Pola Kolosinandmo tiratna timbiŋ rapar

Outna kam

Kolosi ma auŋ aniac ian, na ma Esiana pitrik waŋ ndeacrena. Na ma Epesusmo tawan ŋgoinna wanaiŋ. Na Pol tikca ma Iesusna rɨtɨpaikta meikramtaɨrta tumbun ianmo Kolosi mba tɨkca moa ŋgepatke. Ainda moca an mɨnna ma Epesusa eacri, ma ramtaɨr ndeidmo mbagɨrica mina an pitrik waŋa taŋga, Raraŋ Aetaniacna aiŋa mona mataŋgat, na mina Kolosi motocmo mataŋgat.

Aintik Pola waracatnanna, ramtaɨr ndeida Kolosiarta meikramtaɨrta rɨtɨpaikmo mo irikna mori, na ma minmo timbiŋ rapara moca mina rɨtɨpaikca moi gagara paŋpaiŋa eacna moca, ma kambmo timbiŋ rapara tɨkca neaŋga taŋgatna. Na ma minmo gaindopatna, Karais, ma reikmo muruŋcamiŋna paŋan. Na ma ndo aimo mac nda aŋgɨna, na kabena taupembca aimo mba otacitndai. Mina aimo Karais ndambuŋa mba aŋgɨ taŋi rambuŋaiitndait. Na Karais mbuŋ tik, Raraŋ Aetaniaca reikca mo larurinan, na mana aiŋ mbuŋa Raraŋ Aetaniaca ma reikmo nda aŋgɨnande. Na Karaisa ma aina inikca eacrenan, na aia meikramtaɨr ŋgaib tarurina, na mana tɨpemb koinda raŋgairena.

Na gan timbiŋ rapara Pola tirca ma ramoot mbuniŋa neaŋgatnan, ri, maniŋa an timbiŋ raparmo aŋgɨca taŋga Kolosinanda neaŋgatna. Na ianna Tikikus, na ianna Onesimus. Na an ramoot Onesimus, Pola manmo Pilimonmo neaŋga taŋgatna timbiŋ rapara mana kamb wɨtmo mambopat.

3 Epe 1.16, na Pil 1.3Na aŋga mbendeina mo te, memetmbaca aŋga nena lamŋireke, na Raraŋ Aetaniacmo kam laŋ neaŋrenan. Na ma aina Kacoot Iesus Karaisna Aet. 4-6 Mk 4.8, na 16.15, na In 15.16, na Epe 1.15, na 3.2, na 2 Ti 4.8, na Pm 1.5, na Ib 6.10, na 1 Pi 1.4, na 5.12Na aŋga nena kambca waracrinanna, ne Karais Iesusa rɨpacrenanapa, Raraŋ Aetaniacna meikramtaɨrmo matŋirena. Na an reac laŋa, ne lambirenanna Raraŋ Aetaniaca nemo larapacrinanna, ma nenanmo tamuŋna auŋmo wembaca eacrena. Na outta ne an Iesus Karaisna kam wembaŋ laŋa waracrinanna, na ne an kam gidikmo rɨpacrinan, na anna kam wembaŋ laŋ. Ainda moca ne Iesus Karaismo matau ŋgoinna rɨpacrenan, na Raraŋ Aetaniacna meikramtaɨrmo, muruŋcamiŋmo nikinik iroar wewetarmo neaŋrenan. Na gan tiacarpaik muruŋna auŋembta meikramtaɨrmo, mina gan kam wembaŋ laŋmo wiwitirena, na meikramtaɨr wɨtta rɨpaca raŋgairinan, na mina tɨpemb kirarir toco laiŋ ndarurinan. Na an ra ŋgoinna, ne Raraŋ Aetaniacna kakadmaina opotacna kam wembaŋ laŋna kamma waracri, na ne manmo mataua lamŋiatnan, ainta tɨpna kirara nena rɨk ndarurina. 7 Kol 4.12, na Pm 1.23Na Epaparasa ma nemo an kam wembaŋ laŋna kammo nemo riptirinan, na ne manmo malamŋiat. Na Epaparas tikca ma Karaisna aiŋna ramoot laŋ ŋgoin. Na ma aina aiŋna ramoot, na aia manmo mamatŋi ŋgoin. Na ma nenmo matau ŋgoinna otaca Karaisna aiŋmo matau ŋgoinna morenan. 8 Na ma aŋmo gaindoprinan, gan tɨpna kirara Ŋeroŋ Ratta nenmo neaŋrinan, ne Raraŋ Aetaniacna meikramtaɨrmo matau ŋgoinna matŋiraŋ.

9 Ro 12.2, na 1 Ko 1.5, na Epe 1.8-9, na 1.15-17, na 5.10, na 5.17, na Pil 1.9Aintik an ra lacaua, aŋga nena tɨpemb kirarir laiŋta kamb mbaraca, aŋga memetmbaca nena moca Raraŋ Aetaniacmo mbendeirenan, na ma nemo otaca ne mana toŋtoŋmo matau ŋgoinna lamŋiraŋnandet. Te, Ŋeroŋ Ratta nenmo ainta iroar laiŋapa, landamŋi laiŋ neaŋnandet, na anna nena nikinik iroarmo moca mɨnna tɨknandet. 10 In 15.16, na Epe 2.10, na 4.1, na Pil 1.27, na 1 Te 4.1, na Ib 13.21Ainda moca ne Kacootna meikramtaɨr taŋrena tɨpemb kirarir koinda taŋraŋ, te, ma nena tɨpemb kirarirmo muruŋa ma toŋgonande. Na ne ainta aiŋir laiŋta gagamma aŋgɨnande. Te, ne Raraŋ Aetaniacmo lamŋinande, na an landamŋia memetmbaca ma acnairaŋnandet. 11 Epe 1.19, na 3.16, na 4.2Na aŋga gainda mbendeirena, Raraŋ Aetaniacna gargar bagaraniac laŋ mananna, ma nemo ainta gagrara ma neaŋnande. Te, ne wɨtɨk gagraca an mitkarmo muruŋa aŋgɨnandet, na ne laŋan ndeaca lambica, an mitkara mai te, ne toŋgonande. 12 Epe 1.11, na 1.18Na ne toŋgoca Aetmo kam laŋ neaŋ. Ma nemo moca gagraca ne tɨpemb kirarir laiŋga raŋgai te, an reik laiŋ, laiŋga ma nemo larapacrenanna, ne aŋgɨna mɨn. Te, ne an Raraŋ Aetaniacna memetaca eacrena Raraŋ Aetaniacna meikramtaɨrap muruŋa aŋgɨnandet. 13 Lk 22.53, na Epe 2.2, na 1 Te 2.12, na 2 Pi 1.11Na aia neaupna gargarna kaŋgaukca eacrenan, ma aimo mac nda aŋgɨca ndona Nuocna wiwitta tɨkrinan. Na an Nuocmo ma manmo matau ŋgoinna matŋirenan. 14 Epe 1.6-7Na Raraŋ Aetaniacna Nuoca ma aimo mac nda oikrina, na ma aina tɨpemb ŋgorikta makukarmo, moa kecamacariri.

15 In 1.18, na 2 Ko 4.4, na Ib 1.3Na aia Raraŋ Aetaniacmo watna towanaiŋ, na mana Nuoca, ma man toc ŋgoin, na ma minmo Raraŋ Aetaniacna kirara laruca mina manmo watrinan. Na ma Raraŋ Aetaniacna guina Nuoc, na reiki Raraŋ Aetaniaca muruŋa moatnanna, ma anna paŋan ndeacrena. 16 In 1.3, na 1.10, na Ro 8.38, na 11.36, na Ib 1.2, na 2.10, na 1 Pi 3.22Na an Nuocna par mbuŋa Raraŋ Aetaniaca tamuŋna auŋapa, gan tiacarpaikna reikmo, muruŋcamiŋa morinan. Na reikca aia watrenan, na aia wat ŋgocortanap, ainta gargarapna mbaiŋna aiŋa morena ŋerŋgaurapa, gargarapna ŋerŋgaurapa ainta gargarapna reikca, ma muruŋcamiŋa moatnan. Na reikca muruŋa manan niŋgik, ma ndo an reikmo muruŋcamiŋa morinan. 17 In 1.1-3, na 8.58, na 17.5, na 1 Ko 8.6Na an mɨnna an reiki muruŋcamiŋa laru ŋgocor ndeacri, ma eacrina. Na man mbuŋa reikca muruŋa eacrenanna, ma anap muruŋa aiŋa morenan. 18 Up 26.23, na 1 Ko 15.20, na 15.23, na Epe 1.10, na 1.22-23, na KIEK 1.5Na ma Iesusna rɨtɨpaikta meikramtaɨrta tumbunna paŋan, na an Iesusna rɨtɨpaikta meikramtaɨrta tumbuna anna mana tikna kirar. Na ma ndo ŋgoinna ma an Iesusna rɨtɨpaikta meikramtaɨrta tumbunna eteacna watna mɨnɨŋ. Na ma ndo ŋgoinna muk ŋgetacndiŋmo, outta mac nda ŋgepatna ramoot, aintik ma ndo ŋgoinna an reikta muruŋna paŋan ndeacnandet. 19 In 1.16, na 3.34, na Kol 2.9Na Raraŋ Aetaniacna toŋtoŋa ma an eteacna watapa mana tɨpembta kirarira muruŋa an Nuocap eacnandet, aintik Raraŋ Aetaniaca manmo mɨnna tɨkca eacrenan. 20 Ro 5.1, na 2 Ko 5.18, na Epe 1.7, na 1.10, na 2.13, na 2.16, na 1 Io 2.2Na Raraŋ Aetaniaca ma an tiacarpaikapa, tamuŋna auŋna reikmo toŋtoŋa muruŋmo moca mina manap nikinik iro kabe toc ndeacnande. Ainda moca ma Karaismo watcarica, ma ik naaŋgɨ keraca mamenacat. Ri, mana racaindpaikca kactacat, na anna kirar mbuŋa Raraŋ Aetaniaca aina puŋnaŋgepta tɨpemb kirarirmo moca irikrinan.

21 Ro 5.10, na Epe 2.12, na 4.18, na Ta 1.15-16Na ŋgaua ne Karaismo tawan ŋgoin ndeacrenan. Ainda moca nena iroar puŋga ne mamo puŋndamootta morinan, na ne tɨpemb ŋgorikca morenan. 22 Epe 2.14-16, na 5.27, na 1 Te 4.7, na Ta 2.14Aintik Karaisa ik nakeraca mamenacat, na an tɨpna kirar mbuŋa Raraŋ Aetaniaca nemo moca, ne manap nikinik iro kabe malaruat. Na ma ainda moatnanna, ma nenmo man ndambuŋ naaŋgɨ kɨpna morina, te, ne ratarapa makukar kocora mana lamnɨacmo wandoŋ ndeacraŋna. 23 Mk 16.15, na Epe 3.17, na 1 Ti 3.16, na Ib 3.14Na ne ndorita rɨtɨpaikmo utiŋa gagraca wɨtɨki eacraŋ, te, reac ianna nenmo wɨŋ te, ne ndorita kam wembaŋ laŋna rɨtɨpacna tɨp kirar gargarmo, ne waracrinanmo, ndarekrekke nari. Na aku Pol, aku an kam wembaŋ laŋna aiŋa mona ramoot ndarurina, na aku an kam wembaŋ laŋmo, gan tiacarpaikna meikramtaɨrmo, wiwitirena.

24 Ro 5.3, na 2 Ko 1.5-6, na Epe 1.23, na 3.13, na Pil 3.10, na 2 Ti 1.8Na mandeaca aku nen, ŋgopotacna gɨrgɨr aŋgɨna toŋtoŋap. Na aku Karais Iesusna rɨtɨpaikta meikramtaɨrta tumbunmo otacnan, anna mana tikna kirar. Na an gɨrgɨra Karaisa aŋgɨatnanna, ma mba maireke. Na aku ndona tik mbuŋa aŋgɨrina gɨrgɨra, aku an Karaisa aŋgɨatna gɨrgɨrmo, moca mɨnna tɨknan. 25 Epe 3.2, na 3.7-8Na Raraŋ Aetaniac ma ndo mbuŋa aukmo larapaca aku Iesusna rɨtɨpaikta meikramtaɨrta tumbunna aiŋna ramootta, larua nemo otacna. Na aku Raraŋ Aetaniacna kammo muruŋa mbopna aiŋap. 26 Ro 16.25-26, na 1 Ko 2.7, na Epe 3.3-5, na 3.9-10, na 2 Ti 1.10Na atu ŋgoinna an kamma iŋgoroca eacrenan, na meikramtaɨra mba lamŋiri. Na mandeaca ma laru raekca tɨkri, Raraŋ Aetaniacna meikramtaɨra lamŋia garacrinan. 27 Ro 9.23, na 2 Ko 2.14, na Epe 1.18, na 3.8, na 1 Ti 1.1Na mana toŋtoŋ mbuŋa ma aimo mana meikramtaɨrmo, an iŋgorocrina kammo wandacrinan, te, aia lamŋina, an kamma ma laŋ ŋgoin, na ma Iudana meikramtaɨr wanaiŋmo otacnandet. Na an iŋgorocrina kamma ma gaind, Karaisa nenap eacrenan, na ne manmo lambica ma nemo aŋgɨca taŋca ne manap eacna, te, ne mana reik laiŋ laiŋ koinda, tamuŋna auŋ ndeacrenanmo aŋgɨna. 28 Epe 4.13, na 5.27Na aia meikramtaɨrmo kabe kabemo, muruŋa Karaisna kam wembaŋ laŋmo wiwitirenan. Na aia iroar laiŋapa landamŋiar laiŋga raŋgaica minmo riptirena, na minmo kamb gagrara neaŋrenan. Te, aia toŋgorenanna, mina Karais mbuŋa rɨtɨpaik gagrarta meikramtaɨr laiŋ taruca aia minmo Raraŋ Aetaniac ndambuŋa aŋgɨca taŋna. 29 Up 20.20, na 20.27, na Epe 3.7, na 3.20, na Pil 4.13Ainda moca Karaisa aukmo neaŋrena gagrar anik puŋga, aku man laruna aiŋir anikca morenan.

Kolosi 2 ->