1 [a]Nde na phorgap guigira Zisas khothɨgi gumgi gu mbigi, gu taagiap mba nde suaŋgi buna vhuueŋ ga ndɨkndɨgɨr zav, nde ndɨkndɨgi khavi. Nde mba buna vhuueŋ ndigap, nde ne khothɨgap ne zɨn vov, thɨga havhargi. 2 [b]Nde maaŋ muuŋgip gu nde suaŋgi buna vhuueŋ suira havhargirga, mba buna vhuueŋra suaŋv Fhe Bakɨme taagip nde ndigirga. Ne khaŋ muuŋgi, nde fhura ne mbararagi fhu, nde ne khothɨgi.

3 [c]Gu mba buna bakɨ guareŋra, gu nen nde suaŋgi. Mba buneŋ Guma Bakɨme nduara fhum ne na nɨɨŋgi. Mba kameŋ khaŋ nzuai, Krais, ana nza fhum muuŋgi tɨvi mbatɨgi, ana za nta vhɨzɨ zav rimgi. Ana Fhe Bakɨme buni vhuuiŋ ki gavar ki kameŋ suaŋgi kameŋra zɨn vugi. 4 [d]Ana rimgim, mbe ana ndim, kɨma thoon muuŋgi mboga tɨgim, ra phuni vhɨzgim, khegenen ana taagiap khavgi. Ana mba Fhe Bakɨme buni vhuuiŋ ki gap suaŋgi kameŋra zɨn vugi. 5 [e]Ana khavgiap, vov Pitar hɨgap, ana zumgum vov mba farasarigi 12 thɨgi ŋaara gumgir hɨgim, mbe ana gangi. 6 Tuga mben, guigira Zisas khothɨgi gumgi gu mbigi vhɨrve vhɨra ana gangi. Mben vhɨrve 500 kambarigi. Mba ana gangi gumgi vhɨrve khar ki, mbe mbari vhɨzgi. 7 [f]Ana tuga mben vhɨra Zemsan hɨgi. Zumgum, ana wom mba farasegi 12 thɨgi ŋaara gumgi hɨgim, mbe za ana gangi.

8 [g]Mbe ana gangim, ana zɨ guarara, ana vhɨra nan hɨgi. Maaŋ muuŋgiap, ana nan hɨrga tugar nan hɨgi fhuvara, nan niamuuŋ ana guigira zɨ guarara na tegi fara muuŋgi. 9 [h]Gu maaŋ muuŋgiap ne nzuai, gu ana farasegi 12 thɨgi ŋaara gumgi rɨgar, gu guigira bisaŋgi. Gu mbe ana farasarigi ŋaara guman nan kamɨnga tuktɨgi fhu. Ne khaŋ muuŋgi, gu fharav mba guigira Zisas khothɨgi gumgi gu mbigi, gu mben farfagi. 10 [i]Gu maaŋ mbuim, Fhe Bakɨme guigira tɨvar vhuun na mbuav fhura nan kora muuŋgiap na muuŋgim, gu ntigem kha fara muuŋgiap khar ki. Ana fhura na kora muuŋgi kora muumbar, ana fhura vugi fhuvara. Zakɨra fhuvara! Gu khaŋ tɨga ŋkasŋkagiap ŋaara mbatɨga mbuav, gu mba ana farasarigi ŋaara gumgi, gu mbe kambarigi. Gu nduara mba ŋaari ga mbui fhuvara. Zakɨra fhuvara! Fhe Bakɨme fhura nan kora muuŋgiap, ana ŋkasŋkar na ndɨɨim, gu mba ŋaari ga mbui. 11 Gu mba ŋaara mbui, mba Zisas farasegi ŋaara gumgi, mbari vhɨra mba ŋaara mbui, nza zam mba Zisas rimgiap taagia khavgi bunan vhuueŋ, nza za nera bun nzuai. Nde ne mbararagiap, ne khothɨgi.

12 Nza zazera Krais rimgim, Fhe Bakɨme taagia ana khavgi, ne bun nde nzuai. Ram muuŋgi ne nzuav nde rɨgar ki mbari mbe khaŋ nzuai, “Fhe Bakɨme guma rimgirim, ana taagi khavgirga tuktɨgi fhu?” 13 Ne guigira, maaŋ muuŋgip, guma rimgip taagi khavɨrga fhuv, Fhe Bakɨme taagiap Krais khavgi fhu. 14 Maaŋ muuŋgip, Fhe Bakɨme guigira taagia Krais khavgi fhu, nza kha bun nzuai buna vhuueŋ, ne fhura ki buneŋ ma. Nde vhɨra guigira Zisas khothɨgi ndɨkndɨk, ne vhɨra fhura ki ne ma. 15 [j]Maaŋ muuŋgirga, ne khueŋ mbe khɨvɨrga, nza fhura shɨshɨgap Fhe Bakɨme muuŋgi bigen nde guiguigi gumgi ma. Ne khaŋ muuŋgi, nza guigira thugara phɨrgiap, khaŋ nzuai, Fhe Bakɨme taagiap Krais khavgi. Maaŋ muuŋgip, Fhe Bakɨme guigira vhɨzgi gumgi, ana taagip mbe khavgirga tuktɨgi fhu, nza khaŋ suanga, ana taagia Krais khavgi fhu. 16 Ahaŋ, guigira, Fhe Bakɨme maaŋ muuŋgip vhɨzgi gumgi, ana taagi mbe khavɨrga fhu, Fhe Bakɨme ana taagiap Krais khavgi fhu. 17 Maaŋ muuŋgip, Fhe Bakɨme guigira taagiap Krais khavgi fhu, nde guigira Krais khothɨgi ndɨkndɨk, ana nden kurarga tuktɨgi fhuvara. Nde mba fhum muuŋgi tɨvi mbatɨgi, nta mbara muuŋgip nden kɨrga. 18 Mba guigira Zisas khothɨgap vhɨzgi gumgi gu mbigi, mbe vhɨra fhɨreregim, Fhe Bakɨme taagiap mbe ndigi fhu. 19 Nza guigira Krais khothɨgap, ana tɨvar vhuun nzan muun zav, nza ana rarga wari ki. Nza maaŋ muuŋgip, kha nuiana bigi ndir saŋv ntara suaŋv, guigira Krais khothɨgɨp anan rargɨp kɨrga, nza guigira fhɨreregi. Mba nuiana gumgi mbari, mbe vhɨra sagi tari ma. Nza mbe kambarav, nza guigira sagi tari guarira kɨrga.

20 [k]Ne maaŋ muuŋgi fhuvara! Zakɨra fhuvara! Krais, ana guigira rimgim, Fhe Bakɨme guigira taagia ana khavgi. Ana vhɨzgi gumgi gu mbigi, ana mbe kharav fhara khavgi. Ana mba mɨnan fharav gɨvigi mban fara muuŋgi. 21 [l]Nza maaŋ muuŋgiap khueŋ kaŋgi, nza taagi khavgirga. Ne khaŋ muuŋgi guma mbevi, ana vhɨzgi ne ndi hiaŋtɨgi. Mba tɨvara guma mbevi, ana taagia khavi ne ndi hiaŋtɨgi. 22 Ne khaŋ muuŋgi, Adam shɨga gumgi, mbe vhɨzi gumgi ma. Mba tɨvara, guigira Krais khothɨgap ana zɨn vui gumgi gu mbigi, mbe zumgum vhɨzgip, mbe taagi khavgip, kɨrga. 23 [m]Nza zam, nza Fhe Bakɨme sarigi tugara, nza taagip khavgip, nza zazera mbara muuŋgiap ki bɨɨŋbɨɨŋ ndirga. Krais, ana fharigi Fhe Bakɨme fharav Krais khavgi. Ana zumgum taagi zirɨrga, ana ntɨɨri taagi khavgip mbara muuŋgip kɨrga.

24 Mba tugen, kha nuian gu bigi za vhɨzgirga. Krais, ana za mba bigir farfav za nta vhɨzgip, ana mba ŋgui vhɨrve gari gumgir pani, ana za mben ŋkasŋka vhɨzɨv, mba ŋkasŋka kav kha bigi gari ŋiniŋgi mbatɨgi, ana za mbe ŋkasŋka vhɨzɨv, mba ŋkasŋka ki bigi, ana za nta ŋkasŋka vhɨzgip, kha nuianan Fhe Bakɨmen farve khɨngirga. 25 [n]Ne khaŋ muuŋgi, Krais ana ŋgui vhɨrve gari guman pan kɨv kɨrim, Fhe Bakɨme anan pana gumgi, ana za mbe mbevarga. 26 [o]Ana vhɨzi tɨv, ana mpuur ana vhɨzgirga. 27 [p]Fhe Bakɨme buni vhuuiŋ ki gap khaŋ nzuai, “Fhe Bakɨme za mba bigi mbevav nta muuŋgim, Krais za nta ganɨrim, nta ana piin ki.” Mba kameŋ khaŋ nzuai, Fhe Bakɨme nduara za mba bigi mbevagim, Krais nta ganɨrim, nta ana piin ki. Maaŋ muuŋgiap, nza kaŋgi, Fhe Bakɨme, ana Krais piin ki fhuvara. 28 Mba bigi zumgum za Krais piin kɨrga. Fhe Bakɨmen Kam, ana nduara wo ndiv Fhe Bakɨme piin khɨngirga. Fharav, Fhe Bakɨme za kha bigir won Kama piin khɨngirga. Ana Kam, ana nduara wo ndiv won Ndia piin khɨngirga. Ana Ndia Fhe Bakɨme, ana guigira za kha bigi gari guman pan kɨrga.

29 Maaŋ muuŋgip, mba vhɨzgi gumgi gu mbigi, mbe taagi khavgirga tuktɨgi fhu, nde thagɨna nɨɨeŋ nzuav gumgi mbari vhɨzgi, gumgi gu mbigir kurkurar zav mbe nzuav Fhe Bakɨme zɨn panan ruai? Mbe taagi khavɨrga fhuv, mbe thaaŋ nzuav fhura shɨshɨgap mben kurkurar zav Fhe Bakɨme zɨn panan ruai? 30 [q]Nza thaaŋ nzuav fhura shɨshɨgap zazera kha ŋaara mbuim, gumgi vhɨrve nza mbui ŋaara nzuav nza vhegap, zazera nzan farfar za mbui. 31 [r]Nde na phorgap guigira Zisas khothɨgi gumgi, gu guigira nde nzuai, gu rari tugara tɨgap, gu kha ndɨkndɨga mbui, mbe na shogirim, gu rimgirga. Nza za Krais Zisas phorga kav, gu guigira nden ndikndigi. Maaŋ muuŋgiap, gu kha kamen nde vhagi fhuvara. 32 [s]Nde maaŋ muuŋgip kha ndɨkndɨgar nan muunga, gu wo vuzvugara kha ŋaara mbui, nde na suaŋri. Gu thaŋ thagɨna bigɨna ndir saŋv, gu Efesusan mba ruaŋruaŋgi sɨgi phorga shogɨrie? Maaŋ muuŋgip, guma rimgirim, Fhe Bakɨme, taagip ana khavgirga tuktɨgi fhu, aria, “Nza kɨvgip mban mbɨv, khɨrɨv pharar mbɨri. Ne khaŋ muuŋgi, nza gurmaŋgip nza vhɨzgirga.”

33 Nde mbarara. Nde fhura harigi gumgi ganɨrim, mbe nde guiguigi khaŋ suaŋ thari, “Guma rimgip taagi khavgirga fhu.” Nde mba kameŋ kaŋgi, “Nza khurkhuman mba gumgi mbatɨgi khuarga, mbe nzan tɨvar vhuun farfagirga.” 34 [t]Nde mba pham ndɨkndɨgi ndɨkndɨgi mbatɨgi, nde nta thav, ndɨkndɨgi vhuuiŋra muuŋri. Nde wom tɨvi mbatɨgir muuŋ thari. Nde mbarara. Nden mbari, mbe tuituigiap Fhe Bakɨme kaŋgi fhuvara. Gu ne nzuav khaŋ nzuai, nde wari wo mbui tɨvir mberɨri.

35 [u]Maaŋ muuŋgip, guma the khaŋ muuŋgip nzanga, “Mba vhɨzgi gumgi, mbe taagip ram muuŋgi khavar muuŋgirie? Mbe taagip khavɨrga, mben fhavi ram mbui kheshararie?” 36 [v]Mbe ramgi khesharigi buna mbatɨgeŋ mbare? Nde kaŋgi, nde mba wit ndi mɨna fuigi, nta fharav rimgiap, khurigiap, nta wom thooŋgiap, vhuui. 37 Nde mba rɨgi mban vhɨgi, nta vhɨgi, nta wit o, harigi khesharigi mban vhɨgi, nta vhɨra mba zumgum hɨgɨp vhuunga wit fara muuŋgi fhuvara. 38 [w]Fhe Bakɨme, ana nduara won vuzvugar, kharɨgin nta ndɨɨi. Maaŋ muuŋgiap, ntan kharɨgi nta warira fara muuŋgi fhuvara. 39 Kha ŋamki bigi, nta vhɨra mba tɨvara muuŋgi. Mben fhavi, nta warira farara muuŋgi fhuvara. Zakɨra fhuvara! Guma fhav, ana harigi khesharigi, sɨgi, nta fhavi harigi khesharigi, korigi fhavi, nta harigi khesharigi, mbɨgama fhavi, nta vhɨra harigi khesharigi. 40 Kha buivar ki bigi, nta wari won fhavira. Kha nuianan ki bigi, nta wari won fhavira. Kha buivar ki bigi, nta won sɨɨŋra, kha nuianan ki bigi, nta won sɨɨŋra. 41 Ra, ana won sɨɨŋra, kɨni, ana won sɨɨŋra. Kha buivar ki ŋkaa, nta vhɨra, nta won sɨɨŋra, nta vhɨra mba ŋkaa bevbevira, ntan sɨɨŋ wari heigi.

42 [x]Mba guma rimgiap taagia khavi tɨv, ana mbara muuŋgi. Guma rimgim, nza mba fhava khɨgap ana ndi mboga rɨgi, mba fhav, ana mbarɨgi fhav ma. Guma rimgiap, kegap taagia khavi fhav, ana mbarɨgi fhav fhuvara. 43 [y]Guma rimgim, nza mba fhava khɨgap, ana ndi mboga rɨgi, mba fhav, ana gangan nzerigi fhuvara. Guma rimgiap taagia khavi fhav, ana fhav gangan guigira nzerigi. Guma rimgim, nza mba fhava khɨgap ana ndi mboga rɨgi, mba fhav, ana ŋkasŋka ki fhuvara. Guma rimgia kegap taagia khavi fhav, ana guigira ŋkasŋka ki fhav ma. 44 Nza mba mbogi ga rɨgi fhavi, nta kha nuiana fhavi ma. Rimgiap taagia khavi fhavi, nta Fhe Bakɨme Ŋina Ŋaar zazera mbara muuŋgiap ki bɨɨŋbɨɨŋ ndia ndɨɨi fhavi ma. Nza Hevenan kɨrga fhavi ma.

Maaŋ muuŋgiap, nuiana fhavi ki, vhɨra Hevenan fhavi ki. 45 [z]Fhe Bakɨme buni vhuuiŋ ki gap khaŋ nzuai, “Fhe Bakɨme fharav guma ga muuŋgiap bɨɨŋbɨɨn ana nɨɨŋgi, mba guma zɨ Adam.” Mba zɨ guarara hɨgi Adam, ana Krais ma. Fhe Bakɨme zazera mbara muuŋgiap ki bɨɨŋbɨɨŋ gumgi ga ndɨɨi Ŋina anan ki. Ana vhɨra zazera mbara muuŋgiap ki bɨɨŋbɨɨn wo gumgir nɨɨŋgirga tuktɨgi. 46 Hevenan kɨrga fhav fhara hɨgi fhuvara. Kha nuianan fhav, ana fharav hɨgi. Guma rimgim, Hevenan kɨrga fhav zumgum guman hɨgi. 47 [aa]Fharigi Adam, ana kha nuiana guma ma. Fhe Bakɨme kha nuiana ndigap ana fhava muuŋgi. Zumgum hɨgi Adam, ana Hevenan kegap zergi. 48 Kha nuiana gumgir fhavi, mbe zam mba nuiana guma fhara fara muuŋgi. Mba Heven gumgir fhavi, mbe mba Hevenan kegap zergi guma fhavara farar muuŋgirga. 49 [bb]Nza ntigem, nza mba nuiana guma fara muuŋgiap ki. Nza mba tɨvara, nza zumgum mba Hevenan kegap zergi guma fhavara fara muuŋgip kɨrga.

50 [cc]Nde na phorgap guigira Zisas khothɨgi gumgi gu mbigi, gu tuituigira khar nde nzuai. Kha nuiana fhava khɨga ki guma, ana Fhe Bakɨme won gumgi gu mbigi garim, mbe ana piin ki ŋgun vhen ŋgirgɨp, ana bigir vhuuiŋ ndigirga tuktɨgi fhuvara. Mbarɨgi bigɨn, ana mbarɨgi fhuv bigɨna ndigirga tuktɨgi fhuvara. 51 [dd][ee]Nde mbarara! Gu Fhe Bakɨme vhagi buna mueŋ, ana ntige ne bun suan zav nzuaim, gu ne bun nde suan za mbui. Nza maaŋ muuŋgip, nza za vhɨzgirga fhuvara. Nzan fhavi zam harigi khesharav hegɨrga. 52 [ff]Mba tɨv, mba mpuur mbarɨp sɨmɨra tharga, nzan fhavi harigi khesharav hegɨrga. Ahaŋ, mba mbarɨv sɨmɨnga, mba vhɨzgi gumgi gu mbigi, mbe taagip khavɨrga, mben fhavi wom mbarɨgɨrga tuktɨgi fhuvara. Nza kha vhɨzgi fhuv gumgi, nza vhɨra nzan rɨmgi vhɨra khuasegi farar muuŋgip, nza zam, nzan fhavi harigi khesharav hegɨrga. 53 [gg]Ne khaŋ muuŋgi, kha mbarɨgi fhavi, nta harigi khesharav, nta wom mbarɨgɨrga fhu. Nta nzerara kɨv zazera mbara muuŋgip kɨrga. Nza kha vhɨzi fhavi, nta harigi khesharav, nta wom vhɨzgirga tuktɨgi fhuvara. 54 [hh]Kha guigira mbarɨgi fhavi, nta harigi khesharav, nta wom mbarɨgɨrga fhu, nta zazera nzerara kɨrga. Kha vhɨzi fhavi, nta harigi khesharav, nta zazera mbara muuŋgip kɨrga. Mba tugen, Fhe Bakɨme buni vhuuiŋ ki gap suaŋgi kameŋ guigira hɨgɨrga. Fhe Bakɨme buni vhuuiŋ ki gap khaŋ nzuai, “Fhe Bakɨme ntara mbuav, mba Vhɨzi tɨvar ŋkasŋka, ana guigira ana kambarigi.” 55 [ii]Ana ana kambaragim, nza khara mbuav khaŋ ana nzuai, “Vhɨzi, ndun ŋkasŋka maaŋ ki? Ndu kha gumgi kambararie? Vhɨzi, ndun fugar ŋkasŋka mba, ndu kha gumgir farfarga?”

56 [jj]Gumgi vhɨzi fugara khare, mbe tɨvi mbatɨgi muuŋgiap nen vheza ndirgen rivgi. Mbe tɨvi mbatɨgi vheza ndi ne khaŋ muuŋgi, mbe Fhe Bakɨme suaŋgi tɨvi daasui. 57 [kk]Nza Fhe Bakɨmen ndikndigɨrga. Ana nzan kurigim, nza Bakɨme Zisas Kraisan ŋaara ŋkasŋkar panan, nza ntara mbuav, ntara kambarigi.

58 [ll]Maaŋ muuŋgiap, nde na phorgap guigira Zisas khothɨgi gumgi gu mbigi, gu guigira won ndavar nde nɨɨŋgi, nde thɨgɨ havhargip thaneŋ phogirɨ thari. Nde khueŋ kaŋgi, nza Guma Bakɨme nzuav ŋaara mbatɨga mbui, mba ŋaar fhura mbar ŋgɨgɨrga tuktɨgi fhuvara. Maaŋ muuŋgiap, nde zazera khaŋ tɨgɨp ŋkasŋkagip, Guma Bakɨmen ŋaarar muuŋri.

<- 1 Korin 141 Korin 16 ->