1 Da-u̱ Ibrahi o̱o̱ge̱ u̱ shu̱'u̱t u̱ is-yu̱ cwadu̱ rimpa-u̱r wa u̱ da-u̱ ho̱-yu̱ du̱nge̱ sok, Yawe haan u̱du̱ Ibrahi u̱ dapu̱s se̱ke̱n te-u̱s yat-se̱ su̱ O̱k su̱ Mamre. 2 Se̱ Ibrahi jaku̱s is u-ru̱ wa hyen ne̱t-ne̱ tu̱t u̱ ees u̱ dapu̱s wa. Da-u̱ wa hyane̱ u̱n, se̱ wa ku̱su̱m m-so̱m du̱gu̱ is-yu̱ rimpa-u̱r wa m-ha u̱du̱ u̱n. Wa he̱ u̱t-kwu̱ku̱t u-dak u̱ yadu̱ m-ze̱g.

3 Ibrahi zu̱, <<U̱so-u̱ u-bu ri, a u̱m kume̱ hyu̱-m pusmo̱ u̱du̱ ró, a-bo̱ aru̱k bu-u ri da. 4 Yagu̱n na haatu̱n no̱ m-bu̱, u̱ no̱ jaas na-u̱s no̱, u̱ no̱ hure̱ u̱ kug-du̱ te-u inya. 5 Yage̱ u̱m haatu̱n no̱ no̱m u̱t-re̱ u̱ no̱ re̱, ko̱ no̱ kumu̱ be̱b-du̱ u̱r-no̱k. Bashu̱te̱ no̱ haagu̱n u̱ bu-u̱ to̱k-u̱ no̱, yagu̱n u̱m no̱m iya.>>

U̱n zu̱, <<No̱nge̱, no̱m u̱ka cittu̱ bo̱.>>

6 Ibrahi aru̱k m-mu̱ m-so̱m u̱ rimpa-u̱r wa. Wa zu̱ Saratu, <<No̱m m-ho̱r, bo̱ kab ko̱k-tu̱ m-hyu̱ u̱t-tu̱t, bo̱ kwu̱u̱t to̱, bo̱ no̱m u̱t-kak.>>

7 Se̱ Ibrahi do̱'e̱ u̱du̱ ban-du̱ bisa-u̱t wa, wa du̱g gob-du̱ u-na du̱ o̱ so̱-de̱ wa yasu̱ to̱k-u̱ wa, se̱ to̱k-u̱ wa do̱'e̱ wa ho̱ tu̱msu̱ wa mang ya m-ho̱r m-ho̱r. 8 Da-u̱ na tase̱ no̱m-du̱ no̱m u̱t-re̱, Ibrahi ku̱b no̱mtu̱ m-be̱ngu m-me̱ ne̱ u̱ ap-mu̱ na mange̱ mo̱ ne̱, wa hu̱u̱tu̱ hamu̱t-u̱t wa. Da-u̱ u̱n o̱ te̱k-u̱ re̱-du̱ no̱m u̱t-re̱, Ibrahi ees u̱ kit-u̱ u̱n u̱ dapu̱s yaku̱n te-ya.

9 Da-u̱ u̱n tase̱ re̱-du̱ no̱m u̱t-re̱, u̱n shit wa, <<¿Ne̱ta ró Saratu yu̱?>>

Wa zu̱ u̱n, <<Wa o̱ me̱n-tu̱ u̱r-rimpa.>>

10 Wa-gan u̱ te̱k-u̱ ne̱t-u̱t to̱ wa zu̱, <<Hak-yu̱ o̱ne̱ badane̱, u̱m o̱ u̱ mu̱u̱n u̱du̱ ró, Saratu ne̱ta ró wa u̱t-kab u̱r-ya.>>

Saratu o̱ u̱ e̱rru̱ wu̱n u̱ u̱r-rimpa. 11 U̱ da-u o̱ Saratu ne̱ e̱ Ibrahi e̱ wu̱u̱mte̱, Saratu yakke̱ hyan-du̱ u-pyaat. 12 Saratu no̱m u̱t-nu̱mu̱s u̱ war-wa u̱zu̱, <<U̱r-wu̱ ba me̱ ne̱, tu̱msu̱ u̱so u-bu ri wa wu̱mte̱ ko̱wa. ¿U̱m zamtu̱n m-ho̱g zwarru̱ m-roog u̱ campa-ne̱ u̱m do̱te̱ u̱r-mat da?>>

13 Se̱ Yawe zu̱ Ibrahi, <<¿Yan o̱ wa'e̱ Saratu u̱t-nu̱mu̱s? ¿Remu̱ yan-o̱ wa zu̱tte̱, <U̱r-mang ba me̱ ne̱ u̱t-kab u̱r-ya?> 14 ¿Oko̱n o̱ro u̱ ze̱ge̱ be̱b-u̱r Yawe? Me̱ u̱t-mu̱u̱n m-moon u̱ go̱-du̱ da-u uno̱, Saratu u̱t-kab u̱r-ya du̱ u̱r-campa.>>

15 Saratu hog u-gye̱r, wa no̱m m-se mu̱ no̱mu̱ wa ware̱. Wa zu̱, <<U̱m nu̱mu̱ste̱ da.>>

Se̱di Yawe zu̱ wu̱n, <<Bo̱ no̱ng u̱t-nu̱mu̱s.>>

16 Da-u̱ ne̱t-ne̱ tu̱t-u̱ e̱ yu̱ne̱ u̱r-aru̱k, Ibrahi shu̱'u̱ u̱n. Da-u̱ u̱n o̱ te̱k-u̱ u̱r-no̱k u̱ fu̱n-u u̱n, u̱n teen de̱ku̱n be-de̱. E̱ gwatu̱n u-dak u-fu̱g, e̱ hyen bo̱-u̱ So̱do̱m. 17 Se̱ Yawe zu̱ hi-u̱r wa, <<No̱ng u̱r-zwar u̱zu̱ u̱m yase̱ Ibrahi no̱m-u̱ u̱m zo̱nge̱ u̱t-no̱m da. 18 Ko̱-u̱r Ibrahi u̱t-shu̱'u̱t dak-u yat-o̱ tu̱msu̱ u̱r-be̱b ne̱ so̱k, tu̱msu̱ dak-tu̱ u-dak u-be̱e̱t u̱t-kwu̱m nu-u so̱-o̱ du̱gu̱-du̱ wa. 19 U̱m dak Ibrahi remu̱ zu̱ wa wartu̱ ya'ag-u̱ wa u̱ a bu-u wa ne̱ i do̱'e̱ u̱ haan u̱ dim-u̱ wa e̱ ship fu̱n-u̱ Yawe, u̱ remu̱ no̱m-du̱ no̱m-tu̱ o̱ tu̱ so̱-to̱ u̱r-zwar ne̱. U̱ da-u o̱ u̱m do̱'e̱ no̱mu̱ Ibrahi no̱m-u̱ u̱m nomte̱ este̱du̱ u̱s-rem.>>

20 Se̱ Yawe waru̱ Ibrahi, <<U̱m ho̱k u̱s-rem u-tát su̱ nom-u̱t yo̱-to̱ u̱ mo̱ttu̱ So̱do̱m u̱ Gomora ne̱, remu̱ zu̱ ba'as-u̱t e̱ no̱ng u-tát. 21 U̱m do̱'e̱ u̱t-cu̱zu̱n u̱m hyan ko̱ u̱zu̱ ko̱ yu̱r u̱n no̱ng u̱ yo̱-de̱ u̱ka u̱m ho̱kte̱ re̱, u̱m u̱t-sa u̱m nap.>>

22 Se̱ ne̱t-u̱t to̱ aru̱k du̱gu̱ ku̱n m-ha So̱do̱m, se̱di Yawe kus u̱ ees u̱-shu̱ Ibrahi. 23 Ibrahi hikne̱ u̱ kit-u̱ wu̱n. Wa zu̱, <<¿Bo̱ ho̱rru̱sse̱ a-jab-u̱s so̱-se̱ ne̱ u̱ a-za-jab-u̱s yo̱-se̱ ne̱? 24 A-na kume̱ ne̱t-ne̱ a-jab-u̱s so̱-se̱ ne̱ u̱t-shik u̱t-yu̱r u̱ o̱p [50] u-bo̱, ¿bo̱ ho̱ru̱sse̱ u̱n be̱e̱t bo̱ za yage̱ e̱ u̱ remu̱ ne̱t-ne̱ u̱t-shik u̱t-yu̱r u̱ o̱p a-jab-u̱s so̱-se̱? 25 U̱m nu̱pu̱ste̱ bo̱ zaar u̱ no̱m-du̱ go̱ no̱m-u o̱ da, bo̱ ho̱ru̱sse̱ a-jab-u̱s so̱-se̱ ne̱ u̱r-kot u̱ i yo̱-ye̱ ne̱. ¿Remu̱ yan-o̱ bo̱ do̱te̱ u̱ ho̱ru̱sse̱ i yo̱-ye̱ u̱s-gan u̱ i so̱-ye̱ ne̱? Za u-sakna bo̱ zaar u̱ no̱m-du̱ go̱-o̱ no̱m-o̱ iya da. Bo̱ de̱ no̱mu̱ u-dak u-be̱e̱t kwu̱p-du̱ u̱s-rem, tu̱msu̱ bo̱ no̱mu̱ no̱m-u̱ o̱o̱ge̱ ho̱n-ho̱n.>>

26 Yawe shu̱s wa zu̱, <<A mu̱ne̱ u̱zu̱ u̱m kwu̱mu̱g ne̱t-ne̱ u̱t-shik u̱t-yu̱r u̱ o̱p u̱ bo̱-u̱ So̱do̱m a-jab-u̱s so̱-se̱ ne̱, me̱ yage̱ bo̱-u o̱ u-be̱e̱t u̱ remu̱ a-jab-u̱s so̱-se̱ ne̱.>>

27 Ibrahi sur m-shas wa zu̱, <<Remu̱ u̱zu̱ u̱m ke̱rge̱ no̱m-du̱ u̱s-rem za u-gye̱r u̱du̱ U̱so-u̱ u-bu ri, ko̱ u̱zu̱ a waku̱n wa u̱m o̱o̱ge̱ da se̱di m-huug m-cwa ne̱, 28 a mu̱ne̱ u̱zu̱ na kwu̱mu̱g ne̱t-ne̱ u̱t-shik u̱t-yu̱r u̱ tan [45] a-jab-u̱s so̱-se̱ ne̱, ¿bo̱ u̱t-ho̱ u-bo̱ u-be̱e̱t u̱ remu̱ ko̱b-du̱ tan?>>

Yawe zu̱, <<U̱m za ho̱ru̱sse̱ o̱ da a mu̱ne̱ zu̱ u̱m kwu̱mu̱g ne̱t ne̱ u̱t-shik u̱t-yu̱r u̱ tan [45] ne̱t-tu̱ o̱ u̱ku̱n.>>

29 Ibrahi sur m-zu̱, <<¿M-ha iya ne̱ bo̱ ho̱ru̱sse̱ bo-u̱ So̱do̱m, a mu̱ne̱ u̱zu̱ na kwu̱mu̱g ne̱t-ne̱ a-jab-u̱s so̱-se̱ ne̱ u̱t-shik u̱t-yu̱r [40]?>>

Yawe zu̱, <<U̱m za ho̱ru̱sse̱ u̱n da u̱ remu̱ ne̱t-ne̱ jab-u̱s so̱-se̱ ne̱ u̱t-shik yu̱r [40].>>

30 Ibrahi zu̱, <<U̱so-u̱ u-bu ri, a jab-u̱ ró na u̱ re̱mu ri da, yage̱ u̱m no̱m u̱s-rem. ¿Bo̱ ho̱ru̱sse̱ bo̱-u̱ So̱do̱m, a mu̱ne̱ u̱zu̱ shik-de̱ na kume̱ u̱ o̱p [30] a-jab-u̱s so̱-se̱ ne̱?>>

Se̱ wa zu̱ wu̱n, <<U̱m za ho̱-du̱ u̱n da, a mu̱ne̱ zu̱ u̱m kwu̱mu̱g ne̱t-ne̱ u̱r-shik u̱ o̱p [30] u̱ku̱n a-jab-u̱s so̱-se̱ ne̱.>>

31 Ibrahi zu̱, <<U̱ da-o̱ remu̱ zu̱ u̱m kwu̱mu̱g be̱b-du̱ u̱s-rem u̱ U̱so-u̱ u-bu ri ne̱, a mu̱ne̱ u̱zu̱ shik-de̱ [20] na kume̱ warre̱ u̱ku̱n ne̱.>>

Wa zu̱, <<U̱ remu̱ kwaz-u̱r re̱ [20], u̱m zaar u̱ ho̱ru̱ssu̱ bo̱-u o̱ da.>>

32 Ibrahi zu̱, <<U̱so-u̱ u-bu ri, a jab-u̱ ró na da, yage̱ u̱m sur m-no̱m u̱s-rem u-so̱ u-gan. ¿A mu̱ne̱ u̱zu̱ ne̱t-ne̱ o̱p e̱ na kume̱ a-jab-u̱s so̱-se̱ ne̱?>>

Yawe zu̱ wu̱n, <<A u̱m kume̱ ne̱t-ne̱ o̱p a-jab-u̱s so̱-se̱ ne̱, u̱m zaar u̱ ho̱ru̱sse̱ bo̱-u o̱ da.>>

33 Da-u̱ Yawe tase̱ u̱s-rem u̱ Ibrahi ne̱, wa aru̱k wa, se̱ Ibrahi aru̱k m-mu̱ u̱ rimpa-u̱r wa.

<- U̱r-Taku̱n 17U̱r-Taku̱n 19 ->