1 Ariya, Yesus no ege onou lewai, “Tere huwanyatege adai ou gonga, ninatege baingaro isagu. Tere Itou bonade huwanyatege ngalenga wagu. Ono bonade, tere ji bonade fere huwanyatege ngalenga wagu. 2 Ji yame Jijei nomo mata langa, no jauli baingaro inyina, onou bona ji tere tebere haumu haiya tagei nomo bona manini. Onou uwa wage wa, ji beele beha ada letigege. 3 Ji mani haumu haiya tagidu boni, ji ege gidu medu tere hatigehenga, manidu ji ngate yafei nomo. Onodu haumu ji yafani la waha langa, tere fere haumu waha langa, ji ngate yafei nomo. 4 Onodu haumu ji manoni waha langa, manei nomo jala waha tere elebe amina isiyaha.”

5 Ono wainga, Tomas no Yesus letuwai, “Anyakaro, ne alanga goini waha ere alai uwa. Onou wa, ere adadu jala waha boya isei nomo edo?” 6 Ono wainga, Yesus no benou letuwai, “Ji yagenga, ji jala. Ji beele ngalenga nomo hugu. Ji agenege auma nomo hugu. Fai ete-te, no Jijei bagu jala fere la manei nomo edo uwa. No ji langa, no manonbona. 7 Tere ji boya amina isiyaha wonga, elebe tere yame Jijei bonade fere edola isi tuwagu ganga. Elebe tere no isi tuwei nomo hugu wariyaha. Onodu tere no amina ureyaha.”

8 Ono wainga Filip no Yesus benou letuwai, “Anyakaro, ne ere Jijei abitimu higau. Ono wahenga, waha no ebere gauwou ninage bagu edomu wonbona.” 9 Ono wainga Yesus no letuwai, “Filip, ji saini ufaro tere bagu yafene waha, ne ji bona foo hinei uwa yo? Fai no ji yeriyana waha, no Jijei urena. Adadu boni ne leni, ‘Ne Jijei abiti higau hini?’ 10 Ji Jijei langa yafa genenga, Jijei no ji langa yafana waha bona ne huwanyate ngalengawei uwa rute? Beele ji tere letigini waha, ji yage yame ninafe langa ada letigi-tigini. Uwa. Jijei ji langa yafana waha, no nomo haruwe ono-onona. 11 Tere beele beha bonade huwanyatege ngalengawou. Ji Jijei langa yafa genenga, Jijei no ji langa yafana. Onou uwa wonga wa, tere haruwe oruwa ji ononi waha bonade ninatege isadenga, waha no tebere huwanyatege ngalengawou jaimu tagonbona.

12 “Ji tere ngalenga letigini. Fai no ji bona huwanya ngalenga wona wa, no fere nere haruwe ji ononi onou ono wonbona. No haruwe aroro, haruwe ji ono wene waha feiya hiyou ono wonbona. Taate bona, ji Jijei bagu manini. 13 Onodu, tere dada oruwa bona, ji unyife langa isoki wagu wa, ji ono wonboni. Ono wehenga, Jijei no nomo Idau langa, unyi anyakaro tonbona. 14 Dada oruwanga, tere ji unyife langa isoki wagu wa, ji ono wonboni.”

15 Ariya, Yesus no ege onou lewai, “Tere ji gaude hibonade wonga wa, tere yame beele oojo dewagu. 16 Ono wadenga, ji yame Jijei isoki tuwehenga, no tere dangamu tigei nomo hoyo tigou ete tigonbona. Ono wonga, no tere bagu gai-gai yafonbona. 17 Hoyo Tigou waha, no beele ngalenga nomo Hauri. Nere fai-aita bagu ha eseneha nere no ada tode. Nere no ureg uwa, onodu nere no bode ada isode. Ariya tere nu, no boya isiya. No tere bagu yafana, onodu no tere gamu langa yafonbona.

18 “Ji tere awa tigehenga, magana amenege anyanege gane bagu uwau dorofe ada yafagu ganga. Uwa. Ji ege gidu tere bagu monboni. 19 Saini menenga la, nere fai-aita bagu ha eseneha, nere ji ege ada yeriyode. Ariya tere nu, ji yeriyagu ganga. Ji agefe auma yafani, onou bona, tere fere agetege auma yafagu ganga. 20 Fati waha langa tere isagu ganga, ji yame Jijei langa yafa genenga, tere ji la yafaya. Ono geyenga, ji tere langa yafani. 21 Fai no yame nuuni beele tedu bona, no oojo dena wa, fai waha no ji bona gaude tuna. Onodu fai no ji gau hina wa, yame Jijei no fai waha gau tuwonbona. Ono gonga, ji fere no gau tuwon boni. Onodu ji yage we, yage no abitimu tuwon boni.”

22 Yesus no onou lewainga, Judas ete, no Judas Iskariot uwa, no Yesus benou isoki tuwai, “Anyakaro, adadu bona ne nage ne ere abitimu higi boni, nere ha eseneha nomo fai-aita bagu nere, ne nage ne abitimu nigei nomo edo uwa?” 23 Ono wainga, Yesus no beele ege gidu benou letuwai, “Fai no ji bona gaude tuwona wa, no yame beele oojo dewonbona. Ono wonga, yame Jijei no fai waha bona gau wonbona. Ono wonga, ere no bagu maidu boyare, gai-gai no bagu yafo boyare. 24 Fai no ji bona ada gaude tuna wa, no yame beele waha ada oojo de-dena. Beele tere isiya beha waha, ji yage yame beele uwa. Wa yame Jijei nomo beele, no ji huuru hiyainga meene waha.

25 “Saini ji tere bagu yafa boni, ji tere dada beha boni letigenaha. 26 Ariya, hoyo tigou tigini dangamu tigei nomo wa Hauri Guuni. Jijei no ji yame unyife langa huuru wonga monbona. No dada oruwa bona tere isisiwou tigonbona. Onodu bona, no tebere ninatege jaimu wonga, tere beele oruwa ji letigeneha waha bonade, ege ninatege isagu ganga.

27 “Ji tere awa tigon boni, waha bona ji yame huwanyafe foinga inyou wa, tere tigini. Ariya ji yame huwanyafe foinga inyou tere tigini beha waha, nere fai-aita bagu ha eseneha waha, nere tigide dorofe uwa. Onou waha bona, tere huwanyatege ou gonga, ninatege baingaro isi bonade adai umugagu. 28 Ji beele beha letigenenga, tere amina iseyeha: ‘Ji tere awa tigidu manon boni. Onodu ji ege gidu tere bagu monboni.’ Tere ji gaude hibonade wonga wa, ariya waha no tere edo ono tigonga edega wagu ganga. Taate bona, ji Jijei bagu manon boni, Jijei no ji feiya hidu no amugou tigini. 29 Ariya, dada waha iinga heigei uwa inyi ganga, ji elebe waha bona amina letiginaha. Onou waha bona, iinga saini dada waha heigonga, tere huwanyatege edo ngalenga wona.

30 “Ariya, ji tere bagu beele inyanga ada lewoni. Taate boni, ha esene beha ofagou fai mora bagu waha no amina maina. No ji dada ete ono hiyei nomo danga uwau, 31 ariya ji gauni wa, nere fai-aita bagu ha eseneha edo isode wa ji Jijei gaude tu-tuni, onodu ji Jijei dada oruwa onowei nomo lehina waha, oojodu ono-ononi. Ariya tere jayadenga ere goyoya.”

<- Jon 13Jon 15 ->