1 Na aso, beahamu nea beahaleamelebe, mu giwi gähege, naga föi gähege dibeo. Mu dafidi dilo amoge, naga föi dafidi dilo amoge, hogosa helesa maadela, ödä duhuluge, maade gabio. 2 Amase, amo gaalu beahamelebe, Godea hïle nafolai gaamu Yalusaleme gähe amo, selesaia mosöa Gode hï e neebea amila besela galala digaha neebeo. Amo digase amoda, udia dolïsäea ïe egoa gausiamolöïe momadola daiala mulo amo gadoi digasio. 3 Amala digase amo gaalu, beaha aligilo filo dibea amila, ado afädë gelola sähalea, Wae! Godeïe mosöda, udia dolö nefolalebe amolibalä nea. Gode eda, ilibalä nea, ilida, ïe udia dolö namolömelë. Gode hï eda, ilibalä gedola nea, eda ilile Gode namolömelë. 4 Eada ilile siaholö hëla digisa maademolömelë. Baagomolöge, gualömolöge, dïimolöge, sëmolöge, dofä made bimolömelë. Mida, nelebo dafidi dilo amolida, hogosa helesa maadeimelëla säsio.

5 Amasebegi, beaha aligilo filodaia sulo amea sähalea, Bimo. Na hä, walio nelebo sulubadela bedefala, gähemu hamosamelëla sälahilä, ea nema sähalea, Ado goweda dofämelë. Dofä gabula helësëmolöi ameada, dëdëmola säsio. 6 Amala sälahilä, ea nema sähalea, Nelebo amolida, hä, hamosa maadeimelë. A-ge nihï ne, Ya-ge nihï ne. Mi gäwi amoge nihï ne, wagamolö amoge nihï ne. Afädë ödä haläse amomada, na nihï namolö ïlo ödä gü maase amo, bidia made, memalä muäia ïmolömelë. 7 Afädëa nudula salolela baagila awäse amogali, na nelebo gowe ili ïmolömelë. Neda, ïe Gode neëgi, eda, nïe malö namolömelë.

8 Gaso, udia dolö bedäla hubabelelo amolige, asigi made besulo amolige, mala nafadefalï nafade elö elöla hamolo amolige, udia dolö baagomäia nufidelo amolige, susugu hamolo amolige, amase, golë hamolo amolige, wäfalï gode naaboea hamoi amoma göa nelegelo amolige, wäfalï sälo amolige, nulo söa fedala igi gadoi ëi salobaea wisa neebe oeabo gadoi dibea ami namolömelë. Baagomolö ageduda, amomelëla säsio.

9 Selesaia fii gifalädalïaea falo gifalädalïagi neala nafadelasilo geloi gifalädalïa hamola wagamolöïe nobala gaui amoligi, afädë ne neebea maalahilä sähalea, Na dima udia dolïsä, Sugua Sibi Malöea nimolö amo oledelä, di misiëla säsio. 10 Amala säse amo gaalu, Eleloi Gesami e nema salugasisebegi, selesaia fii amea ne neala gaula segebi edefade ga gadogofalïdaia ami ifosilahilä, Yalusaleme, gaamu Godea hïle nafolai amo, selesaia mosöa Gode neebea amila digaha neebe amo nema olesio. 11 Gaamu amogida, Godeïe yo digalo hïdo elöi amea yo digalasise amola digaha neebeo. Ïe yo digaloda, hïdo elöifäli muni edefadea nelo amo gadola yola, igi folomoi ëi yasaba, galasi gadoi hahaloifälï amo gadola yo digasio. 12 Gaamu amoda, yala ilibia edefadea yalala amalela digi gabio. Amoïe idi galoda, giwilasi gabio. Idi galo giwilasi amoli dibea amida, selesaia fii giwilasi amoli afädë afädëla neebeo. Idi galo amoligida, Isilale sosogo giwilasi amolile ëi afädë afädëla dëdëla negei dibeo. 13 Gaamu amoïe afo näiado amogi, idi galo ohodoa ohodoala hamoi gabio. Eso maasido idi galo ohodoa, idomodi amogi ohodoa, elö adomodi amogi ohodoa, biyiduda, eso digasido ohodoala hamoi gabio. 14 Gaamu amoda igi bobogamu giwilasia dafa negela yalalahilä, igi boboga amolidaiada, Sugua Sibi Malö amoïe abosolo dolö giwilasi amolile ëi afädë afädëla dëdëla negei dibeo.

15 Selesaia fiia nema ado sälo amea gaamu amoge, idi galo amolige, yala amoge dofemolöïe, dofe melëlo i gili gadoi goloea hamoi gaula neebeo. 16 Gaamu amoïe gaisafufu dofege, mogo dofege, hele afädëdi gabio. Selesaia fii amea i gili gadoi gaui amea gaamu amo dofela beahamelebe, sedadeïege, gaisafufu dofeïege, adadiïege, hili afädëdimu, gilomida dausini äudäïe hädali äudä gadoi dofesio.*Ilia Giligi adoea sidadia dëdësaleada, sidadia dausini giwilasi (12,000) egowe dëdëida, nilïle gilomida gadoida, dausini äudäïe hädali äudä (2,200). 17 Aso, ea gaamu amoïe yala amo dofe beahamelebe, mida nabülasi gafeiaïe odoai bia gabio. Selesaia fiia dofese amoda, dolöea dofelo amo gadola wäla dofesio.[b]

18 Gaamu amoïe yalada, igi folomoi ëi yasabaea yalala amalela, gaamu amo goloeamu hamolahilä, golo amoda, galasi hahaloi hïdo elöi amo gadoia hamoi gabio. 19 Gaamu amoïe yala dafa igi boboga amoligi, igi elöi muni edefadea nelo elö elölaea momadoi gabio. Igi elöi amolile ëida gowe ili. Ageda, igi folomoi ëi yasaba, ageduda, igi ëi safaia, osodada, igi ëi agede, biyiduda, igi i bäu gadoi ëi emelalo, 20 amase, biida, igi bëi adeba falei ëi sadonegisi, gafeda, igi bëi ëi ganeliana, gifalädalüda, igi folomoi ëi galisolaidi, gödöda, igi i bäu gadoi ëi belili, amase, sëgëda, igi folomoi ëi dobasa, nabüda, igi i bäu gadoi ëi galisobalasi, gïdäda, igi yabui ëi haiasini, giwida, igi bëi ëi amedisi. Amoli sulubadelaea yala dafa amogi momadola amalela negei gabio. 21 Idi galo giwilasi amolida, bageïe isogi helebe näia momadoi hedabi amo gadoi helebe näia boboga giwilasi amea hamoi gabio. Idi galo afädë afädëlada, helebe näia hodo afädë afädëlaea hamoi gabio. Amase, gaamu amogi aulo idi dibe amoda, goloeamu hamolahilä, golo amoda, galasi hahaloi hïdo elöi amo gadoiamu hamoi gabio.

22 Gaamu amogida, na Godeïe mosö afädë made melï. Made melï amoïe mida, Dafidilo Geloi Gode, Sulubadelaïe Geloifalï Geloi neebe amole, Sugua Sibi Malö amolemu gaamu amoïe Godeïe mosö gadoi neebeo. 23 Godeïe yo digalo amea gaamu amo yo digaha neebe ameage, amase, gaamu amoïe gele wai gadoida, Sugua Sibi Malö amo hï e neebe ameage, gaamu amogida, esoeage aubeage neëmolöi made gabio. 24 Udia dolö fifi asi sefolalebe amoli sulubadelada, gaamu amoïe yo digalo amogi nawesa namolömelë. Nagadaia beaha aligilo gini nefolalebe amolia ilile nelebo hedabi hïdo elöi dibe amoli amimu gaula moholömelë. 25 Gaamu amogi gasi maade ameada, ïe idi galo amolida, yoba made gala, doga negesimu diamolömelë. 26 Udia dolö fifi asi sefolalebe amolia ilile momado hedabige, nelebo hedabi hïdo elöige, amimu gaula moholömelë. 27 Gasoda, nelebo nigime baai afädëge, mala nafadefalï nafade elö elöla hamola, wäfalï sälo afädëge, gaamu amogi dofä made nogila digamolömelë. Udia dolö ilile ëi Sugua Sibi Malö amoïe namolöi namolö bebagi dëdëla negei nefolalebe amolimu gaamu amogi nogila digamolömelë.

<- Ulufai 20Ulufai 22 ->