11
Jaalala Waaqni Israaʼeliif Qabu
1 “Israaʼel yeroo daaʼima turetti, ani isa nan jaalladhe;
ani Gibxii ilma koo waameera.
2 Garuu hammuma ani itti deddeebiʼee isaan waamu,
isaan narraa fagaachaa deeman.
Isaan Baʼaaliif aarsaa dhiʼeessanii
fakkiiwwaniif ixaana aarsan.
3 Kan irree isaanii qabee Efreemin
miillaan deemuu barsiise anuma;
isaan garuu akka ani
isaan fayyise hin hubanne.
4 Ani funyoo gara laafina namaatiin,
hidhaa jaalalaatiinis isaan nan harkise;
ani morma isaanii irraa waanjoo fuudhee
isaan sooruuf gadan jedhe.
5 “Isaan qalbii jijjiirrachuu waan didaniif
Gibxitti hin deebiʼan;
Asoor garuu isaan bulcha.
6 Goraadeen magaalaawwan isaanii keessatti balaqqisa;
raajota sobduu isaanii ni barbadeessa;
karoora isaaniis ni fashaleessa.
7 Sabni koo narraa deebiʼuuf kutateera.
Yoo isaan Waaqa Waan Hundaa Olii waammatan iyyuu
inni gonkumaa ol isaan hin qabu.
8 “Yaa Efreem ani akkamiinan dandaʼee si dhiisa?
Yaa Israaʼel ani akkamiinan dabarsee si kenna?
Ani akkamiinan dandaʼee akka Adimaa si godha?
Akkamiinan akka Zebooʼiim si godha?
Garaan koo na keessatti geeddarameera;
gara laafinni ani siif qabu guddateera.
9 Ani dheekkamsa koo sodaachisaa sana gad hin dhiisu;
yookaan ani deebiʼee Efreemin hin balleessu.
Ani Waaqa malee nama miti;
ani Isa Qulqulluu gidduu kee jiruu dha.
Ani dheekkamsaan hin dhufu.
10 Isaan Waaqayyoon duukaa buʼu;
inni akkuma leencaa aada;
yommuu inni aadutti
ilmaan isaa hollachaa lixa biiftuutii dhufu.
11 Isaan akkuma simbirroo Gibxi irraa,
akkuma gugee ollachaa
Asoor irraa dhufu.
Ani mana isaanii keessa isaan nan jiraachisa”
jedha Waaqayyo.
Cubbuu Israaʼel
12 Efreem sobaan, manni Israaʼel immoo
gowwoomsaadhaan na marse.
Yihuudaanis Waaqatti,