1 [a]Gii mendatupa pateamopa, Jisasa baa Galali pete, kenge mende Taibiriasa lenge dokonya omotena pea. 2 Wamba Jisasame mirakolo dupa pyoo yaina pyapae dupa mee jakamaiyamopa, endakali kambu andake dokome kandeami dokonya, dupame baa watao peami. 3 Dokopa Jisasa baa yuu manda mendenya lalyoo pupala, baanya disaipolo dupa-pipa dokonya petea. 4 (Juumanya Pasopa nee andake napenge gii doko, dokopa tengesa pia.) 5 Baa petea dokonya endakali kambu andake mende epeamino kandatala, Jisasame Pilipa lamaiyoo, “Endakali dakaita breta nena anja-tae sambakamaimape?” lea. 6 (Baame dopa pitoana lao masetala, Pilipa makande pyoo pii dutupa lea.) 7 Dokopa Pilipame baanya pii yanu pyakamaiyoo, “Naimame silipa muni 200-tame breta sambapala endakali dakaita pitaka kuki lao nena maitamanopapi kapa napapome-lamona” lea. 8 Jisasanya disaipolo dupanya mende, Andru lenge, Saimone Pita kaiminingi dokome Jisasa lamaiyoo, 9 “Wane mende pilyamo dakenya breta bali diimi wasepae yungi-pipa, pisa lapo-pipa silyamo. Dopaka doko, dutupame endakali longo dakaita aipa petala kapa patape?” lea. 10 Dokopa akali tausene yungipi mende kateami. Kateami panda dosa tanu longo kateamopa, Jisasame baanya disaipolo dupa lamaiyoo, “Endakali dupa isa petena lapa” lea. 11 Dopa latala Jisasame breta dutupa nyepala, Gote yaka pilyino latala, disaipolo dupa maiyamopa, disaipolo dupame endakali peteami dupa mokosoo maiyami. Dokopa baame pisa dolapo nyepala, dopaka pyoo Gote yaka pilyino latala, disaipolo dupa maiyamopa, disaipolo dupame endakali peteami dupa mokosoo maiyamiaka. Maiyaminopa endakali dokaitanya auu kaengeme nyiami. 12 Nyepala endakali dokaitame nao tiaka kaeteaminopa, Jisasame baanya disaipolo dupa lamaiyoo, “Nee konjepae kakana sina kaelyamino dupa mee soo patana, nyakamame yapao nyoo mau pyalapa” lea. 13 Dokopa breta bali diimi wasepae yungi dutupanya endakali dokaitame nao kakana sina kaeyami dupa disaipolo dupame nyoo baseketa 12 tumbasiami. 14 Dokopa Jisasame mirakolo pia doko endakali dokaitame kandatala lao pituu, “Propeta mende isa yuu dakenya ipatana latae doko kiningi akali dake-lamona” leami. 15 Dopa latala, endakali dokaita ipao Jisasa minatala baa kyeto joo kiŋi kata laanya pilyamino lao kandatala, baa iki yuu manda mendenya pea.

16 [b]Yuu kuiyala epeamopa, Jisasanya disaipolo dupa lanao Galali pete dokonya peami. 17 Dokopa Jisasa naipao yuu iminjiamopa, dokaita sipi dokonya pyakalyetala endaki pete omotena, Kapename paanya peami. 18 Peaminopa poo yale mende lea dokome, endaki doko etete andake pyoo buli pia. 19 Dokaita kilomita yungipi mende sipinya pateaminopa, Jisasa endaki pete dokonya moko katao sipi dokonya tengesa epeamopa, disaipolo dupame kandatala paka kaeyami. 20 Dopa piaminopa baame dokaita lamaiyoo, “Namba epelyona, nyakama paka nakaeyalapape” lea. 21 Dopa leamo sepala dokaitame baa sipinya epena lamana lao masiami. Dopa lao masiaminopa, sipi doko lee mendai pao yuu nyakama mona lao masiami dokonya pyakamalu pia.

22 Yuu gii mende dokonya, endaki pete dokonya omotena kateami endakali kambu dupame kuaka sipi yakane mendai iki sipyana lao masiami. Sipi yakane dokonya disaipolo dupa iki pyakalyetala puminopa, Jisasa apata napumina lao masiamiaka. 23 Kamongome breta nyepala yaka pilyino lateamopa neami panda dosa tengesa, sipi yakane mendapu Taibiriasa katao ipao siami. 24 Dokopa endakali kambu dokome Jisasapi, baanya disaipolopi, dupa yuu dokonya nakateamino kandatala, sipi dupanya pyakalyetala Jisasa kutao Kapename peami.

25 Endaki pete dokonya yangitena Jisasa kateamo kandatala, dokaitame baa lamaiyoo, “Mana Lenge, emba gii andukupa ae ipupipi?” leami. 26 Dokopa Jisasame dokaitanya pii yanu pyakamaiyoo, “Nambame nyakama etete kiningi langilyo: Nambame mirakolo pipupa kandamino dokonya, nyakamame namba kutao naepelyamino. Nyakama breta nao tiaka kaeyamino dokonya, namba kutao epelyamino. 27 Takange Goteme Akalinya Ikiningi dokonya kalai pipenge dupa pitaka pina lao yakana latea. Dopa piana, nyakamame etapenge nee dupanya kalai napinya, lete etete katasingi nee, Akalinya Ikiningi dokome maingi dokonya kalai pyepape” lea. 28 Dokopa dokaitame baa lamaiyoo, “Naimame Gotenya kalai aipale mende pyakamaipengepe?” leami. 29 Dopa leaminopa Jisasame yanu pyakamaiyoo, “Gotenya kalai pyakamaipenge doko, akali mende baame epena lea doko tungi pyapengena” lea. 30-31 [c]Dokopa dokaitame baa lamaiyoo, “Endakali napalenge yuu dokonya naimanya yumbange dupa manaa nee doko neami-pyaa. Dopa piami dokonya dapa lao pepa pyapae singi: ‘Baame kaiti-kisa-tae breta doko endakali dupa nena lao maiya-pyaana’ lapae singi. Dopana, embame kalai aipale mende piti? Embame mirakolo aipale mende pitinopa naimame kandatala, pii lelyeno doko kiningina lao masemanape?” leami. 32 Dokopa Jisasame dokaita lamaiyoo, “Nambame nyakama etete kiningi langilyo: Kaiti-kisa-tae breta doko Mosesame nyakama nandia. Nambanya Takange dokome kaiti-kisa-tae breta angi doko nyakama dingi. 33 Kaiti-kisa katao isa ipupala, yuu dakenya endakali dupa pitaka lete katenge maingi akali doko, Gotenya breta dokona” lea. 34 Dokopa endakali dupame baa lamaiyoo, “Akali Andake, embame breta dokoaka koteaka lao naima dipi” leami.

35 Dopa leaminopa Jisasame dokaita lamaiyoo, “Lete katasingi breta doko nambana, endakali mende namba katato dokonya ipatamo doko, baa tanga-tangapi lopo kaeyala naeyata. Endakali mendeme namba tungi pyatamo doko, baa endaki nanu kaeyala naeyataka. 36 Nambame kalai pipu dupa nyakamame kandatala, namba tungi napilyaminona lao langyo doko deaka langilyo. 37 Dopaka doko, nambanya Takange dokome namba dita endakali dupa pitaka namba katato dokonya ipatami. Namba katato dokonya ipatami dupa nambame tanga-tangapi kamaka watao pyasala naeyato. 38 Nambanya masingili pyoo pyaanya namba kaiti-kisa katao isa naepeo. Namba puu lea dokonya masingili pyoo pyaanya epeo. 39 Nambanya Takange, namba puu lea dokonya masingili pyoo pipenge doko dake: Yuu etatamo gii dokopa, endakali namba ditae dupanya mendaipi mende alu napina lao, dupa pitaka nambame malunya sakatasepenge doko. 40 Ikiningi doko kandatala tungi pyatami endakali dupa pitaka lete etete katataminopa lao namba puu lea Akali dokome masingi. Yuu etatamo gii dokopa nambame endakali dupa malunya sakatasotona” lea.

41 “Breta kaiti-kisa katao isa epeamo doko nambana” Jisasame leamosa, Juu dupame baa mumu lao, 42 “Akali dakenya endangi takangepa dolapo naimame nakandengepe? Baa Josepe ikiningi Jisasa daa kandamuape? Aipa petala baa kaiti-kisa katao isa epeona lelyape?” leami. 43 Dopa leaminopa Jisasame dokaitanya pii yanu pyakamaiyoo, “Nyakama-lapo mumu kaeyalapa. 44 Nambanya Takange, namba puu lea dokome namba katato dokonya lanyoo naipata endakali doko namba katato dokonya naipata. Baame lanyoo ipata endakali doko, yuu etatamo gii dokopa nambame sakatasoto. 45 [d]‘Endakali dupa pitaka Goteme mana lamaitana’ lao propeta dupame pepa piami dupanya pyapae silyamo. Takange dokome pii lamaitamopa sepala mana nyetami endakali dupa pitaka namba katato dokonya ipatami. 46 Endakali mendeme Takange doko kanja naeya. Gotepa tole katao isa epeamo akali dokome iki Takange doko kandea. 47 Nambame nyakama etete kiningi langilyo: Namba tungi pingima endakali dupa-kisa lete etete katenge doko singi. 48 Lete katasingi breta doko namba. 49 Endakali napalenge yuu dokonya nyakamanya yumbange dupame manaa nee neamiaka doko, dokaita kumiami. 50 Dopaka doko, breta kaiti-kisa katao isa epeamo dake natami endakali dupa kumala naeyatami. 51 Breta lete katasingi kaiti-kisa katao isa yuu dakenya epeamo doko namba. Endakali dupa lete katataminopa lao breta dilyo doko nambanya yonge dokona, endakali mendeme natamo doko, baa lete etete katatana” lea.

52 Dopa leamopa, Juu dupame nyakama-lapo laloo pyoo, “Akali dakeme baanya yonge doko naima nalapale lao aipa petala ditape?” lao pii yanda piami. 53 Dokopa Jisasame dokaita lamaiyoo, “Nambame nyakama etete kiningi langilyo: Akalinya Ikiningi dokonya yonge taeyokopa dolapo nyakamame nanatamino doko, lete katenge doko nyakama-kisa naseta. 54 Nambanya yonge taeyokopa dolapo nao katengema endakali dupa-kisa lete etete katenge doko singi. Yuu etatamo gii dokopa, nambame dupa malunya sakatasoto. 55 Nambanya yonge doko nee angi doko. Nambanya taeyoko doko endaki angi doko. 56 Nambanya yonge taeyokopa dolapo nao katengema endakali dupanya mona andaka namba kalyopa, dupa nambanya mona andaka katengema. 57 Kataowaka katenge Takange dokome namba puu lea. Nambanya Takange, namba puu leamo doko mambele namba lete kalyo. Mendai dopaka pyoo, nambanya yonge doko nao katatami endakali dupa namba mambele lete katatami. 58 Wamba nyakamanya yumbange dupame manaa nee neaminoaka doko, dokaita kumiami. Breta kaiti-kisa katao isa epeamo doko dopale daa. Breta kaiti-kisa katao isa epeamo doko natami endakali dupa lete etete katatamina” lea. 59 Jisasame pii dutupa Kapename lotuu anda dokonya endakali dupa mana lamaiyoo lea.

60 Jisasame dopa lao mana lamaiyamopa, baanya disaipolo longome sepala lao pituu, “Pii dutupa tatake pipae-lumuna, apimi tenge dupa kapa pao soo nyetape?” leami. 61 Baanya disaipolo dupame pii dutupanya mumu lelyamino lao Jisasame kandatala dokaita lamaiyoo, “Pii dutupame nyakama kenda pisilyape? 62 Kenda pisetamo doko, Akalinya Ikiningi doko wamba katenge yuu dokonya ketae pyakalyetamopa, nyakamame kandatala aipa lao masetami? 63 Spirita dokome endakali dupa lete katenge doko maingi. Endakalinya kyetome mende pyaa naenge. Nambame nyakama pii langilyo dupa, Spirita dokopa, lete katenge dokopa, dolapo langilyo. 64 Dopaka doko, nyakamanya mendapuame namba tungi napilyaminona” lea. (Jisasame baanya kalai tee pia gii dokonya pituu, baa tungi napyatami endakali dupapi, baa yandapipi dupanya kinginya maita akali dokopi, dupa wambao kandatala baame dopa lea.) 65 Jisasame lao pituu, “Nambanya Takange dokome yakana laa naeyatamo doko, namba katato dokonya endakali mende naipatana lao langyo doko, nyakamanya mendapuame namba tungi napyaminosa langyona” lea.

66 Baame dopa leamosa, baanya disaipolo longome baa yakinatala, dee baa tole napiami. 67 Dokopa Jisasame baanya 12 disaipolo dutupa lamaiyoo, “Nyakama apata namba yakinatala mona lao masilyamipi?” lea. 68 [e]Dokopa Saimone Pitame baanya pii yanu pyakamaiyoo, “Kamongo, lete etete katasingi pii dupa emba-kisa silyamo doko, naima api-kisa mona? 69 Emba Kraisa, Gote kataowaka katenge dokonya Ikiningi dokona lao naimame masetala tungi pilyamanona” lea. 70 Dopa leamopa Jisasame dokaitanya pii yanu pyakamaiyoo, “Nambame nyakama 12 disaipolo dutupa yapao nyio. Dopaka doko, nyakamanya mende imambu koo paleta petelyamanona” lea. 71 Pii doko, 12 disaipolo dutupanya mendeme Jisasa yandapipi dupanya kinginya maitoo lao masia, Saimone ikiningi Judasa Iskariota doko lao lea.

<- Jone 5Jone 7 ->