Kitaaba Ermiyaasii Raagichaa 15

Muraa Kolbaa Yihuda'aatitti Dhufu'uu Jirtu

1 Achiin duuba Mootii Waan Maraa anaan, «Muuse'ee fi Saamu'el yoo na dura dhaabbatanelle, ani kolbaa tanaaf hin mararu. Fuula kiyya duraa isaan ari'i! Deemanuu ti. 2 Isaan, ‹Nuuti eessa deenna› jedhanee yoo si gaafatane, akkuma ani Mootiin Waan Maraa sitti hime,

« ‹Worri akka du'u itti murante, du'uu qaba;

worri shallaaga'aan akka du'u itti murante,

shallaaga'aan du'uu qaba;

worri beelaan akka du'u itti murante, beelaan du'uu qaba;

worri akka booji'amu itti murante,

hin booji'ama› jedhiin.

3 «Ani waan isaan balleessu afur shallaagaan akka isaan ijjeesu, sareen reeffa isaanii akka harkittu, allaatti'ii fi bineensoti nyaatanee akka isaan balleessanu isaanitti hin erga. 4 Mootiin Yihuda'aa ilmi Hisqiyaasii minaaseen, Yerusaalem keessatti yakkaa waan hujeef, mootummoota biyya lafaa maratti waan hantuu nami dhaggee bararaqu isaan hin godha.

5 «Ee Yerusaalem!

Eentu si'iif marara?

Eentu si'iif bowa?

Eentu dhaabbatee

nageya si fuudha?

6 Ati na lakkitteerta;

gara duubaa deebiteerta;

tanaaf harka kiyya si irratti diriirsee, si hin balleessa;

haganaa achi si'iif hin mararu.

7 Kolbaan tiyya karaa ifii irraa deebi'uu waan diddeef,

akka nama horooro'oon midhaan qulleessuu,

karra qachoota lafa sanii duratti

ani isaan hin bittinneessa.

Ijoollee isaanii fixee,

kolbaa tiyyalle hin balleessa.

8 Ani haadhotii hiyyeessaa ta isaanii,

maansa abbaaya'aa caalaa akka bacatanu hin godha.

Haadhotii dargaggootaatitti,

guyyaa saafowaan ka balleessu itti hin fida.

Farraa fi bararaqa

dedhuma isaanitti hin fida.

9 Haati ilmaan torbaa gaggaddee hin harganti;

ifi guyya'aa isi'itti dukkana;

isiin fokkifattee hin salphatti;

worra jiru'uun hafe shallaagaa diinota isaaniititti,

dabarsee hin kenna» jedhe.

10 «Haadha tiyya, naaf aanne'e!

Maaf na deette?

Ani nama lafa tanaa mara woliin

nama morkuu fi nama moromu te'eera.

Ani eennulle'eef hin liqeessine

yookiin eennu irralle'ee hin liqaaffanne;

te'uu malee nami marti na abaara.

11 Mootiin Waan Maraa, «Ani dhugumaan kaayoo dansa'aaf si baase; yennaa badi'ii fi rakkinna keetii diinoti keeti akka si kadhatanu hin godha. 12 Nami sibiila yookiin sibiila sageettu'uu ka biyya kaabaatii dhufu cassuu hin dande'aa ree?

13 «Sababa cubbuu teessanii maraaf karraa fi qabeenna keessan gatii malee worra saamutti dabarsee hin kenna. 14 Aariin tiyya ibidda isin gubu isinitti waan qassiittuuf, lafa hin beenne keessatti diinota keessaniif garba akka teetanu isin hin godha» jedhe.

15 Achiin duuba ani, «Ee Mootii Waan Maraa, ati hin beetta;

na qaabadhuutii na qarqaar;

worra na miidhulle ati naaf haluu bayi.

Ati ossaamessa waan teeteef,

na hin balleessin;

ani si'iif jedhee akka salphadhe hin beetta.

16 Ee Mootii Waan Maraa, Waaqa Waan Mara Dandeettu,

ani maqaa keetiin waan waamameef,

jechi keeti yennaa gara kiyya dhufe,

ani nyaadhee, gammadee burraaqe.

17 Worra caaqu woliin tee'ee,

isaan woliin hin laallifanne.

Harka keeti jala waan jiruuf,

ati aari'iin waan na guutteef,

qofii tiyya tee'e.

18 Dhibeen tiyya maaf natti jabaatte?

Madaan tiyya maaf kulkultee fayyuu didde?

Ati akka burqaa bisaanii ka nama sobuu,

akka madda goguu maaf natti teeta ree?» jedhe.

19 Tanaaf Mootiin Waan Maraa, «Ati cubbuu irraa yoo deebite, ani adde'etti si hin deebisa; atille na hin tajaajilta. Ati dubbii woy hin baane lakkittee, dubbii woy baatu yoo dubbatte, ati ammalle raagaa kiyya hin teeta; kolbaan gara keeti deebituutii malee ati gara isaanii hin deebitu. 20 Ani kolbaa tanaaf akka dalleya sibiila sageettu'uutiin ijaaramee si tolcha. Isaan si loliisaaf si irratti hin ka'an; ammoo ani si fayyisiisaa fi si baasiisaaf si woliin waan jiruuf, isaan si hin injifatanu. 21 Ani harka worra hamoole'eetii si hin baasa; harka worra gadhi-jabeeyyi'ii keessalle'ee si hin woda» jedha.

<- Kitaaba Ermiyaasii Raagichaa 14 Kitaaba Ermiyaasii Raagichaa 16 ->