Maga 7

Godeïe Ado säla negei amea mäu ilile ado baagi

(Madiu 15.1-9)

1 Felesi dolöge ado säla negei olelelo dolö odoa Yalusalemela misi amolige gegedolahilä ili Yesu neebea afiai. 2 Ilia beahamelebe ïe bëgëla aulo odoaea naabo nigime hëla made molö naha sefolalebe amo melï. 3 Felesi dolö iliage Yu udia dolö sulubadelaeage mäu ilia aiyalo mala negei amo helësëlahilä naabo nigime hëla madeda molö nülo made nelo. 4 Ili magaia gaamugi awäla obëgëla maalahilä nigime made hëla molö nülo made nelo. Ödä ige faloge gaabo ige aiyala nigime hëlo negei amo gadola aiyala hamolo odoa yafie negei. 5 Felesi dolö amoliage mala dawadigi dolö amoliage ema nabahalea, Dïe bëgëla aulo golia mäu ilile aiyalo mala dibe amo damula naabo nigime hëla made buludola molö nase goda edoïela nabi. 6 Amala nabasebegi, ea ilima säla obëgësalea, Siiba Aisaeaea asigi fea negelo dilile hedabola bea säla negeimelë. Ea bea säla dëdëi amoda gowe,

Udia dolö ilile iso asigi wagadi made negesiä adoeamu nïe ëi gauia adalo nea. 7 Ilia dolöfäea mala säla negei amomu olelesaleada, Godeïe adoda amomelëla sälo nea. Amaimo, ilia nïe ëi memalä gauia adalo nebegola

säla dëdëla negei dialeala Yesuea säi. Aisaea 29.13

8 Dilia Godeïe mala säla negei dibe amo fisilahilä dolöïe aiyalo mala dibe amomu gelola hamosa nebegola säla ï. 9 Yesuea ilima aso sähamu nea sähalea, Dilile aiyala hamolo mala amo hamosalea. Dilia Godeïe mala säla negei dibe amo fisi gabu. 10 Amoïe Mosesea ado säla negesalea, dïe diado diemele hawa nea elele ado nabala bëgëla hamomalola sälahilä sähalea, Afädëa ïe eedo emele gadiaboseda, baagomäia nufulö dialeala säla negei dialea. 11-12 Amai gaso, dilia gomalä sälomelë. Afädëa nelebo amoligi Gobana säseda eada eedo emele ugila negemolö mademelëla sähalea sälo, Gobana nilïle ado sälada Godegali odala ï neawe. 13 Amalo ameada, dilia mäu ilia aiyala hamolo mala olelei amomu hamosa neada, dilia Godeïe ado fisilahilä mala amo gadoi yafie hamosamu aligilomelëla säi.

Yesuea udia dolö neala nafadelo amoïe säi

(Madiu 15.10-20)

14 Yesuea udia dolö nefolalo amoli bu misialolahilä ilima sähalea, Dili sulubadelaea na säsebewe nabala hedabola helësëmalo. 15-16 Nelebo segea dilo dolö isogi digase ameada udia dolö neala nafadelo mademelë. Nelebo isogi dilo segea doadigila awäse amea udia dolö neala nafadelomelëla säi. 17 Amala sälahilä udia dolö amoli amilahilä e mumuso isogi digala sebegi, ïe bëgëla aulo amolia ema nabahalea, Ado besula säi amoïe mida edodula nabi. 18 Amala nabasebegi, ea ilima sähalea, Dilige aso asigi made gäwi neale. Nelebo sulubadela segea dilo isogi digase ameada, udia dolö Godeïe siigi nigime baalo made amo, dilia dawa made neale. 19 Molö nase amoda asigigi aulo mademelë. Gaisagi digalahilä segea doadigila aulomelëla säi. Ado amoïeda Yesuea gomalä sähalea säi. Molö sulubadela nase ameada Godeïe siigi nigime baalo mademelëla säi. 20 Ea sähamu nea sähalea, udia dolöïe iso asigigi besela galasebe ameada, udia dolö Godeïe siigi nigime baalomelë. 21 Udia dolö ilile iso asigigila besela galalo amoda gowe. Asigi nafadege, nelegei fa nimolöge, udia dolö baagomäia nufulöge, udia dolö susugu hamomolöge, hilimu nafade odoa hamomolöge, 22 Udia nii susugu hamomolöge, gesami moholöge, mala nafade elö elöla hamomolöge, wäfalï sämolöge, nafade memelela made sulubadela hamomolöge, mudiamolöge, wäfalï säsäla hololömolöge, gugusämäia hamomolöge, asigi maade gadoia hamolo wäla hamomolöge. 23 Nafade amoli sulubadela asigigila besela galasebe amea udia dolö Godeïe siigi nigime baalomelëla säi.

Fonisia fii udia afädëa Yesuma asigi afädë dofä negei

(Madiu 15.21-28)

24 Yesu e sege amo dïgïla gaamu Daiamadi asi. Awälahilä e mosö afädë neebea amoïe mumusogi digai. Udia dolö nefolalebe amolia e neala made helësëmäia nelo gaso, e musügä fimolöi made nelo. 25 Amala nebegi, udia afädëïe idiwi holöböma mugabe fedai sulo. Amoïe emea Yesu neala säi amo nabalahilä, e fodolofalï maalahilä Yesuïe emo mia gumusula adi. 26 Udia ameada Giligi ado adolo. Eda Silia Fonisia fii udia. Ea Yesuma gelola sähalea, Nïe nidiwi holöböma mugabe fedai sebe amo dia nesila digamäia helësësamelëla säla ï. 27 Amala säsebegi, ea udia amoma sähalea, Molö nahalea dafidi malö ilidale ïmolö galea. Malöïe molö dibe amogida ügüloea muäia sadia gala ïmolöi made galeala säi. 28 Amala säsebegi udia amea säla obëgësalea, Dafidilo-o, dofä gaso, malësäea molö nahalea iso dusula fisia digaida ügüloea neala nülo madelela säi. 29 Amala säsebegi Yesuea udia amoma sähalea, Dia ado säi ameada dïe didiwima mugabe fedai amo hä asimelë. Di hä mosöa obëgëmalola säi. 30 Udia amo hï mosöa obëgëlahilä beahamelebe, ïe malöma mugabe fedai amo doadigila asi, diasia dofea dibe melï.

Dolö afädë gëhe gaala ado dadabi wahi

31 Yesu e Daiamadila obëgëla awäla gaamu Saidono awälahilä Gaamu Nabülasimadi nawesa nelolahilä Galili oeabo edefade dibea ami awäla besela galai. 32 Udia dolö nefolalo amolia dolö afädë gëhe gaala ado dadabi nelo amo e neebea ami sigi maalahilä, Yesuea e naaboea diigimäiamelëla säla ï. 33 Amala säsebegi, ea udia dolö nefolalo amoli amilahilä dolö amole heledo aliga galahilä, ïe naabo sögöea dolö amoïe gëhe helegelagi diigilahilä, hïle naabo sögögi gofedela galalahilä, dolö amoïe elïgi diigilahilä 34 selesaia mosöa sida adogola nea hame hëia fedalahilä sähalea, Efadala säi. Nilïle ado adolada, Gëhe gai dugimo. 35 Amala hamosebegi, dolö amoïe gëhe doga negela, ïe elï fodolofalï hedabolasilahilä ado hedabola säi. 36 Yesuea udia dolö nefolalo amolima gelola sähalea, Walio melï amo udia dolö odoama säla ïmabiola säi. Sämabiola säla ïahamu neebe amo nabalahilä gaso, ilia auaula säla ïahamu nelo. 37 Udia dolö amolia ado amo nabala ili asigigi edefademalä fudugilahilä sähalea, Ea hamosebego sulubadela hedabola hamosebe. Gëhe gai nelo amo doga negela digi, adolo made nelo amo hedabola adomäia hedabolasilo neala säha nelo.

<- Maga 6 Maga 8 ->