Filemon

Haala Puɗɗirka

Ɗerewol ŋol Pol winnani Filemon ɗo, haala joonne hakkune himɓe ɗiɗo nun ŋol batanta. Pol winnii ɗerewol ŋol gam o sawrinana Onesimu, maccuɗo doggunooɗo joomiraawo mum Filemon. Filemon laati nun goonɗinɗo tawaaɗo der wanŋarde Koloosi. Onesimu tuubii, goonɗini Yeesu diga e waaji Pol. Kan waɗi Pol e eela Filemon jaɓa Onesimu hande banniraawo mum, o sawranoo mo bo.

Der duuɓol 62 nun Pol winni ɗerewol ŋol der nanŋoore mum arandeere der Roma. Ɗum nandi hande Tikikus nun yaari ɗerewol ŋol e ŋol Koloosi, Kol. 4.7-9.

Ko hollitii der ɗerewol ŋol woni, tinnaare ne Pol woodi dow moƴƴingo haala hakkune himɓe ɗiɗo, hande no o woowi waɗugo hakkune himɓe ɗuuɓɓe. Ko Almasiihu waɗani en hakkune men e Baaba mum, kanjum nun Pol waɗani Onesimu hakkune mum e Filemon.

Tokkontirki haalaaji

1. Haala puɗɗirka, 1-3

2. Yettoore Alla gam goonɗinki Filemon, 4-7

3. Pol e eelana Onesimu sawraare, 8-22

4. Cannooje, 23-25.

1 Min Pol, e banniraawo meeɗen Timote nun winni ɗerewol ŋol. Min Pol, mii laatii maɓɓaaɗo gam daliila Yeesu Almasiihu. Emen canna Filemon, jiɗaaɗo amen, gollodintooɗo e amen. 2 Emen canna bo Afiya, sakiike men debbo, e Arkippus kaɓidoowo e meeɗen gam linjiila, e goonɗinɓe hawritintooɓe der wuro maa. 3 Alla Baaba meeɗen, e Yeesu Almasiihu Joomiraawo, hokka on moƴƴere e jam.

4 Filemon, mii yetta Alla wakkati fu, mi accay siwtorgo maa der du'aaje am. 5 E gooŋa, mi nanii yidde e goonɗinki maaɗa dow Joomiraawo Yeesu e batanee, e no jiɗirɗaa himɓe Alla fu. 6 Emii eela Alla, gam goonɗinki kii ɗo hawti en yi'oo der gaɗu. Den paaminaa geetum fu ɗum baaweten waɗugo gam Almasiihu. 7 Banniraawo, ɓerne am seyake puy, hakkillo am fukkake bo, gam yidde maa deƴƴitinii himɓe Alla.

8 Mii woodi laawol der kawtal men e Almasiihu mi eelee ko haani gaɗaa. 9 Amma, mii ɓuri yiɗugo, mi eelee gam yidde, min Pol dottiijo, jooni bo mii maɓɓaaɗo sabbu Yeesu Almasiihu. 10 Mii eelee gam Onesimu ɓiyam mo keɓumi goonɗini der kasu. 11 Naane, o nafayno maa, amma jooni, o nafan en, min e maa.

12 Mii wittina mo to maaɗa, jaɓu mo hande min e hoore am. 13 Mii yiɗuno haggugo mo to am, gam o wallammi hande no haani balliraano am jooni no tawaami der kasu gam linjiila. 14 Amma mi yiɗay waɗugo goɗɗum to hinaa en baddii, gam mi yiɗaa waɗingo maa booɗɗum e doole, amma ɗum laatoo e sago maa.

15 Waɗoto Onesimu seenniriino e maa wakkati seɗɗa, gam o wonda e maa, e baadey. 16 O laataaki kade maccuɗo tan, oo ɓuri maccuɗo, o laatike banniraawo men jiɗaaɗo. Min, mii yiɗi mo sanne. Mii anni aa yiɗi mo ɓuri, hinaa hande neɗɗo tan, amma hande goonɗinɗo Joomiraawo.

17 To a daarii am hande igo maa, den kan, jaɓu mo hande no jaɓirtaa am min e hoore am. 18 To o woofaniino maa, ɗum bo to o joganiino maa nyamaane, yowanam ɗum. 19 Min Pol, mii winna ka e junŋo am, mi yoɓete ɗum. Amma mii siwtoree, an bo aa joganii am nyamaane, nyamaane nen bo, an e hoore maa nun. 20 An banniraawo am, waɗanam ɗum sabbu Joomiraawo, deƴƴitin ɓerne am gam kawtal men e Almasiihu.

21 Mii winnanee gam mii hoolii a nananan am, gam mii anni a waɗan ɓuri ko eelu maa mi. 22 Sikan, ciriyanoɗaa am suudu to beeranmi, gam mii miila, Alla jaɓan du'aaje mon, o wittinanmi to mooɗon.

23 Epafaras mo maɓɓidaami gam Yeesu Almasiihu sanni maa. 24 Marku bo, e Aristarkus, e Demas, e Luka gollidooɓe e am sannii maa.

25 Moƴƴere Yeesu Almasiihu Joomiraawo meeɗen wonda e mooɗon.