1 [a][b]Gii dokopa disaipolo dupa Jisasa katea dokonya ipupala baa lamaiyoo, “Kingdom kaiti-kisa singi dokonya api alyasale joo kalyape?” leami. 2 Dopa leaminopa, Jisasame wane koo mende epena latala, dokaitanya kainanya katasetala 3 [c]dokaita lamaiyoo, “Nyakamanya mana dupa aloo petala, wane wanakupi koo joo nakatatamino doko, kingdom kaiti-kisa singi dokonya kolandala naeyatamina lao nambame nyakama kiningi langilyo. 4 Endakali mende baa anasale jetala, wane koo dapale joo kalyamo doko, baa kingdom kaiti-kisa singi dokonya alyasale joo katenge. 5 Endakali mendeme nambanya kenge dokonya wane koo dapale mende auu kaeyao lanyilya dokome, namba lanyilyamosaka pingi. 6 [d]Dopaka doko, namba tungi pingima wane koo datupanya mende endakali mendeme koo pina lao mapusetamo doko, baa tumbi-tambi napala kumina lao, wita dii indyepenge kana yale mende baanya mangenya kende katatala, solowata lumu mendasa soo pyandamili doko yaka jipyalina” lea.

7 “Koo pina lao mapusingi tata longo dupa isa yuu dakenya silyamo dokonya isa yuu dake koeyata! Koo pina lao mapusingi tata longo dupa kiningi etete ipata. Ipataka doko, koo pina lao mapuseta akali doko baa koeyata! 8 [e]Embanya kingi mokopi mendeme emba koo pyaale lao mapusia-kandeno doko, kepanya nepape. Moko kepanya nepatalapi, kingi kepanya nepatalapi, emba lete katenge dokonya kolandateno doko auu pita. Kingi lapotapi, moko lapotapi katao, itate tao kalyu katenge dokonya soo pyandatamo doko auu napita. 9 [f]Embanya lenge mendeme emba koo pyaale lao mapusia-kandeno doko, lukunya nepape. Emba lenge mendai iki tao, lete katenge dokonya kolandateno doko auu pita. Emba lenge lapota tao, itate tao katenge, ele panda koo dokonya soo pyandatamo doko auu napitana” lea.

10 “Wane koo datupanya enjele dupame koteaka lao nambanya Takange kaiti-kisa katenge dokonya enomba kandengemana, nyakamame dupanya mendaipi mende kandanya palyala naeyalapape lao nambame nyakama langilyo. 11 [g]Aipumape, Akalinya Ikiningi dokome endakali alu petae dupa pyoo nyalanya epea. 12 [h]Nyakamame aipa lao masilyami? Akali mendenya sipisipi 100 katata dokonya mendai alu pitamopa, baame aipa pita? Baame sipisipi 99 dutupa katena latala, mendai alu pita doko yuu manda dupanya pupala kutala naeyatape? 13 Nambame nyakama kiningi langilyo: Sipisipi 99 alu napitami dutupa auu kaeyatamoaka doko, baame mendai doko kutao nyepala etete auu kaeyata. 14 Dopaka pyoo, nyakamanya Takange kaiti-kisa katenge dokome wane koo datupanya mende alu napipya laka lao masingina” lea.

15 [i]“Embanya kaiminingi mendeme emba koo pingitamo doko, baa katata dokonya emba pupala, nyakamba iki pitipala, baanya koo pita doko lao panasoo lamaipi. Lamaitinopa, baame embanya pii doko setamo doko, embanya kaiminingi doko pilyoo nyete. 16 [j]Baame embanya pii doko nasetamo doko, pii pepa pyapae singili pyoo, nyakambanya pii latambi dupa sina, endakali mendai lapopi mende lanyepala baa dee lamaiya pupape. 17 Baame dutupanya pii nasetamo doko, embame siosanya endakali kambu pyatae dupa lamaipi. Baame siosanya apata pii nasetamo doko, baa akali tata wakapi, takisa nyingipi, dopale-lamo lao masalapape. 18 [k]Nambame nyakama kiningi langilyo: Nyakamame dopale mende isa yuu dakenya yaki pitamino doko, kaiti-kisa yaki petaeyaka seta. Nyakamame dopale mende isa yuu dakenya tata latamino doko, kaiti-kisa tata lataeyaka seta. 19 Nambame dee nyakama dapa langilyo: Nyakamanya mendalapome isa yuu dakenya katao mona mendai palipala, nambanya Takange kaiti-kisa katenge dokome mende pyekena lao tee latambinopa, latambiliaka pyakata. 20 Endakali lapo tepopi mende nambanya kengenya kambu pyao pititami dokonya kainanya namba apata katatona” Jisasame lea.

21 [l]Dokopa Pita baa Jisasa katea dokonya ipupala baa lamaiyoo, “Kamongo, nambanya kaiminingi mendeme paa akipatesa koo pingitamopa, nambame baanya koo dupa kame sakamaipenge? Paa kalangesape, pande akipatesape?” lea. 22 Dopa leamopa Jisasame baa lamaiyoo, “Paa kalangesa iki daa. Paa 77 pyoo koo pita dupa kame sakamaipengena lao nambame emba langilyo.

23 “Dopana, kingdom kaiti-kisa singi doko kiŋi mendeme baanya kalai akali dupa-kisa yanu maiyamo dupa yanu pyekena latoo lao masiamo dopale. 24 Kiŋi dokome tee pyao yanu dupa pyekena lao kateamopa, kalai akali yanu singi dupanya mende laminao epeami doko-kisa silipa muni tausene akalita yanu sia. 25 Akali dokome yanu dupa kapa pao pyapenge nanjiamosa, kiŋi dokome akali dokopi, baanya enda wanepi, baanya oapipi dupa pitaka salimi latala, yanu dupa pyekena lao lamaina lea. 26 Dopa leamopa, kalai akali dokome kiŋi dokonya enombanya luma lakapala, ‘Akali Andake, nambame embanya yanu dupa pitaka pyakatona, embame namba maka nakaenya malisepoko’ lea. 27 Dopa leamopa, kalai akali dokonya akali andake dokome baa kondo kaeyapala, baanya yanu dupa kaeyapala kaeya. 28 Dopa peteamopa, kalai akali doko pupala, baanya kalai akali yango mende-kisa 100 silipa muni yanu sakamaingi doko kutao kandatala, mangenya puu lao minia. Minatae katao baa lamaiyoo, ‘Nambanya yanu dutupa pyaka’ lea. 29 Dopa leamopa, kalai akali yango dokome baanya moko sia dosa luma lakapala baa lamaiyoo, ‘Nambame embanya yanu dupa pyakatona, embame namba maka nakaenya malisepoko’ lea. 30 Dopa leamoaka doko baame daa latala, kalai akali yango dokome yanu dutupa etao pyatakala ipatana latala anjinya pyandea. 31 Dokopa baanya kalai akali yango dupame piamo doko kandatala, dokaita mona etete kenda kaeyapala, dokaitanya akali andake doko pao lamaiyami. 32 Lamaiyaminopa, kiŋi dokome kalai akali doko epena latala lamaiyoo, ‘Emba kalai akali koo-lamo! Nambame emba nisepoko lao tee lapino dokonya, nambanya yanu emba-kisa sipumu dutupa pitaka kaeyapala kaeyapu. 33 Nambame emba kondo kaeyapu dopaka pyoo, embanya kalai akali yango doko kondo kaeyateno!’ lea. 34 Dopa latala kiŋi doko imbu kaeyapala, kalai akali dokome yanu dutupa etao pyatakala ipatana latala, tanda maingima akali dupanya kinginya maiya. 35 Dopana, nyakamanya kaiminingi mendeme koo pingita dupa monanya katao kame sakamaiya naeyatamino doko, nambanya Takange kaiti-kisa katenge dokome nyakama mendai-mendai dupanya koo pitami dupa kame sakala naeyatakana” lea.

<- Matyu 17Matyu 19 ->