1 Wẽrãrãda juesuma panasid̶aa: Maala, Noa, Hogla, Milca idjab̶a Tirsa. Ãdji zeza querasira Zelopeha basía. Idjira Jose warra Manased̶eba yõna basía. Heper warra basía idjab̶a Gala wiuzaque basía. Galara Maqui warra basía. Maquira Manase warra basía. 2 Ewari ab̶a Zelopeha querasi caurãra Ãcõrẽ wua ded̶e ed̶a wãbadamaa wãsid̶aa. Mama Moise quĩrãpita, sacerdote Eleaza quĩrãpita, puru quĩrãpita bid̶a nũpanenaped̶a nãwã jarasid̶aa:

3 –Dai zezara ẽjũã põãsa ewaraga b̶ʌd̶e jaid̶asia. Coreba, idjiare b̶ea bid̶a Ãcõrẽ igarasid̶ad̶e dai zezara beuẽ́ basía, ãtebʌrʌ idjia cadjirua od̶a carea jaid̶asia. Idjira umaquĩrã warra neẽ́ b̶asia. 4 Daimaarã biẽ́ b̶ʌa maʌ̃ carea dai, idjid̶eba yõbʌdarãba ẽjũãda edad̶aẽ́da.[a] Dai zeza djabarãba edabʌda ẽjũãnebemada dairãa bid̶a diad̶adua.–

5 Ãdjia bed̶ea djuburia panʌra Moiseba Ãcõrẽa jarasia. 6 Maʌ̃ne Ãcõrẽba panusia:

7 –Zelopeha caurãba arid̶e jara panʌa. Ãdji zeza djabarãba edabʌda ẽjũãnebemada diad̶adua ãdjid̶eba yõbʌdarãba erob̶ead̶amãrẽã. 8 Israelerãa nãwã jaradua: “Ab̶aʌda umaquĩrã warra neẽ́ jaid̶aibʌrʌ, idji ẽjũãra dji caua diad̶adua. 9 Baribʌrʌ idjia cau sid̶a neẽ́ b̶ʌbʌrʌ, ẽjũãra idji djabarãa diad̶adua. 10 Djabarã sid̶a neẽ́ b̶ʌbʌrʌ, ẽjũãra idji zeza djabarãa diad̶adua. 11 Idji zeza bid̶a djabarãda neẽ́ b̶ʌbʌrʌ, idji ẽberãrãnebema dji caitaara b̶ʌ́a diad̶adua maʌ̃gʌd̶e bamãrẽã.” Israelerãba maʌ̃ leyra ẽpẽnida panʌa mʌ̃a bʌ́a jara b̶ʌ quĩrãca.–

12 Maʌ̃be Ãcõrẽba Moisea jarasia:

–Abariʌ̃ eyad̶e ʌ̃taa wãdua. Mamaʌba mʌ̃a israelerãa diai druara acʌdua. 13 Maʌ̃ drua ununacarea bʌra jaid̶aya bʌ djaba Aaroʌ̃ jaid̶ad̶a quĩrãca.[b] 14 Mãwã jaid̶aya bãrãba Ziʌ̃ ẽjũã põãsa ewaraga b̶ʌd̶e mʌ̃a jarad̶ara ĩjã od̶aẽ́ basi bẽrã. Mama israelerãba quĩrũbid̶eba baido iwid̶isid̶ad̶e bãrãba ãdjirãa mʌ̃ra wãrãda Ãcõrẽda cawabid̶aẽ́ basía.–

(Maʌ̃ra mãwãsia Ziʌ̃ ẽjũã põãsa ewaraga b̶ʌd̶e Cadé abadama. Mama Ãcõrẽba mõgarad̶eba baido weabid̶ama trʌ̃ b̶ʌsid̶aa “Meribá.”)[c]

15 Moiseba jarasia:

16 –Mʌ̃ Boro Ãcõrẽ, bʌd̶eba jũmarãda zocai b̶eaa. Maʌ̃ bẽrã mʌ̃ cacuabari ab̶a b̶ʌdua naʌ̃ puru boro bamãrẽã. 17 Maʌ̃ ẽberãra puru na nĩbaida b̶ʌa bia pe enibai carea. Mãwã bʌ purura oveja dji wagabari neẽ́ b̶ʌ quĩrãca b̶aẽ́a.

18-19 Ãcõrẽba jarasia:

–Mãẽteara israelerã boro bamãrẽã Nuʌ̃ warra Josueda b̶ʌdua. Idjia mʌ̃ Jaureda erob̶ʌa.[d] Idjira sacerdote Eleaza quĩrãpita, puru quĩrãpita bid̶a ededua. Mama bʌ jʌwara idji boro ʌ̃rʌ̃ b̶ʌdua acʌbi carea idjira ãdji boroda b̶ʌbʌrʌda. 20 Idjira b̶ʌdua berara ne jũmane bʌa o b̶ad̶a quĩrãca poya o b̶amãrẽã. Mãwã Israel puruba jũma idjia jarabʌrʌra ĩjã o panania. 21 Israelerã boro b̶ed̶acarea Josuera sacerdote Eleazamaa wãida b̶ʌa mʌ̃a quĩrĩã b̶ʌra cawai carea. Mʌ̃ quĩrãpita b̶ʌd̶e Eleazaba Uriʌ̃ abadad̶eba mʌ̃a quĩrĩã b̶ʌra cawaya.[e] Maʌ̃be idjia jarabʌrʌra Josueba, israelerã bid̶a jũma ĩjã o pananida panʌa.[f]

22 Ara maʌ̃da Moiseba osia Ãcõrẽba jarad̶a quĩrãca. Josuera edesia sacerdote Eleaza quĩrãpita, puru quĩrãpita bid̶a. 23 Mama idji jʌwara Josue boro ʌ̃rʌ̃ b̶ʌsia acʌbi carea Josuera ãdjirã boroda b̶ʌbʌrʌda Ãcõrẽba jarad̶a quĩrãca.

<- NUMERO 26NUMERO 28 ->