7
Kinim 144,000 dawá dauyamsa imi sung uta ko.
1 Bela banimane, naka ensel alalew ika bakan kinang kinang alalew be kal tod fakadábiw, yakeisi. Kale ika sinik gedul alalew iyo faku bom matam bakan so sol wok so as so fukámomano, kale eidawsiw. 2 Kale naka ensel kukum mak fai mito kal el el kaekal tadba akeisi ayo Got sinikso biyámin amiyo kal dawá dew faku todba akeisi, aka sinik gedul alalew im weng dukum gán dáyamse bidi, kitid kudusiw, kale bakan so yol wok so fakaliw modoliw kinim kale. 3 “Kiba bakan so yol wok so as so daw mafak dákanin bá, kano tein sidiwo, naka Got wok fakudin kinim iyo dabal kun dim dawá dauyamino kala.” Kalesa. 4 Kale dawá dauyamsa imi ding bakanin be144,000 Isadael kinim mit kilung kal, adikum ita kuw kuduliwo, kaliw kidisi.
5 Kinim mit Yudda ika 12,000 ita dawá dauyamsa.
Kinim mit Aduben ika 12,000 ita dawá dauyamsa.
Kinim mit Get ika 12,000 ita dawá dauyamsa.
6 Kinim mit Asa ika 12,000 ita dawá dauyamsa.
Kinim mit Nawtalai ika 12,000 ita dawá dauyamsa.
Kinim mit Manása ika 12,000 ita dawá dauyamsa.
7 Kinim mit Simiyon ika 12,000 ita dawá dauyamsa.
Kinim mit Liwai ika 12,000 ita dawá dauyamsa.
Kinim mit Issaká ika 12,000 ita dawá dauyamsa.
8 Kinim mit Sebulan ika 12,000 ita dawá dauyamsa.
Kinim mit Yosew ika 12,000 ita dawá dauyamsa.
Kinim mit Bensamin ika 12,000 ita dawá dauyamsa ko.
Kanomin kinim denge fakiw fakiw imi sung uta ko.
9 Banimane, naka kaek fen nalam kin gubuyo be kinim denge fakiw fakiw ding bakodolaw banim. Ika anang bakan kukum kukum kayak so wanang kinim adikum teinu mánu so weng kukum kukum weng bakanin so kinim mit so iyo abin abem teinba so Siwsiw man so imi kin gubuyo kal todbiw ka. Yakeisi, ika lim namal ki miki nadiwe kalá kon ki faku dábiw ka. Yakeine, 10 ika yuleng dukum ki didin bom gán dá bako,
“Got abin abem teinba so Siwsiw man so ika kail bá takeikáyamin kinimo.”
Kalsiw ko. 11 Adikum ensel abin abem wow falala dau todbiw so kin moyámin kinim wow falala daubiw so kinim taw sinikso alalew iyo mikabu katun fakela dák tein Got win kufádaw bom 12 nadiwe bako,
“afan ko! kalfalin so lamlam so guton sawain so ken keiyo kalin so win kufámin so kitid so madmed so adikum be nulum Got alami sun sun fakudin kinim, alami keiduk kala. Kale afan ko.”
Kalsiw.
13 Kale gebom kinim mak aka dákadánam, “yak ilim namal keibiw ika yakalo tadsidiw ade bidi kan itane?” Nakane, 14 naka fakadu bakodaw, “kawta, kuw kalam kal!” Aki nade beta kin moyámin kinim asik bako, “ika idum dukum tem biyámino, kal tasidiw. Kale imi ilim be Siwsiw man kaim tuw gingu namala dausidiw ko.
15 “Kayo kamane ika Got abin abem kin gubuyo kal midiliw so táw so Got alam am abem kal ika am wok sun sun faku biyábiw, kale Kinim abin abem teinba, ata im kál ged moyamokaba ko.
16 Ika imin tew keiyamoma banim, ika wok tew so keiyamoma banim, atan mamin ifudoma banim ade yaknámin mamin mak ifudoma banim.
17 Kale Siwsiw man abin abem iwyak teinba, ata imi dolok moyámin kinim. Kale ata tudo imadew yak wok madmid fokat fokatba unokaba, kale Got alata im kinok adikum kidoyamokaba ko.”
<- Daw misun 6Daw misun 8 ->