1 U̱ gyu̱p-m mo̱ faru̱k kerge̱ m-roog da. Se̱ wa wu̱' na hatu̱n ran-tu̱ cu̱n-du̱ u̱s-rem tu̱ ogor-tu̱ faru̱k-u̱r wa, u̱ na karu̱nte̱ u̱-shu̱ wa. 2 Se̱ na bit m-pan u̱ku̱n u̱zu̱ Modekai upuste̱ no̱m-u̱ Bigtan ne̱ e̱ Te̱re̱s o̱o̱ge̱ u̱t-sa e̱ no̱m, tu̱-yat-to̱ Faru̱k i o̱o̱ge̱ e-du̱ is-yu̱ u-bu. I zo̱ngte̱ remu̱ e̱ ho-u̱t Faru̱k Zarake̱s.

3 Faru̱k shit, <<¿Yan go̱-du̱ u̱r-o̱g de̱ ko̱ m-sek mo̱ na do̱'e̱ ya-du̱ Modekai?>>

No̱m-u̱ i o̱o̱ge̱ u̱r-kot u̱ wu̱n ne̱ shase̱, <<Na no̱ngu̱ wu̱n o̱ku̱n da.>>

4 Faru̱k zu̱, <<¿Wana o̱o̱ge̱ ku̱n u̱-do̱ u̱-me̱ kat-du̱ u-bu?>> U̱ da-u o̱ Haman cwaag u̱-me̱ kat-du̱ u-bu u̱ o̱o̱ge̱ u̱-do̱ u̱ pyu̱-u̱ faru̱k. Wa o̱ u̱t-sa wa no̱m u̱s-rem u̱ faru̱k ne̱ u̱ka na de̱te̱ su̱rgu̱sse̱ Modekai u̱ do̱m-u̱ u-kan yu̱ wa zo̱nge̱ u̱ remu̱ wa.

5 Ne̱t-tu̱ o̱o̱ge̱ wu̱n ne̱ zu̱, <<Haman o̱ ees u̱-me̱ kur-u̱ kwu̱p-du̱ u̱s-rem.>>

Faru̱k shu̱s wa zu̱, <<Cwatu̱n wu̱n u̱-me̱.>>

6 Da-u̱ Haman cwaye̱ u̱-me̱, faru̱k shit wa, <<¿Yan-o̱ na do̱'e̱ no̱mu̱ ne̱t wu̱ faru̱k o̱o̱ge̱ u̱r-so̱ u̱zu̱ wa ya' wa m-sek?>>

Se̱ Haman nom u̱s-dorog u̱ hi-u̱r wa, <<¿Wana o̱o̱ge̱ u̱-ku̱n wu̱ faru̱k do̱'e̱ yadu̱ m-sek m-pas me̱?>> 7 Se̱ Haman zu̱ faru̱k, <<In di u̱zu̱ waku̱n o̱ró wu̱ bo̱ do̱'e̱ yadu̱ m-sek, 8 yage̱ na hatu̱n to̱ggo̱-yu̱ u̱r-faru̱k yu̱ faru̱k tame̱ u̱t-wa, u-jwaak ne̱ yu̱ faru̱k tamte̱ m-sak, yu̱ o̱tte̱ u̱t-u̱k go̱-du̱ tu̱ u̱r-faru̱k u̱ do̱m-u̱ hi-u̱r ya. 9 Yage̱ na yase̱ waku̱n u̱ te̱k-u̱ i-yate̱ faru̱k wu̱ zu̱ge̱ m-sek. Yage̱ e̱ wa-u̱ wu̱ faru̱k o̱o̱ge̱ u̱t-sa wa ya' wa m-sek. Tu̱msu̱ wa sak u-jwaak na kab wa m-cwa u̱-me̱ fu̱n-su̱ me̱ u-bo̱, na war u̱-shu̱ ne̱t-u̱ wa u̱zu̱, <Gwat no̱m-u̱ na no̱me̱ ne̱t wu̱ faru̱k o̱o̱ge̱ u̱t-sa wa ya' wa m-sek!> >>

10 Faru̱k zu̱ Haman, <<Do̱'e̱ bo̱ no̱m m-ho̱r m-ho̱r! Bu̱ kab to̱ggo̱-u ri u̱ jwaak-u ri ne̱, tu̱msu̱ bo̱ no̱m no̱m-u̱ bo̱ zu̱ye̱ na no̱m! Bo̱ no̱mu̱ Modekai iya, ne̱t-u̱ Yahuda, wu̱ o̱o̱ge̱ u̱ shu̱'u̱t u̱ is-yu̱ cwadu̱ pyu̱. Tass o̱ku̱n no̱mo̱ ka bo̱ u̱t-to̱ u̱ te̱k-u̱ no̱m-u̱ bo̱ zu̱ye̱ da.>>

11 Se̱ Haman kabu̱n u-to̱ggo̱ u-jwaak ne̱. Wa wa'u̱ Modekai, wa ku̱b wa m-cwa u̱-me̱ fu̱n-su̱ u-bo̱, wa u̱t-war u̱-shu̱ wa, <<Gwatu̱n no̱m-u̱ na no̱me̱ wu̱ faru̱k o̱o̱ge̱ u̱t-sa wa ya' wa m-sek!>>

12 Da tase̱ Modekai aru̱k m-mu̱ u̱ fu̱n-yu̱ bu-u faru̱k, se̱ Haman aru̱k m-mu̱ m-so̱m u̱ me̱n-u̱t rim-to̱ ne̱. Wa hog m-'e̱ sok. 13 Se̱ Haman waru̱ Zere̱s ne̱ta wa u̱ hu̱u̱b-u̱t wa ne̱ no̱mu̱ na no̱me̱ wa u-be̱e̱t u̱ ho̱-u̱r re̱. Se̱ ne̱ta wa u̱ hu̱u̱b-u̱t wa ne̱, e̱ zu̱ wa, <<Modekai, ne̱t wu̱ wa'e̱ bo̱ ho̱g-du̱ m-'e̱, ne̱t-u̱ Yahuda wa. Bo̱ zaaru̱ ke̱ru̱ re̱-du̱ Modekai m-gag da. Wa re̱ bo̱ m-gag!>>

14 Da-u̱ u̱n o̱ te̱k-u̱ no̱mu̱ wa u̱s-rem, se̱ te̱k-u̱ tu̱-yat-to̱ faru̱k haan e̱ ku̱b Haman m-ha u̱ be-du̱ re̱-du̱ no̱m u̱t-re̱ u̱ Esta zo̱nge̱.

<- Esta 5Esta 7 ->