Firipai 2

“Repo namina himu hakasaraka risike, aporo hinamo suane makotehoanie,” aisane oyapo.

1 Re su Yasu Keresoaki kataka marekea risikino, re paroaka risikiasimo Yasu Keresomo re ararenapo. Arirakano Yasu Keresomo reaki himu tumurumo hemaka apuramo re kamenakaraka ararenapo. Ho Kotesane reyaki hakāsa reke, re namina kikinaraka risikiasimo ararenapo. Arirakano repo namina yia kamenakaraka hemakapusimo Ho Kotesamo ararenapo. 2 Asiamo repo namina yia himu hakásaraka hemakapukua risikianie. Repo himu hakásaraka hemakapukua risike, namina yia himu tumurumo hemakapukua risikianie. Arirakano repo himu hakásaraka hemakupukua rakiraka risikianie. Repo ayiáka rakiraka risikino, nōmo asekea sesehokosapo.

3 Arirakano aporo metamo re asekea kekerehoasimo rakiakopo. Re namina rupiaka makárahoko rakiakopo. Repo úyaka hemakapunie. “Ano kesekepo. Aporo metakirane namina fanapo.” Aíyaka hemakapunie. 4 Repo namina menane hákasa hemakapukua rakiakopo. Aporo metakirapoko soko hemakapukua rakinie.

Yasu Keresomo ipi yano motosane makárahoanafonoraka reane oyapo.

5 Yasu Keresomo hemakapura ayiáka, repo soko ayiáka hemakapukua risikianie.

6 Yasuane kakaro Kotipo. Koti Yasu tati siasapo. Siasa nine Yasumo ipiane makárasafapo. 7 Ipi soko Kotiraka reanine ipi fanaraka reafapo. E ipiane aporo raipa pariraka reapo. Aporomanomo kauane maka pekea ipi apororaka reapo. 8 E ipiane makáraraka unihae pariraka reafapo. E ipiane makárahoanafonoraka reke, Kotimo someane hákasa kakimaka rakiraka rekeno, aporomo e rusua kusuapo. Yasu Keresoane ira matapesa paremarekea rusua kusuapo. Kukusane epo waesafapo. 9 Yasumo anakano asekea, Kotimo eane makárasapo. Yasuane hepene yapura káraraka reke makata su asekea rekenapo, aíyaka Kotimo someaka motosapo. Yasu Keresomo yano motosane fanapo, aíyaka Kotimo makamafanaraka maresapo. Aporo hinamo suamo yano motosane kesekepo, aíyaka Kotimo someaka motosapo.

10 Asiasamo Yasu yano motosane yano honakano suamo kakuna porokoa toke e kekerehokosapo. Hepene yapura makata risiamo soko, hauaka wo makata risiamo soko, hauaka tamo atura makata risiamo soko, suamo kakuna porokoa toke eane kekerehokosapo. 11 Ipu kekereraka someraka “Unihae kárane Yasu Kereso ipipo,” aihokosapo. Aíyaka Yasuaki kekereraka, Ata Kotimo yano motosane soko makárahokosapo.

“Hauaka wo aporo hinamo katosa á risikino, repo faesane tarinie,” aisane oyapo.

12 Asiamo re uyáka risikianie. Hameo, ano reyaki hakāsa rekesuamo, nōmo someane repo kakaro kakimarakasupo. Kakimasa ayiáka, yumo soko, yaiya kakimaka risikianie. Ano reyaki rekeanafonorakano soko, nōmo reaki fana somerakasuane meraruhokopo. Yaiya rakiraka risikianie. Kotimo re fana mafasisiapo. Mafasisiane metakariakopo. Mafasisiane kakaro makosakipoko wakapuaka rakiraka risikianie. Metakarirapaka namoraka risikianie. 13 Arirakano Kotimo ipi sesenane repo rakiako hemakapusimo, epo reane mahemakapurakanapo. Repo makata rakirane soko, kakaro rakisimo epo re ararenapo.

14 Makata rakiniesane mahisiraka me úraka someraka tafatafanafaraka seseaka rakinie. 15-16 Repo ayiáka rakiraka risikino, repo ereketaeraka rakiraka risikiakosapo. Re Kotimo hokosa risike watikiaka rakiakosafapo. Arirakano hauaka wo aporo hinamoane ereraka katoraka watikiraka risikinapo. Ipu kotafe horaka risikinapo. Iaki repo Kotiyaki yaiya rekeakosa someane repo iaki some karakanapo. Arirakano ti makata faeana ayiáka, repo faesane aporo ereraka katoraka risiamo aseakosapo. Re faeraka yaiya risikino asekea, Yasu pariapera maiya amo ano Poremo someraka, “Re faeraka yaiya risikino, nōmo reyaki fana makata rakisiane, nenakamaka rakiafareapo. Nōmo wakapuamo nenakamaka rakiafareapo,” aihokosapo.

17 Pirisiti aporomo*Yasu peasiraka pirisiti aporomo Kotiaki makata yaku karaka, saro sipi kaua waene he rekemarekea, Kotiaki yaku karapo. Yasu kusua maiya amo makata ane metakarisiapo. makata yaku Kotiaki akara ayiáka, repo himu hakásaraka hemakapurane Kotiaki ayiáka yaku karakanapo. Arirakano ano rusua kurakano ano yapi pusuane Kotiaki ayiáka kakakosapo. Ano yapi pusua akiyaki, repo makata yaku akará akiyaki, Kotiaki kayane siahoasireapo. Ano rukua yapi purakano ano sesehokosapo. Re soko sesehoasimoripo. 18 Asiamo ano soko re soko sesehokosapo.

“Poremo Timotiane Firipai taonea pusiehokosapo,” aisane oyapo.

19 Unihae Yasumo aorakano, maiya wakasema nina, Timotiane re arisia nōmo pusiehokosapo. Timoti pukua, re risiane asekea pariperaka, anoaki somerakano, nōmo kairaka sesehokosapo. 20 Nōmo re koteaka risikiasimo hemaka apura ayiáka, Timotimo soko reane ayiáka kakaro hemakapurakanapo. Reane hemakapukusa aporo metakira wo risikinafapo. 21 Aporo metakiramo ipu namina yine hákasa hemakapurakanapo. Yasu Keresopoko makata rakirane ipu hemakapurakanafapo.

22 Timotimo koteaka rakirakano repo asesapo. Hokosamo ipi wafaya ararena ayiáka Timotimo ano arareraka iti hakāsa risike, aporo hinamo metakiramo Yasu hemakapusimo some kotesane some kasapo. 23 Fana anoaki yakapa fasereperakarihoamo aseakonapo. Asekea marekea Timotiane re arisia pusiehokosapo. 24 Ano soko Kotimo ararerakano, reane aseako peakosapo, aíyaka hemakapurakaripo.

Poremo Epafarotaétase ane Firipai taonea pusiehokosaposane oyapo.

25 Yumo Epafarotaétaseane re arisia nōmo pusiehokosapo. Epafarotaétaseane Keresoa paosa samo eane nōmo maepo. Eto iti hakāsa rakiraka risike, himu hakásaraka Kotimo yunuane werakanapo. Fana eane repo ano rea pusierakano perakasupo. Repoko epo ano ararerakasupo. 26 E pekea o reke, makata takamarakasupo. E makata takamasapakano repo kaisiapo. Repo kairaka, epoko himu nekea risiapakae. Asiamo Epafarotaétasemo kára hemakapukua rekeno, nōmo eane re arisia pusiehokosapo.

27 Arirakano e makata takamasane namo kakaro kusuahopo. Kotimo ano makata umisa meta kakako hisiraka, e makata takamasane mafasapo. Mafaraka Epafarotaétaseaki soko, anoaki soko Kotimo namo kakaro kára kamenakaraka araresapo.

28 Asiamo yumo Epafarotaétaseane re arisia nōmo pusierakanapo. E perakano asekea repo sesehokosapo. Repo seserakano nōmo soko sesehokosapo. E purakano nōmo hisihokosafapo. 29-30 Asiamo repo Keresoa paosa aporo mae Epafarotaétaseane perakano asekea, seseraka pasimakanie. Epo Yasumo makata rakiraka reane e makata takamaraka kusuahopo. Repo ano ararehoko peakosapoko asiāne, re su peane siahoasifareapo. Siahoasifasekeno repoko epo ano arareraka pesane, kusuahopo. Arirakano aporomo Unihaeane makama fanaraka hemakapukua, makata rakiraka risiane, i namina kukusane hemakapurafaraka, ayiáka risia aporoane makárahoanie.

<- Firipai 1 Firipai 3 ->