Ulugu 11

Yesuea Godema adolo mala olelei

(Madiu 6.9-15; 7.7-11)

1 Segeyo afädëgi, Yesu e sege afädëgi Godebalä adosa sulo. Ea Godema adola wagasebegi, ïe bëgëla aulo afädëa ema sähalea, Dafidilo Geloi-e, Yonea ïe bëgëla aulo amolima Godema adomäia olelei amo gadola, nilïage Godema adomolöïe, dia nilïma olelemäiamelëla säi. 2 Amala säsebegi, Yesuea ilima sähalea, Dilia Godema adosalea gomalä sämalo.

Nilïle Naado, dïe ëi amo eleloifalï hïdo elöi namiäia hamesa neawe. Dïe Beaha Maadela Sigi Neebe amo misiäiage hamesa neawe. 3 Segeyo sulubadelaïe molö molö amo, segeyo amogi ïmalo. 4 Odoa ilia nilïma asiala hamosegi, sulubadela fisilo ameada, diage nilïa nafade hamoi amoli fisimalo. Nilï neebeawi fedogola bimolö made negesimalo.

5-6 Amala sämalolahilä, Yesuea aso, ilima säla ïahalea, Dili nebegogi afädëa, gasi mogogifalï ïe damelëa mosöa awälahilä ema sähalea, Ne damelë-e, nïe damelë afädë sege wagadi madela, ne molö maade sebegi, na mosöa misi salea. Hobea bedefala ïduläïe, dia ne beledi iso ohodoa ïmola säsegi, 7 oböla, ïe damelë mumusogi dilo amea säla obëgësalea, Idi galahilä, nïe malöla nilïda hä, gedola diasia adidi dialeamelë. Dia nema halasala sämabio. Ne nowela digali nelebo neala ïmolö ulï gabumelëla säseda, abilia hamomolö gabu. 8 Na dilima säla ïahago. Mosö eedo amea, dolö egedigila misi amoda, ïe damelë helësëla, made nowela ïalabio gaso, e damelëa bolowela egedigi ameada, ea nowelahilä, ïmose amo gadoi neala ïmolömelëla säi. 9 Amaimo, na dilima säla ïahago. Ïmola ëdëgësa namialo. Ïmola ëdëgëseda, diligali ïmolömelë. Hogosa namialo. Hogosa aligiseda, dilia beagolemolömelë. Idi gai dugimola säha namialo. Idi gai dugimola säha aligiseda, dili digamäia, idi gai doga negesimolömelë. 10 Mida, udia dolö sulubadelaea ïmola ëdëgësa neebe amolia nimolömelë. Hogosa neebe amea beagolemolömelë. Idi gai dugimola säha neebe amoma, idi gai doga negesimolömelë. 11 Malö eedo nefolalebego, dilile malöea seme ïmola säseda, dili afädëa waadima neala ïmolöle. 12 Amai, dilile malöea haea iso ïmola säseda, hamabulu neala ïmolöle. 13 Amai, dihili dili nafade hamolo nea gaso, dilile malöma nelebo hedabi ïlo amoda, dilia dawa. Amo gadola made, dofä baagila awäla, dilile Diado selesaia mosöa neebe amea, Eleloi Gesami ïmola ëdëgësa neebe amomada ïmolömelëla säi.

Ilia Yesu eda mugabe Belesabulubalä nea hamosebela säi

(Madiu 12.22-30; Maga 3.20-27)

14 Dolö afädëma mugabe fedalahilä, adomolö ulï nelo amo Yesuea nesila digisebegi, dolö ado maade amea hä, ado adoi. Amala hamosebegi, udia dolö yafie gegedoi nefolalo amoli fudugisa nefolalo. 15 Amai gaso, odoaea sähalea, Goda mugabe neebe amolile dafidilo ëi Belesabuluea geloi ïasebegi, mugabe neebe amoli ea nesila digisa neamelëla säi. 16 Amase, odoa nefolalo amolia Yesu fedogola bimolöïe ema sähalea, Dolöea hamomolöi made gadoi afädë selesaia mosöala misi, dia nilïma hamola olemola säi. 17 Amala säsebegi, Yesuea ilile asigigi helësëi dibe amo dawadigilahilä, ilima sähalea, Gädili afädë hilimu moge mogela nuduseda, gädili amo nafademolömelë. Amo gadolamu, mosö afädëgi fii hilimu moge mogela nuduseda, fii amoda mugulumolömelë. 18 Amaimo, Saidania sigi neebea ami moge mogela hilimu nuduseda, ea beaha maadela sigi neebe amo abeahäla namolödu. Na ado säsebeweda, dilia nema Belesabuluea geloi ïasebegi, mugabe neebe amoli dia nesila digisa neamelëla säi amoïe sähamelë. 19 Gaso, na Belesabuluïe geloia mugabe fedai nesila digilo galëda, dilile malö neebe amolia nesila digilo amoda, nowëïe geloia nesila digilo. Ameada, ilia dilile gudi mogelo namolömelë. 20 Gasoda, na Godeïe naabo geloia mugabe fedai nesila digisa galëda, Godea Beaha Maadela Sigi Neebe amo, hä, dili neebea gui misi dialea gomelë.

21 Amaimo, dolö geloi afädëa helebe dadifulo hulu sulubadela gaulahilä, hïle mosö idihë aligiseda, ïe nelegei dibe amoli hedabi dië bimolömelë. 22 Ea helebe dadifulo gaulahilä, neda dofea neala helësëi. Amai gaso, dolö geloi afädë, elö amoïe geloi baagila asi amo maala, ea nudula salolela baagila awäla, ïe helebe, dadile fedela gaulahilä, ïe nelegei amo dolö odoagali mogela sogomolömelë.

23 Afädë e nebalä made nea galëda, hï nebalä ado nii nea. Amase, afädëa nebalä made gedolasiseda, ea dusula afiaha maademäia nesila digisamelëla säi.

Mugabe bu obëgëi

(Madiu 12.43-45)

24 Yesuea ado aso, sähamu nea sähalea, Dolö afädëma mugabe fedai amo doadigila awäseda, mugabe amo sege falaia awälahilä, e hele fimolöïe sege hogosa nea, afädë made beagolelomelë. Made beagolesegi, hïdo sähalea, Mosö dïgïla misia ami bu obëgëmolöla sälomelë. 25 Awäla mosöa besela galala beahamelebe, gëgelë doala, nelebo sulubadela hedabola negesi diëgi beagolelomelë. 26 Bea negesiä, bu doadigila awälahilä, hï eda holöbö hedabilahilä, mugabe gifalädalïa nafadefalï nafade nefolalo amoli sigi obëgëla awäla nogila digalahilä, mosö amogi aligilo. Amaimo, dolö amo dafidi nafade nelo amo baagila, hobealada, nafadeifalï aligilomelëla säi.

Obeägïmolö amoda, udia dolö abodo gadoia

27 Yesuea ado amo säha nebegi, udia dolö gegedoi nefolalebe amoligi, udia afädëa gelola säia adogosalea, Udia di neegela ägüla dodo ïlo sebe ameada, obeägïsa neala säi. 28 Amala säsebegi Yesuea sähalea, Amai gaso, udia dolö Godeïe ado nabala bëgëla hamosa neebe amoliada, edefademalä obeägïsa neamelëla säi.

Dolö odoaea Yesuma dolöea hamomolöi made gadoi hamomola säi

(Madiu 12.38-42; Maga 8.12)

29 Udia dolö yafie maahamu nebegi, Yesuea sähalea, Udia dolö walio nefolalebe welia nafademu hamosa neebe go. Ilia dolöea hamomolöi made gadoi hamomola sälo. Gaso, hamomolöi made gadoi afädë ilia bimäia made olela, Yonama hamoi amomu olemolömelë. 30 Siiba, Yonada nofe elöi Godea Niniba udia dolöma olei. Amo gadola wäla, Dolöïe Malöda, nofe elöi Godea udia dolö walio nefolalebe welima olesamelë. 31 Memelela gudisolo amo gala, gädili Siba udia dolö beaha aligilo gini udia ameada, walio udia dolö nefolalebe welibalä nowela aligilahilä, ilima dofea made hamoimelëla sämolömelë. Mida, udia amea Solomono asigi falagasei neebe amoïe ado nabulöïe, wagadi made hïle segeala naba misimelë. Gaso, nabuö. Afädë walio gui nebego eda, Solomono nelo amo gadoi made, baagila asi neamelë. 32 Memelela gudisolo amo gala, Niniba udia dolöea walio nefolalebe welibalä nowela nea, ilima dofea made hamoimelëla sämolömelë. Mida, ilia Yonaea Godeïe ado mala säla ï amo nabalahilä, asigi besusa maadei amea. Gaso, afädë walio gui nebego eda, Yona nelo amo gadoi made, baagila asi neamelëla säi.

Domaloïe yo digalo

(Madiu 5.15; 6.22-23)

33 Yesuea ado aso, sähamu nea sähalea, Afädëa gamali yola musügä negelo made, falo hawage negelo made. Ea yolahilä, udia dolö mumusogi maase amolia yo amo bimäia, aulidaia sagalo nea. 34 Siida domaloïe yo digalo gamali gadoi nea. Dïe si hedabi neëda, dïe domalo sulubadelagi yo digaha maadei nea. Be, dïe si nafadeseda, dïe domalo gasimi sagai nea. 35 Amaimo, dia hedabola idihë namialo. Dima yo digalo neebe amo usilahilä, asiala gasimi sagaloea. 36 Amai gabugi, dïe domalo go sulubadelagi yo digaha maadelahilä, fu afädëgi gasimi sagalo afädë maade galëda, gamali yoi amo gadoia dihïdi yo digaha maadei namolömelë.

Yesuea Felesi dolöge, mala säla negei amo oleleloge nefolalo amolima asiala hamosebela säi

(Madiu 23.1-36; Maga 12.38-40; Ulugu 20.45-47)

37 Yesuea ado amo hä, säha maadesebegi, Felesi dolö afädëa, ea mosöa molö molö misiëla säsebegi, e awäla ea mosöa ami molö naha sulo. 38 Yesuea naabo nigime hëla made, molö naha sebe amo bealahilä, Felesi dolö amo fudugisa sulo. 39 Amala fudugisa sebegi gaso, Dafidilo Geloia ema sähalea, Felesi dolö nefolalebela dilia gaaboge, faloge, gafodo baagidomu nigime hësalea, dilile iso asigiada, gesami awäla fa neloge, nafadege, nobai nebego. 40 Asigi maade dili, daia go hamosaleada, isoge hamoi madele. 41 Amaimo, nelebo falodaia dibe amoge, gobo isogi dibe amoge, dolö busadäoi neebe amoligali ïmalo. Amala hamoseda, dilile nelebo amo sulubadelada, dofä nigime hësa maadei diamolömelë.

42 Felesi dolö dili, asigii gabu. Dilia molö hëdälo fogomo gadoi elö elöla sagai dibe amogi, nabülasi mogelahilä, nabü afädë neala Godegali ïlo, gaso mogola hamomolö amoge, Gode boba hamomolö amoge, made hamola buludola fisilo goea. Dafidi säi amo made fisisaleada, dilia ado edefade gowele hahamosa namolö dialea.

43 Felesi dolö dili, asigii gabu. Dilia gedolo mosöa dafidilo filo dibea ami fimolömu hamelo goea. Amase, magaia gaamugi udia dolö nefolalebe amolia, di go gabiola sämäia hamelo goea.

44 Dili asigii gabu. Dilida udia dolöea baagoi dögöla negei dibe amo made beala, fuduia asiala aulo amo gadoi goea.

45 Amala säi amo nabalahilä, mala säla negei amo olelelo afädëa Yesuma säla obëgësalea sähalea, Säla Olelelo-o, dia ado säi ameada, nilïge gagadesebegola säi. 46 Amala säsebegi, Yesuea säla obëgësalea,

Mala säla negei amo olelelo nefolalebe dilige, asigii gabu. Dilia nelebo yöi häuala gaulo amo udia dolöea gaumäia negesilahilä, naabo gumu fufuia adogola ugila negelo made goea.

47 Dili asigii gabu. Dilile mäu nefolalo amolia bea sälo nufi amolile baui mosö, dilia olelo goea. 48 Amala hamolo ameada, dilile mäu nefolalo amolia hamoi amoda, dilia hedabola hamoila helësëse amo ulufala olelo. Ilia bea sälo nefolalo amoli nufudasebegi, dilia ili bauia amida, mosö olasilo gabugo. 49 Mi amoïe, Godeïe asigi falagasei amea sähalea, Na ili neebea bea säloge, abosologe, fisiga wemolö gasoda, odoada ilia baagomäia nufudadigi, odoada ilia sëlasisa namolömelëla säi. 50-51 Amaimo, dafidi sege föi dibe sulubadela mi gäwila hamoia amila, bea sälo nefolalo nufi amoli, dafidi Aibeledale heale digaia amila awäla, Segelaeage, dolö amolia gobela ïlo mosöle aulile mogogi ami nufi amoïe heale digaia ami awäla, sulubadelaïe heale digai ameada, udia dolö walio nefolalebe weli së molömelë. Na dilima dofä säla ïahago. Amo sulubadela amoïeda, udia dolö walio nefolalebe weli së molömelë.

52 Mala säla negei amo olelelo nefolalebe dili, asigii gabu. Mala amo dawadigimolöïe mosö isogi nogila digamäia, idi gai dogelo gii amo dilia neala musügä negelo goea. Dihili dilida, nogila digahalea made, udia dolö odoa nogila digadelä hamosegida, made nogila digamäia, dilia dofogai gabu.

53 Yesuea amo sälahilä awäsebegi, segeyo amila Felesi dolö amoliage, mala dawadigi amoliage, ema gelola gagadela, elö elöla naba obëgë obëgësalea, 54 e dahila nimolöi walebelela bimolöïe, fedogola bease amogi abeahäla ado säsebelela beaha nelo.

<- Ulugu 10 Ulugu 12 ->