱-u yat-o̱ u̱ o̱o̱ge̱ faru̱k-du̱ faru̱k-tu̱ u-dak u-be̱e̱t.>>

<- Hyan-u Yohanna 16Hyan-u Yohanna 18 ->