1 Jisasame lao pituu, “Kingdom kaiti-kisa singi doko, ee tange mendeme yongama wamba sakatatala, baanya waene ee dokonya kalai pyekena lao, kalai akali mendapu lanyala peamo dopale. 2 Ee tange dokome kalai akali mendatupa lanyepala, yuu gii mendainya silipa muni mendaimi yole pitoana, waene ee dokonya kalai pyakala pena leamopa, dokaitame yaka-lumuna latala peami. 3 Pateaminopa 9 kilokopi mendenya, ee tange doko maketanya pupala kandeamopa, akali waka mendatupa kalai mende napyoo mee kateami. 4 Kateamino kandatala baame dokaita lamaiyoo, ‘Nambame nyakama yole pipenge dutupame pitoana, nyakama apata nambanya waene ee dokonya kalai pyakala pupa’ lea. 5 Dopa lateamopa akali dupa kalai pyakamaiya peami. Dutupa pateaminopa, 12 kilokopi, 3 kilokopinya baa deaka maketanya pupala, dopaka pyoo kalai akali mendatupa lanyepala, waene ee dokonya kalai pyakala pena leaka. 6 Deaka 5 kilokopi mendenya pupala, baame akali mendatupa mee kateamino kandatala dokaita lamaiyoo, ‘Aipuma nyakama indupa gii dake pitaka dakenya mee kalyamipi?’ lea. 7 Dopa leamopa dokaitame baa lamaiyoo, ‘Akali mendeme naima kalai nandipyanya, naima mee kalyamanona’ leami. Dokopa baame dokaita lamaiyoo, ‘Nyakama yole nyepengeli pyoo nyalaminona, nyakama apata nambanya waene ee dokonya kalai pyakala pupa’ lea.

8 Lep 19:13; Diut 24:15“Yuu kuiyalanya piamopa, waene ee tange dokome ee isakamaingi doko lamaiyoo, ‘Embame kalai akali dupa epena latala yole pipi. Yole pyoo pituu, kalai akali maita-pyao ipamino dupa wambao yole pima-pima pyoo, yongama wamba ipamino dupa yole pipi’ lea. 9 Dokopa kalai akali 5 kilokonya kalai pyoo tee piami dupa ipupala, silipa muni mendai lao nyiami. 10 Dopa pyoo nyiaminosa, kalai akali yongama wamba kalai pyoo tee piami dupame muni mendalapo apata wakao nyalamano lao masiami. Dopaka doko, dokaita apata silipa muni mendai laowaka nyiami. 11 Dopa pyoo nyepala, dokaitame ee tange doko mumu leami. 12 Dopa latala ee tange doko lamaiyoo, ‘Kalai akali maita-pyao ipamino dokaitame awa mendai iki kalai pimino. Niki yale mende tamupa, naima indupa gii dake pitaka lekeleke tao kalai pyemano doko, embame dupa naima-pipa kapa-kapa lao yole pilyinona’ leami. 13 Dopa leaminopa, ee tange dokome kalai akali dupanya mende lamaiyoo, ‘Kaimii, nambame emba minakasala naelyo. Emba silipa muni mendai nyatalena lapupa, nalimba pii lao yaki pyaa naeyalambape? 14-15 Emba yole pyoo dopaka pyoo, kalai akali maita-pyao ipamino dupa nambanya auu kaengeme yole pyoo. Nambanya muni dokome mendita mende pitoo lao masotoli pito doko, loo mende yalatope? Namba akali epe dokonya, emba mona koo palelyepe? Embanya yole doko nyoo puu’ lea. 16 Matyu 19:30; Make 10:31; Luku 13:30Dopana, maita-kaita kalyamino dupa tanga enomba nyoo katatami. Enomba nyoo kalyamino dupa tanga maita-kaita katatami. Aipumape, Goteme endakali longo epena lengeaka doko, baame endakali kuki yapao nyingina” lea.

17 Make 10:32-34; Luku 18:31-34Jisasa baa lalyoo Jerusalema pao pituu, baanya 12 disaipolo dutupa iki laminao, umbisale pupala lamaiyoo, 18 “Salapape! Naima lalyoo Jerusalema pelyamano. Pupala katatamanopa, Akalinya Ikiningi doko prisa mupapi, Mosesanya loo mana nyepaepi, dupanya kinginya maitamopa, dupame baa pyao kumasepengena latami. 19 Dopa latala, baa lamba lao, konjame pyao petala, poko itanya pyao yukuina lao, akali tata waka dupanya kinginya maitami. Dopaka doko, yuu gii tepo dokonya baa sakatatana” lea.

20 Make 10:35-45Gii dokopa, Sebedi ikiningi dolaponya endangi doko baanya ikiningi dolapo-pipa Jisasa katea dokonya ipupala, baanya enombanya endangi doko luma lakapala, baa-kisa mende tee lea. 21 Dokopa Jisasame baa lamaiyoo, “Nambame embanya aipa pyakapili lao masilyipi?” lea. Dokopa enda dokome baa lamaiyoo, “Embanya kingdom dokonya, nambanya wane dalaponya mende embanya kingi tolaetena petena lakape. Mende embanya kingi koeyatena petena lakape” lea. 22 Dopa leamopa Jisasame yanu pyao, “Nyakamame tee lelyamino doko masala naeyao tee lelyamino. Nambame kapo kenda paleta mendenya nalapo dokonya nyakambame kapa pao natambipi, pande nambame kaimbu kenda paleta mende nyalapo doko nyakambame kapa pao nyetambipi?” lea. Dopa leamopa dolapome baa lamaiyoo, “Nalimbame kapa pao dopa pitambana” leambi. 23 Dopa leambinopa Jisasame dolapo lamaiyoo, “Kiningi, nambame kapo kenda paleta mendenya nalapo dokonya nyakambame natambiaka. Namba kaimbu kenda paleta mende nyalapo doko nyakambame nyetambiaka. Dopaka doko, nambanya kingi tolaetena petena lapenge dokopa, nambanya kingi koeyatena petena lapenge dokopa, dolapo nambanya kalai daa. Nambanya Takange dokome pititambina lao depa latae endakali dolapo pititambina” lea. 24 Pii doko sepala, disaipolo akalita dutupame kaiminingi lapoma dolapo imbu kaeyami. 25 Luku 22:25-27Dopa piaminopa, Jisasame disaipolo dutupa epena latala lao pituu, “Akali tata waka dupanya isingi akali dupame isoo katengema endakali dupa kandanya palyetala, dokaita alyasale joo katengema doko nyakamame kandengema. Akali tata waka dupanya akali andake dupame nyakamanya pii wata-minekena lao kandatae paengema doko nyakamame kandengemaka. 26 Matyu 23:11; Make 9:35Dopaka doko, nyakamanya kainanya mana dopale dupa naseta. Nyakamanya mende akali andake katapuli lao maseteno doko, baa nyakamanya kalai akali katapenge. 27 Nyakamanya mende enomba nyoo katapuli lao maseteno doko, baa nyakamanya kendemane katapenge. 28 Dopaka pyoo, Akalinya Ikiningi dokome baanya kalai pyekena lao naepea. Baame endakali dupanya kalai pyakamaiyoo, baa kumata dokome endakali longo sambao nyalanya epeana” lea.

29 Make 10:46-52; Luku 18:35-43Dokaita Jeriko yakinatala peaminopa, endakali kambu andake mendeme baa watao peami. 30 Dokopa akali lenge monda lapoma kaitini lemba dokonya peteambi. Jisasa ipao pelyamo leami doko akali dolapome sepala wii lao, “Kamongo, Dapita Ikiningi, embame nalimba kondo kaeyapoko!” leambi. 31 Dopa leambinopa, endakali kambu dokome dolapo pii kaena lao pyalanya leami. Dopa leaminopapi, akali dolapome etete puu lao wii lao, “Kamongo, Dapita Ikiningi, embame nalimba kondo kaeyapoko!” leambi. 32 Dopa leambinopa Jisasa katapala, akali dolapo epena latala lamaiyoo, “Nambame nyakambanya aipa pyakapili lao masilyambipi?” lea. 33 Dokopa akali dolapome baa lamaiyoo, “Kamongo, nalimba lenge auu pyoo tambuli lao masilyambanona” leambi. 34 Dopa leambinopa, Jisasame akali dolapo kondo kaeyapala, baanya kingimi dolaponya lengenya watandalu peteamopa, lapota auu pyoo lenge talu petala, baa watao peambi.

<- Matyu 19Matyu 21 ->