Pola Pilimonmo tiratna timbiŋ rapar
Outna kam
Pilimon ma ramoot paŋan ian. Na ma Kolosi auŋ aniacna Iesusa rɨpacrena laiplacarta ian. Na mana tuomna aiŋ kamainda morena ramoot ianna, mana ia Onesimus, ma ndona an ramoot paŋanmo tɨkcarica, kɨpcarica kabena auŋa taŋrina. Na an auŋa tɨkca Onesimusa Polmo, watca ma Iesusa rɨpacrena laiplacarta ian ndarurina.
Na an mɨnna Pola ma kac ŋgoreaca eacrenan, na ma Pilimonmo taŋga watna mɨnna wanaiŋ. Aintik ma gan timbiŋ rapara tirra Onesimusa neaŋrina, na ma manmo mandaca ma ndona ramoot paŋan ndambuŋa mac nda taŋrina. Na gan timbiŋ raparna inikna kamma ma Pilimonmo aindoprina, ma ndona an tuomna aiŋ kamainda morena ramootmo, kaega kai mo teac. Na an tuomna aiŋ kamainda morena ramootta, ma Iesusa rɨpacrena laiplacarta ian ndarurina, aintik Pilimonna manmo ndona kakana kirar toc naaŋgɨ.

1 Epe 3.1Aku Pol, Karais Iesusna aiŋa morena ramoot, na anna moca aku kac ŋgoreac, ndeacrena ramoot. Na gan timbiŋ rapara tiratna kamma, aukapa, aina lapmbitac Timoti, aŋga un Pilimonmo tirca neaŋga kɨpekna timbiŋ rapar. Na u aina aikndamoot laŋ, na aina aiŋ kabena ramoot laŋ. 2 Kol 4.17, na 2 Ti 2.3Na aŋga, aŋna mbi Apiamo, an timbiŋ rapar kabe toca neaŋga taŋrina, na Akipus motocmo an timbiŋ rapar kabea neaŋga ma watatna. Na an Raraŋ Aetaniacna runduŋa aia eacrenanna, ma toco aiap ruŋrena ramoot ian. Na una kacna Iesusna rɨtɨpaikta meikramtaɨrta tumbun motomo, aŋga an timbiŋ rapar kabemo neaŋga taŋgatna.

3 Gal 1.3Ainda moca aina Aet Raraŋ Aetaniacapa Kacoot Karais Iesusa, nenmo kadmaica nena iroar inkarmo moi wewettaca laiŋ teacnandet.

Pilimonna tɨpemb kirarir laiŋta moca Polmo moca ma toŋtoŋ ŋgoin

4-5 Ainda moca memetmbaca mina aukmo aindoprena, u Kacoot Iesusmo matau rɨpacrena, na u Raraŋ Aetaniacna meikramtaɨrmo matŋirenan ŋgoin. Aintik aku memetmbaca ndona Raraŋ Aetaniacmo mbendeirena, na memetmbaca una moca aku lamŋirena, na Raraŋ Aetaniacmo kam laŋa neaŋrena. 6 Na u Karaisa rɨpacrenan tik, u aiap mɨkrina. Na aku Raraŋ Aetaniacmo mbendeica, ma una rɨtɨpacmo moa laŋ ndaruca, u iroar laiŋga aŋgɨnandet. Te, reik laiŋga Karaisa umo neaŋrenanmo, u matau lamŋinandet. 7 Aintik kaka, u Raraŋ Aetaniacna meikramtaɨrmo matŋirenan, na an tɨp kirar mbuŋa u mina nikinik iroara moa gagraca mina laŋan wetwet ndeacrena. Na anna ndo aukmo moca aku toŋtoŋ bagaraniacap, na aukna nikinik iroa moca gagrarena.

Pola toŋgorenanna Pilimonna Onesimusmo ndona lapmbitac toc mac aŋgɨna

8-9 Ainda moca aku gaind ndamŋirena, aku umo an tɨp kirar laŋa mona kam gargara mba neaŋitndai. Na kabena meikramtaɨrmo matŋirena tɨp kirara, ma aŋmo aŋgɨ mɨkrenan, na aku unmo kam wetwet mbuŋa mambopek. Na aku Pol, aku ramoot bagar, na Karais Iesusna aiŋna moca auk toco kac ŋgoreaca eacrena. Na reac ianna aku toŋgorenanna, u auknanmo mo, na Karaisna i mbuŋa aku umo mbopca, u an reacmo mo. Na una tɨpemb kirarir laiŋga aku matau lamŋirena. 10 Ainda moca aku umo madigiek, u aukna nuoc Onesimusmo tɨp kirar laŋa mo. Na an kɨdrɨk mbuŋa aku kac ŋgoreac ndeacri, ma kɨpca aukmo anna tɨkca watatna, ri, aku manmo Karaisa rɨpacna toŋgoca mamo otacatna. Ainda moca aku aindopatna, ma aukna nuoc ŋgoin toc malaruat.* 11 Na ŋgaua ma un ŋgotacna aiŋ laŋa mba morina, na mandeac ma aŋmo opotacna aiŋ laŋa mona mɨn.

12 Na mandeaca aku manmo un ndambuŋa mandaca makɨpek, na ma aukna rugut ŋgoin. 13 Pil 2.30Na aku manmo kɨraca ma aukap eac, co, aku toŋtoŋ ŋgoinna mo mbe, te, ma una aiŋa moca aukmo otacna. Na anna gaind, aku kam wembaŋ laŋna aiŋa moca wiwiti mboprenan tik, aku kac ŋgoreaca eacrena. 14 2 Ko 9.7, na 1 Pi 5.2Na aku toŋgorenanna, u anmo kam laŋ ndop, ainda moca aku manmo mba kɨracri. Na kaina reaca u monanna, aku umo mba mbopitndai. Aintik aku gaind ndamŋirena, u tɨp kirar laŋa moca aukmo otac ndop te, u ndona toŋtoŋ mbuŋa mo.

15 Na anna gidik, Onesimus, ma unmo kɨdrɨk teker motemma tɨkcaririna. Na an reaca aind ndaruatke, u manmo mac nda aŋgɨca ma unapmo iarwara eacraŋnandet. 16 1 Ti 6.2Ainda moca u manmo tuomna aiŋ kamainda mona ramootta kai lamŋi teac, na anna gidik, ŋgaua ma una tuomna aiŋ kamainda morena ramoot, na mandeaca ma una Iesusa rɨpacrena laiplacarta ian, na u manmo matŋinandet. Na aku manmo Iesusa rɨpacrena lapmbitac ian toca watrenan, aintik aku ndona nikinik iroara, mamo neaŋrena. Na aku lamŋirena u manmo matŋinandet. Na an tɨp kirara, u kabena meikramtaɨrmo matŋirenanna, u mamo ainda matŋi. Na Kacootna mo te, u mamo ndona Iesusa rɨpacrena laiplacarta ian toca matŋi.

17 2 Ko 8.23Ainda moca u aukmo wat, aku unap aŋga Karaisna aiŋ kabea morena ramootniŋ ecte, u Onesimusmo an tɨpna kirarmo u aukmo aŋgɨrenanna, u man motoco aind naaŋgɨ. 18 Na ma una reik ndeida wanaiŋ naaŋgɨrinan te, co, ma unmo makukar neaŋrinan te, u an reikmo aukna ina kaŋgaukca tɨkca aku ndo wandoŋainandet. 19 Gal 6.11Na gan kam tɨp, “Aku ndo an reik rutina opotaca monandet.” An kamma aku Pola, aku ndo ŋgoinna aku ndona par mbuŋa tirca umo neaŋga kɨpekna kam. Na aku unmo gaindopna mɨn ŋgoin, u ndo ŋgoinna aukmo rurutiap, na an rurutia anna una eteacna wat. Ainda moca aku an kamma mbombopa aku karirina. 20 Na aukna kaka u warac, Kacootna i mbuŋa aku toŋgorenanna, u aukmo an tɨp kirar laŋa mo. Na aŋga Karaisna ramootniŋ, aintik an tɨp kirar laŋna moca, u aukna nikinik iromo laŋa mo.

21 Ainda moca aku matau lamŋirena, u aukna an kammo raŋgainandet. Aintik aku umo gan timbiŋ rapara tirca neaŋga makɨpek. Na aku lamŋirena, an tɨpna kirara u Onesimusmo monanna, an tɨp kirara aku umo mandeaca digirenanmo, u kunda tamuŋmbaica monandet. 22 Pil 1.25, na 2.24Na aku umo kabena kammap. Aku gainda rɨpacrina, Raraŋ Aetaniaca ma nena mbembendeia waracnandet. Te, ma aukmo watcarica aku nen ndambuŋ nakɨpnandet. Aintik u ndona kacna ŋgogona taup emtemmo, auknanmo kocroca eacraŋ, na aku kɨp te, aku anna ŋgonande.

Polna aiŋ kabena ramtaɨra Pilimonmo ra laŋ neaŋgatna

23 Na Epaparasa umo ra laŋ neaŋrina. Na ma toco kac ŋgoreaca eacrena, na aŋga muruŋniŋa Karais Iesusna moca kac ŋgoreaca eacrena ramootniŋ. 24 Na aukna aiŋ kabea morena ramtaɨra mina umo toco, ra laŋ neaŋrina. Na mina irembca Makapa, Aristakasapa, Demasapa, Lukap.

25 Ainda moca Kacoot Iesus Karaisna kakadmaica nena kabe, kabena ŋerŋgaurap eacnandet.