Ulufai 19

Babilono neala nafadei amogi ilia obeägï

1 Amo bealahilä, hobeala nabelebe, selesaia mosöala, ado goba edefade udia dolö yafiea sälo amo gadola sähalea, Godeïe ëi gauia adadi. Nilï damula moholöda, nilïle Godemadila mulo gabio. Ëi hïdo elöile, geloileda, nilïle Godea gauleamelë.* 2 Mida, ea udia dolöbalä memelela gudisaleada, dofäge, mogoige dibe amo gadola mogelo nea. Idigi nawela susugu hamolo udia ëi sälo sebe amea susugu hamolo ameada, nagadaia udia dolö neala nafadesa nelo amoïe, ebalä gudilahilä, asiala hamoila säsio. Udia amea Godeïe hamoi hamolasilo nefolalo amolile heale digai amoïe, ema së mogola ïmolö dibe amo gadola ïasiola säsio.

3 Amala sälahilä, ilia bu agedu sähalea, Godeïe ëi gauia adadi. Gaamu gobei amoïe höba buguda, fedahamu namolöi namolömelëla säsio.

4 Amala säsebegi, dolö asigi gäwi dafidilo nabülasi äudäïe odoai biyidia amoliage, namolö aligi biyidia amoliage, gumusula dia didigafulahilä, Gode beaha aligilo filodaia sebe amo ilibiala sähalea, Dofä amala hamomäiamelë. Godeïe ëi gauia adadila säsio. 5 Amala säsebegi, Godeïe beaha aligilo filo dibea amila ado afädëa sähalea, Ïe hamoi hamolasilo nefolalebe dili sulubadela, Godebalä bedäla e hawala nea, ëi sälo nefolalebela diliage, ëi sälo made nefolalebela diliage, nilïle Godeïe ëi gauia adamalola säsio.

Sugua Sibi Malöea udia neahalea, molö edefade giai

6 Na aso, nabaha nebegi, udia dolö yafie gegedoi dialea ado gelola säi goba gadoige, oböla, ödä nawali guui goba gadoige, hahalä dagabolo amo gadolage, säse nabi. Ado amea gelola sähalea, Nilïle Dafidilo Geloi Gode, Sulubadelaïe Geloifalï Geloi neebe amea beaha aligilo neebe ameada, ïe ëi gauia adadi. 7 Nilïa edefademalä obeägïla, ema ëi sälo neala sädi. Mida, Sugua Sibi Malöea udia nimolö segeyo, hä, besela galasegi, ïe udia amea dadaiala sebe amogi.[b] 8 Dolö fimolö udia amoma fagulo falei nigime baai made, eleloi si dëdëgï salugamäia ïmelëla säsio. (Fagulo faleima oodo beala säi amoda, Godeïe udia dolö nefolalebe amolia mala mogoi hamolo amolimelë.)

9 Nema, aso, selesaia fii amea sähalea, Dia ado gowe dëdëmo. Sugua Sibi Malöea udia neahalea, molö molöïe udia dolö hobe säi amoliada, obeägïsa neala säla dëdëmalasio. Hä, ea nema sähamu nea gomalä säsio. Ado goda, Godeïe ado dofämelëla säla ïasio. 10 Amala säsebegi, na ïe emo mia gumusula dia digala, e ilibiadelä hamosebegi, ea nema sähalea, A! Amala hamomabio. Neda, dibaläge, didoo dialifilalibaläge, Yesuea ulufala dofäla säi amo gaula mogolo nefolalebe dilibalä, hamoi gaalu afädëdi hamolasilo neawe. Gode emu ilibiamalo. Yesuea ulufala dofäla säi ameada, bea sälo nefolalebe amolima helësëlasilola säsio.[c]

Yonea sugua hosi faleidaia dolö afädë sebe melï

11 Wae! Na beahaleamelebe, Hebeni doga negei dibe amoge, sugua hosi falei afädëge neebe melï. Sugua hosi amodaia fila aulo sebe amoïe ëida, Asigi Falagaseige, Dofägela sälo amo gabio. Eada, mala mogoi amea mogela digiloge, nudula digiloge gabio. 12 Ïe siida, nulo söa gadoi nea, ïe busagia gini habuga yafie salugai neebeo. Hï ema ëi afädë dëdëi dibeo. Ëi amoda, afädëa dawadigi made. Ea hïdomu dawadigi neamelë. 13 Ea fagulo sedade gäi amoda, healegi gesa maadei gabio. Amase, ïe ëi amoda, Godeïe Ado dibeo. 14 Hebeniïe ami nefolalebe amolia fagulo falei hedabifalï, nigime made baai salugalahilä, hilile sugua hosi falei amolidaia fifigila, e awäse amo gadola bëgëla afiasio. 15 Udia dolö gafodo elö elöi nefolalebe amoli sulubadela nufudaha maademolöïe, nudulo helebe meifalï ïe nafiadila besela galasio. Amala besela galahilä, aeane baialaea ea udia dolö amoli beaha namolömelë. Eada gelebi gägä emesala fësëlo igi duwi dibe amogi, gelebi gägä damula sali amoli emesala fësëlo. Emesala fësëlo igi duwi dibe amoda, Gode, Sulubadelaïe Geloifalï Geloi neebe amoïe mihalälo edefade amo dibeo. 16 Ïe fagulo sedade gäi amogige, ïe meselegige, ëi gomalä säla dëdëla negei dibeo.

gini nefolalebe amolile Ginige,

dafidilo nefolalebe amolile Dafidilo Geloigela

säla dëdëla negei dibeo.

17 Na amo bealahilä, aso, beahaleamelebe, selesaia fii afädë esodaia neebe melï. E ami nea, mu ilibia haea hagila nawesa neebe amoli sulubadelama, gelola uuala sähalea, Godeïe molö molö edefade dibe amo molöïe, gegedola namolö mofiamo. 18 Dili mofialahilä, gini ilile domaloge, ami beaha aligilo ilile domaloge, dolö geloi ilile domaloge, amase, sugua hosi ilile domaloge, hosidaia fila aulo amolile domaloge, udia dolö sulubadela, galabaia hamoi gadoi hamolasilo amolilege, odoaïe hamoi made hamolasilo fisigäi amolilege, amase, ëi sälo amolilege, ëi sälo made amolilege, amoli sulubadelaïe domalo molö misiëla uuala säsio.

19 Amase, na aso, beahaleamelebe, sugua ilaba gadoi amoge, nagadaia gini amolige, ilile ami dolö amolige neala gegedolahilä, ilia dolö sugua hosidaia fila aulo amobaläge, ïe ami amolibaläge, nudumolö hamosio. 20 Amala hamodelä hamosebegi, sugua ilaba amoge, ïe ëigi wäfalï bea säloea hamomolöi made gadoi nofe elöi hamolo amoge gausio. Wäfalï bea sälo amea, hamomolöi made gadoi nofe elöi hamolo amea, udia dolö sugua ilaba gadoi amoïe magi negela, ïe ausulubo gadoi ilibiala gauia adaha nefolalo amoli dahila neasio. Sugua ilaba gaui amole, wäfalï bea sälo gaui amole ofofola, nulo söa fedala igi gadoi ëi salobaea wisa neebe oeabo gadoi dibea ami, helegela sogobala sadia idogosio. 21 Dolö sugua hosidaia fila aulo amoïe nafi idigila nudulo helebe besela galase amea, ilile ami dolö amoli nufudala baagosa maadesio. Amala hamosebegi, haea sulubadela mafulahilä, baagoi amolile domalo amoli naha neamu bolesa maadesio.

<- Ulufai 18 Ulufai 20 ->