1 Da-u̱ Apo̱ro̱s o̱o̱ge̱ u̱ Ko̱rintiya, Burus to u̱-me̱ dak-u o̱ wa te bo̱-u̱ Afisa, ku̱na wa bitte̱ e̱ke̱n a-doru̱ Ye̱so̱ ne̱. 2 Se̱ wa zu̱ u̱n, <<¿No̱ kwu̱ng Yar-u u-Ru̱ da-u̱ no̱ ya' jab?>>

Se̱ e̱ zu̱, <<O'o, it ho̱k u̱zu̱ Yar-u u-Ru̱ o̱ro da.>>

3 Tu̱msu̱ wa zu̱, <<¿Yan go̱-du̱ u̱t-yu̱bu̱sse̱ tu̱ m-bu̱ to̱ na no̱mu̱ no̱?>>

E̱ zu̱, <<Go̱-du̱ tu̱ Yohanna to̱.>>

4 Burus zu̱, <<Yohanna no̱ng u̱t-yu̱bu̱sse̱ m-bu̱ no̱ngu̱ ne̱t-ne̱ u̱t-yu̱bu̱sse̱ m-bu̱, i byu̱r-ne̱ e̱ yage̱ yu̱du̱ ba'as-u̱t e̱, wa o̱gu̱ waru̱ ne̱t-ne̱ e̱ ya jab-u̱ waku̱n wu̱ de̱ haan u̱ dim-u̱ wa, wato Ye̱so̱.>> 5 Da-u̱ u̱n ho̱ge̱ iya, na no̱mu̱ u̱n u̱t-yu̱bu̱sse̱ m-bu̱ u̱ te̱k-u̱ dim-u̱r Wa-ko-uyan Ye̱so̱. 6 Da-u̱ Burus do̱ru̱ u̱n u-kom, Yar-u u-Ru̱ he̱e̱n u̱ do̱m-u̱ u̱n, u̱n hu̱ no̱m-du̱ u̱s-rem u̱ to̱ko̱n rem-to̱ u̱ warru̱ no̱m-tu̱ Yar-u u-Ru̱ ko̱su̱ u̱n. 7 U̱n teeg campa-ne̱ u̱ka o̱p-u̱ yu̱r [12].

8 Se̱ Burus to u̱-me̱ Kur-u̱ u̱t-Ko̱se̱ wa o̱gu̱ warru̱ rem-su̱ u-Ru̱ jab gan. Wa teeg u̱s-pyaat u̱s-tu̱t u̱ku̱n wa, wa o̱gu̱ parru̱ u̱n u̱ waru̱ mo̱ttu̱ Faru̱k-du̱ u-Ru̱. 9 Se̱di e̱ke̱n gu̱gu̱m kab-du̱ rem-u̱s se̱ remu̱ hu̱k-mu̱ u̱r-hi har e̱ no̱mu̱ e̱ke̱n a-dor-ne̱ gom-u̱ rim-o̱ u̱ te̱k-u̱ u̱t-ne̱t. Remu̱ iya Burus yage̱ u̱n, wa nok u̱ a-dor-ne̱, wa o̱ u̱t-ko̱se̱ ko mu̱ne̱ u̱ makaranta-u Tiranus. 10 Burus no̱ng iya m-te̱ u̱s-hak u̱s-yu̱r, har ne̱t-tu̱ o̱gu̱ u̱r-shu̱'u̱t u̱ Asiya e̱ hog rem-su̱ Wa-ko-uyan Ye̱so̱, Yahuda-ne̱ u̱ i za-yahuda-ne̱ da be̱e̱t.

11 Ru̱-u̱ yaag Burus m-shin mu̱ no̱m-du̱ no̱m-tu̱ m-shin so̱k. 12 Abite̱ i o̱tte̱ u̱s-go̱m haagu̱n u̱du̱ Burus da, e̱ke̱n no̱m-du̱ ko̱o̱k u̱s-hund ko u̱t-kus tu̱ Burus tame̱, na de̱ u̱t-kab na do̱ru̱ a-ko̱b-du̱ m-yar ne̱. Remu̱ iya, ne̱t-tu̱ o̱tte̱ ko̱b-du̱ m-yar e̱ de̱ kwu̱m-du̱ m-yar, tu̱msu̱ i no̱m-u̱s u̱s-te o̱o̱ge̱ yadu̱ u̱r-ko̱b, e̱ de̱ u̱r-rwu̱ remu̱ no̱mu̱ Burus no̱me̱. 13 Se̱ e̱ke̱n Yahuda-ne̱ a riig-tu̱ ruutu̱ no̱m-u̱s u̱s-te ne̱, e̱ u̱t-sa e̱ kab dim-u̱r Ye̱so̱ e̱ hu̱u̱tu̱ rutu̱ no̱m-u̱s u̱s-te. E̱ zu̱, <<U̱m zu̱ u̱ dim-u̱r Wa-ko-uyan Ye̱so̱ du̱ Burus o̱ bu̱t-u̱t wa, ruun!>> 14 E̱ke̱n yaage̱ o̱ro ta'er, yaag-u̱ Siba, wa-Yahuda, wu̱ foge̱ hi-u̱r wa yu̱-Yat-ya a-To̱o̱g. 15 De̱ku̱n ho̱-de̱ e̱ o̱ te̱k u̱t-no̱m iya, no̱m-yu̱ u̱s-te gu̱gu̱m u̱r-rwu̱. Se̱ no̱m-yu̱ u̱s-te shu̱s ya zu̱ u̱n, <<U̱m nak Ye̱so̱, u̱m nak Burus. ¿Se̱di no̱ wanne̱ no̱ o̱ye̱?>> 16 Campa-yu̱ o̱tte̱ no̱m-yu̱ u̱s-te tu̱ mak wa he u̱n u̱t-war. Wa zeg be̱b-u̱r u̱n wa kemu̱sse̱ u̱n u̱t-kus wa ho̱n-su̱ u̱n, u̱n ru du̱gu̱ bu-u o̱ m-so̱m u̱t-so tu̱msu̱ u-war m-ja m-hyu̱.

17 Ne̱t-tu̱ o̱o̱ge̱ u̱ Afisa be̱e̱t, u̱ Yahuda-ne̱ u̱ i za-yahuda-ne̱ da ho̱ge̱ rem-su̱ no̱m-u̱ na no̱me̱, gye̱r-u̱ ship e̱, tu̱msu̱ u̱n sekmu̱sse̱ dim-du̱ Wa-ko-uyan Ye̱so̱. 18 U-tat u̱ te̱k-u̱ i ya jab e̱ haan e̱ o̱ warru̱ no̱m-u̱t yo̱-to̱ tu̱ e̱ no̱me̱ u̱ te̱k-u̱ u̱t-ne̱t. 19 U̱t-ne̱t u-tát i nome̱ u-gwat, e̱ gargu̱ssu̱n ran-u̱t u̱n tu̱ u̱s-pan, e̱ doos u-ra u̱ te̱k u̱t-ne̱t u̱t-be̱e̱t. Da-u̱ e̱ do̱re̱ shik-u̱ ran-tu̱ u̱s-pan tu̱ e̱ dose̱ u-ra, shik teeg shik-u̱ pama-u̱ u̱t-ho̱ u̱t-zo̱ngu u̱t-o̱p u-so u-tan [50,000]. 20 Remu̱ iya rem-su̱ Wa-ko-uyan sur m-cwa ko̱he̱ne̱, se̱ tu̱m jab-su̱ u̱t-ne̱t u-tát.

21 Da-u̱ na no̱me̱ no̱m-u̱t to̱ u̱t-be̱e̱t, Burus o̱gu̱ u̱ssa wa do̱'e̱ u̱ Urusharima, se̱di wa dorog u̱zu̱ wa ba m-ha u̱ Gas-u̱ dak-tu̱ Makidoniya u̱ Akaya ne̱ uro. Tu̱msu̱ Burus zu̱, <<A u̱m cwaye̱ u̱ Urusharima, me̱ u̱t-fang m-te̱ bo̱-u̱ Roma.>> 22 Se̱ wa tom ne̱t-ne̱ yu̱r u̱ te̱k-u̱ a-u̱r-se̱ge̱ ro ne̱, Timoti u̱ Eratus ne̱ m-ha u̱ Makidoniya, wa hen wa tumb cashi u̱ dak-u̱ Asiya.

23 Da-u na no̱me̱ iya, e̱ke̱n u̱ te̱k-u̱ ne̱t-tu̱ Afisa, yu̱nu̱s jab-su̱ ne̱t-tu̱ ya jab u̱du̱ Ye̱so̱. E̱ ho̱k u̱s-ryab sok remu̱ zu̱ a-dor zu̱u̱g Ye̱so̱ wa o̱ fu̱n-yu̱ kwu̱m-du̱ fat-du̱ za u̱r-ma. 24 Yu̱nu̱s-du̱ u̱s-jab takku̱n u̱du̱ yaku̱n campa-ya wa-u̱ u-zwa na zu̱ wa Dimitiriyus. Wa mu̱ye̱ pyu̱-m re̱k-mo̱ u̱ azurfa mu̱ o̱tte̱ sha-mu̱ pyu̱ yat-o̱ u̱ Atemis.[a] Ne̱t-tu̱ o̱ pyu̱-m mo̱ remu̱ e̱ ye'et Atemis m-ze̱g. Dimitiriyus u̱ to̱ko̱n ne̱t-to̱ ne̱ kwu̱mu̱g shik sok u̱ remu̱ cerpa-u o̱. 25 Wa fog u̱n be̱e̱t, u̱r-kot u̱ a go̱-du̱ sa-u o̱ ne̱, wa zu̱, <<No̱ ne̱t-ne̱, no̱ nak u̱zu̱ sa-u uno̱ o̱ it kumte̱ shik sok. 26 No̱ hyang tu̱msu̱ no̱ ho̱k, bo̱-u̱ Afisa o̱ war-o̱ da, dak-u̱ Asiya u-be̱e̱t, Burus uya paru̱g u̱t-ne̱t u-tát sok. Wa byu̱u̱g hi-u̱t u̱n u̱zu̱ ru̱-u̱ ne̱t no̱me̱ kom-u̱t wa, a ru̱-o̱ da. 27 Za hen u̱t-no̱m u̱ so̱-se̱ iya da. U̱n de̱ na-su̱ dim-du̱ cerpa-u in. A Burus u̱ re̱ shu̱ u̱t-no̱m inya, u̱t-wa u̱ ne̱t-tu̱ yage̱ no̱mu̱ Atemis ru̱-u yat-o̱ u̱t-huuk. Tu̱msu̱ na de̱ mo̱t-du̱ o̱ u̱ sek-m wa ne̱, no̱m-u̱ ne̱t-tu̱ dak-u̱ Asiya u-be̱e̱t har dak-u uno̱ o̱ no̱me̱-du̱ u̱t-huuk.>>

28 Da-u̱ e̱ ho̱ge̱ inya, se̱ e̱ hog u̱s-ryab sok, e̱ yu̱ns u̱s-cwar u-da u-gan e̱ zu̱, <<m-Sek u̱du̱ Atemis u̱ Afisa-ne̱!>> 29 Bo̱-u̱ rukuste̱, ne̱tu̱ ku̱su̱n m-ha u̱ be-du̱ u̱r-mo̱ro̱g, u̱n o̱ nak-du̱ Gayus u̱ Aristakus ne̱, i rwu̱ne̱ du̱gu̱ dak-u̱ Makidoniya, e̱ o̱ye̱ hu̱u̱b-tu̱ u̱r-no̱ku̱ Burus. 30 Burus cwang wa cwa u̱du̱ u̱r-mo̱ro̱g, se̱di a-doru̱ Ye̱so̱ ne̱ hoos wu̱n m-ha. 31 To̱ko̱n ne̱nge̱n-tu̱ dak-u̱ Asiya, i o̱ hu̱u̱b-u̱t Burus ko̱ e̱, e̱ tom waku̱n u̱du̱ rò m-ho̱r m-ho̱r u̱zu̱ a wa jar wa cwa u̱ be-du̱ u̱r-mo̱ro̱g da.

32 Ne̱t-ne̱ be̱e̱t i mo̱rge̱ no̱m-u̱ zuste̱ kowan, remu̱ zu̱ u̱n nak ko yan-o̱ wa u̱n u̱t-mo̱ro̱g da. E̱ke̱n jaku̱s u̱s-cwar e̱ o̱ se̱ke̱n rem-se̱, tu̱msu̱ e̱ke̱n hu̱ warru̱ su̱ e̱. 33 Yahuda-ne̱ tok waku̱n u-shu̱ wu̱ e̱ foge̱ Are̱kzandariya, wa jaku̱s kom-u̱t wa u-ru̱ remu̱ ne̱t-tu̱ ho-u̱t u̱s-ram. Wa u̱t-sa wa waru̱ u̱n u̱zu̱ yu̱ns-du̱ jab ku̱mge̱ u̱du̱ Yahuda-ne̱ da.

34 Da-u̱ nape̱ u̱zu̱ wu̱n wa-yahuda wa u̱n yu̱ns cwar-u̱s u̱n uda u-gan u̱n zu̱. <<M-Sek u̱du̱ Atemis wu̱ Afisa!>> U̱n teeg u̱s-kwam u̱s-yu̱r u̱ no̱m-du̱ u-no̱m u-gan.

35 Da-u̱ wa-u̱s-ge̱n yu̱ bo̱-u o̱ wa u̱ u̱n u̱ ho̱-du̱ u̱s-ram, se̱ wa zu̱, <<No̱ ne̱t-tu̱ Afisa, kowan nak u̱zu̱ bo̱-u̱ Afisa o̱ u̱ gwat-du̱ pyu̱-u̱ yat-o̱ u̱ Atemis, tu̱msu̱ wu̱ sha-m wa he̱ne̱ du̱gu̱ do̱m u-ru̱. 36 Ba shu̱'u̱te̱ ka u̱t-no̱m zaar na se̱ no̱m-u̱t to̱ da, ku̱mge̱ no̱ rest jab, a no̱ no̱m ko-uyan u̱ te̱k-u̱ m-ho̱r da. 37 No̱ hattu̱n ne̱t-u̱t tun-to̱ u̱ ane̱, remu̱ zu̱ e̱ no̱ng no̱m-u̱t yo̱-o̱ da. E̱ no̱ng u-hiw u̱-me̱ pyu̱-u̱ yat-o̱ u̱ Atemis. Tu̱msu̱ e̱ pyapu̱k ru̱-u in da. 38 Se̱di abite̱ Dimitiriyus u̱ i o̱ u̱r-kot u̱ wane̱ o̱tte̱ o̱ko̱n no̱m-o̱ u̱ e̱kse̱ e̱ u̱ waku̱n ne̱, kur-u̱ kwu̱p-du̱ u̱s-rem u̱ ya u̱r-hu̱k, tu̱msu̱ a-kwu̱p-du̱ u̱s-rem o̱ro, se̱ e̱ hu̱u̱t u̱s-rem. 39 Tu̱msu̱ abite̱ o̱ko̱n o̱ro u̱ no̱ u̱t-sa no̱ shit, se̱ na mang ko-uyan u̱-me̱ u̱r-mo̱ro̱g. 40 U̱t-nip, u̱m o̱ m-hyan u̱zu̱ in o̱ te̱k-u̱ a swadu̱ u̱r-ko̱b ne̱, ba shu̱'u̱te̱ u̱zu̱ in za keru̱ warru̱ o̱ko̱n no̱m-o̱ u̱ hatu̱n uno̱ gwu̱z-o̱ u̱ ya-o̱ da. A faru̱k-u̱ Roma u̱ shite̱ u̱zu̱ gwu̱z-u̱ yan-o̱ na o̱tte̱, in zatte̱ no̱m-u̱ u̱t-zu̱ da.>> 41 Da-u̱ wa tase̱ u̱s-rem inya se̱ wa zu̱ u̱ ne̱t-tu̱ aru̱k.

<- Pama-u̱ 18Pama-u̱ 20 ->